Nsaa kinyi na bwakinyi abitungu shi mukwetu mukashi afwale kintu kya kupuuta ku mutwe nsaa yakitshi myanda itale lulangwilo? Tubandeyi kutaluula bibaadi byakule Mpoolo mutumibwa ku bukwashi bwa kikudi kiselele pabitale uno mwanda. Etupa bukunkushi abutungu pabitale kwata kwa bitshibilo bibuwa, abitumbisha Efile Mukulu. (1 Beena-Kodinto 11:3-16) Mpoolo alesha bintu bisatu abitungu kutaluula: (1) Myanda ayitungu shi mukashi apuute mutwe waye kumpala kwa kwiyikita, (2) Mbalo ayitungu shi apuute ku mutwe, na (3) Bwakinyi abitungu shi alonde uno mwiya.

Myanda. Mpoolo baadi muleshe myanda ibidi: luteko na butemuki. (Verse 4, 5) Eyendo shi, luteko nyi mushindo wa kwisamba na Yehowa mu lulangwilo lwetu. Lelo uno butemuki mbutale mudimo ooso wa kulongyesha bantu Bible ulombeene mwina Kidishitu kukita. Byabya, Mpoolo baadi akyebe kulesha shi abitungu mukashi apuute ku mutwe nsaa yooso yeele luteko na yalongyesha bya binyibinyi bya mu Bible su? Nya. Mbitale mbalo ayitungu shi mukashi asambile sunga kulongyesha.

Mbalo. Mayi a Mpoolo aalesha mbalo ibidi: mu kifuko na mu kakongye. Bambile shi: “Mulume nfumu a mukashi . . . Mukashi  ooso atekye sunga atemuka ku mutwe bisumanga, apeesha nfumwaye.” (Verse 3, 5) Mu kifuko, mulume nyi abadi basangule kwi Yehowa bwashi ekale bu nfumu a mukashi aaye. Su takwete kunemeka bufumu bwa mulume aaye, mulombeene kupeesha mulume aaye su kwete kukita mudimo wabadi bape mulume kwi Yehowa. Bu kileshesho, su akyebe kulonga na muntu Bible nsaa i mulume aaye panka, abitungu aleshe shi anemeka bufumu bwa mulume aaye nsaa yapuutu ku mutwe. Mulombeene kukita byabya sunga mulume ekala shabandile kubatshishibwa, mwanda mulume ndjo nfumu a kifuko. * Su abitungu shi eele luteko sunga kulongyesha kumpala kwa mwan’aaye mulume kii mukinga mupwe kubatshishibwa, abitungu shi apuute ku mutwe, ta mpa mwanda washi mwana nfumu a kifuko nya, kadi mpa mwanda wa kunemeka bufumu bwabadi bape balume babatshishibwe mu kakongye ka beena Kidishitu.

Mpoolo bakwile pabitale kakongye shi: “Su kwi muntu akyebe kwela mpaka, awukye’shi tatwi na kyakya kiubishi nya, sunga mwinyi mu bipwilo by’Efile Mukulu.” (Verse 16) Mu kakongye ka beena Kidishitu, balume bapwe kubatshishibwa ndjo be na matalwa a kwikakunkusha. (1 Timotee 2:11-14; Beena-Ebreeyi 13:17) Anka penda balume ndjo balombeene kwikala bu bakulu sunga bafubi ba midimo mu kakongye bwa kukita mudimo wabadi bebape kwi Efile Mukulu bwa kulama loombe lwaye. (Bikitshino 20:28) Kadi, ingi nsaa mukashi mwina Kidishitu mulombeene kukita midimo ya mu kakongye ayitungu shi nkapenda balume babatshishibwe beyikite. Bu kileshesho, mbilombeene kwikala shi abitungu akunkushe kisangilo kya mudimo wa bulungudi mwanda balume babatshishibwe tabepanka. Sunga shi mulombeene kulonga na muntu Bible pe mulume mubatshishibwe. Bu byabidi shi yaaya midimo ngimune ya ku midimo ya kakongye, abitungu shi apuute ku mutwe bwa kulesha shi kwete kukita mudimo wabadi bape balume mu kakongye.

Na dingi, kwi myanda ibungi ya mu lulangwilo ishy’ayitungu shi mukashi apuute ku mutwe. Bu kileshesho, tabitungu shi apuute ku mutwe nsaa yaluula ku lukonko mu bisangilo bya beena Kidishitu, nsaa yalungula mukandu wibuwa ku nshibo na nshibo na mulume aaye sunga na ungi mulume mubatshishibwe,  sunga nsaa yakwete kulonga sunga kwela luteko paadi na baana baaye bashii babatshishibwe. Eyendo, nkulombeene kwibwa ingi nkonko, kadi su mukwetu mukashi tauku mwanda kampanda, mulombeene kukimbuula mu mikanda ya ndumbulwilo. * Su ki na mpaka sunga shi kondo kaaye k’eshimba akamutakula mu kukita byabya, kupuuta ku mutwe ta nkulombeene kwikala bubi nya bu byabadi bebileshe mu kifwatulo ki mu dino esaki.

Bwakinyi. Mu verse 10, abalesha myanda ibidi ayilesha bwakinyi mukashi mwina Kidishitu abitungu alombashe dino elango: “Mukashi e na kya kufwala ku mutwe, kitundwilo kya kukokyela, pa mwanda wa miikeyilu.” Wa kumpala, tala abilesha kino kishima, “kitundwilo kya kukokyela.” Kufwala kintu kya kupuuta ku mutwe akulesha shi mukashi anemeka bufumu bwabadi bape balume babatshishibwe kwi Yehowa mu kakongye. Byabya, alesha kifulo kyaaye na kululama kwaye kwi Yehowa Efile Mukulu. Wa kabidi, Mpoolo amba shi: “Pa mwanda wa miikeyilu.” Paafwala kintu kya kupuuta ku mutwe, mukashi mukumbeene kukita kinyi kwi miikeyilu?

Abikwasha ba miikeyilu nsaa yabamono shi bufumu bw’Efile Mukulu bukwete kunemekibwa mu ndumbulwilo a Yehowa mwiyilu na pa nsenga. Kileshesho kya bantu bakutwe kupwidika akibakwasha dingi pabitale uno mwanda. Mu byooso, be na kya kukokyela ndumbulwilo a Yehowa​—kintu kibaadi kikutwe kukita ingi miikeyilu mu mafuku a kala. (Yuude 6) Binobino, miikeyilu ngilombeene kumona mukashi mwina Kidishitu nsaa yakwete kunemeka bufumu bwa mulume mu kakongye aku namu pangi auku myanda ibungi sunga shi e na binangu kukila mulume mubatshishibwe. Na dingi, bakashi beena Kidishitu bashingwe mwimu abakyebe nkamunana mu Bufumu bwa Kidishitu. Baaba bakashi abakyebe nkafuba pa mbalo ikile ya miikeyilu bwa  kumunana na Kidishitu mwiyilu. Banda kutala kileshesho akikyebe kupeta miikeyilu! Eyendo shi, bakashi be na kya kulesha kwiyisha kukata pa mwanda wa kululama kwabo na mwikelo wa kwiyisha ku meso kwa miikeyilu ibungi.