1, 2. (a) Ingi nsaa twi balombeene kwiyipusha naminyi pabitale bantu abakatuka mu kwiyibakishena, na bwakinyi? (b) Nkonko kinyi yatukyebe kutaluula mu uno shapitre?

OKUMINAA kwenda ku feete a dibaka su? Bantu bebungi abendaa, mwanda yaaya nyi nsaa ya muloo ukata. Omono mulume na mukashi booso mbafwale kalolo. Ta nka penda byabya nya, ku mapala aabo akumweneka shi bakwete kusangala ngofu! Mu dino efuku, be na muloo ukata, abakulupila shi abakyebe kupeta muloo wi bungi mu mafuku e kumpala.

² Anka, twi balombeene kukumina shi mu ma mbalo e bungi, mu mabaka mmutwele kafutakanyi kakile ano mafuku. Nsaa yatukwete kukulupila myanda ibuwa ayitengyela bano abakatuka mu kwiyibakishena, twi balombeene dingi kwiyipusha shi: ‘Dino dibaka adikala na muloo binyibinyi su? Adikyebe kuisha su?’ Ngalulo ya ku ino nkonko ngitale mushindo aukyebe mulume na mukashi kukulupila na kulonda malango a Efile Mukulu pabitale dibaka. (Badika Myeele 3:5, 6.) Abitungu bakite byabya bwa kushaala mu kifulo ky’Efile Mukulu. Binobino, tubande kutuula binangu byetu ku lwalulo alutuusha Bible ku ino nkonko inanka: Nkinyi kilombeene kutuma muntu bwashi atwele mu dibaka? Su okyebe kutwela mu dibaka, nanyi odi mukumbeene kusangula bwa kutwela naaye mu dibaka? Mushindo kinyi odi mukumbeene kwilumbuula bwa kutwela mu dibaka? Na nkinyi kilombeene kukwasha bantu beyibakishene bwabadya kushaala na muloo mu dibaka?

3. Bwakinyi kwibakila bwa bisumanga nyi nkukutwa kwa binangu?

³ Bangi bantu abamonaa shi abitungu kutwela mu dibaka bwa kwikala na muloo, abamba dingi shi, bwashi wekale na muloo mu nshalelo oobe abitungu kupeta muntu odya kwiyibakishena naaye. Byabya ta nabyo nya! Yesu, muntu baadi shi mwibakile, bakwile pabitale bukupi shi nyi nkipeedi na balungwile baaba abakumina kushaala bukupi bwashi bashaale byabya. (Mateo 19:11, 12) Mpoolo mutumibwa baadi mwakule pabitale miloo ayipete bantu bashii bayibakile. (1 Beena-Kodinto 7:32-38) Bya bikala Yesu sunga Mpoolo, ta kwi muntu baadi mutuushe mwiya wa kupela kwibakila nya; byabya, ‘kukanda bulunda’ kwi mu “ndambukisho aifiki kwi kafilefile.” (1 Timotee 4:1-3) Anka, bukupi abutwala miloo ibungi kwi baaba be na lukalo lwa kufubila Yehowa kushii kutuula binangu ku ingi myanda. Kwibakila bwa bisumanga sunga pa mwanda wa kulonda bantu nkukutwa kwa binangu.

4. Dibaka dibuwa adipa baana kinyi bwa kukula kalolo?

⁴ Twi balombeene kwamba dingi shi, kwi myanda y’eyendo ikumbeene kutuma muntu mu kutwela mu dibaka su? Oolo. Dibaka dingi nyi nkya-buntu kitupe Efile Mukulu sha kifulo. (Badika Kibangilo 2:18.) Byabya, kwi na myabi na miloo ibungi. Bu kileshesho, dibaka dibuwa nyi mbalo ilombane bwa nshalelo ebuwa mu kifuko. Baana be na lukalo lwa mbalo ibuwa yabadya kwibakusha, kwibalesha kifulo, kwibalanga, na kwibakunkusha kwi baledi baabo. (Misambo 127:3; Beena-Efeeze 6:1-4) Sunga mbyabya, tabayibakilaa nkapenda bwa kutanda na kukusha baana nya.

5, 6. (a) Muyiile Mulungudi 4:9-12, miloo kinyi ayimweneka nsaa i bakuuku be mu kipwano ki bukopo? (b) Dibaka ndilombeene kwikala bu mooshi ulukwe pasatu naminyi?

⁵ Tubande kutaluula verse a mutwe wa mwanda wa uno shapitre na myanda i mwanka: “Bantu babidi be na muulo ukile wa muntu umunenka, mwanda be n’efuto dikumbane bwa mufubo wabo. Mbinyibiinyi, su bapona mungi abuusha umo. Anka kabi nka uno e buupenka! Su apona, te na aakabidi bwa kumwibwesha. Dingi nyi, abalaala buu babidi, be na  kibobo, anka e bupenka, mbii kunyi byapete kibobo? Dingi su muntu mmulombeene kwobesha ee bupenka, anka babidi abamushinamina; mooshi ulukwe pasatu tautshibikaa bukidi.”​—Mulungudi 4:9-12.

⁶ Kya kumpala, uno verse esambila pabitale muulo wa bukuuku. Eyendo’shi dibaka nyi nkipwano kikata kya bukuuku. Anka bu byabebilesha mu uno verse, kyakya kipwano akitwala bukwashi, kunyingishibwa, na kukalwilwa. Dibaka adinyingaa bikishekishe nsaa yadishii na penda bantu babidi. Mooshi ulukwe pabidi, bu abilesha uno verse, ngulombeene kutshibika. Anka, kipaaba sunga mooshi ulukwe pasatu bi bukopo bwa kwiutshiba. Nsaa i mulume na mukashi mbatuule myanda ya kusangasha Yehowa pa mbalo ya kumpala, dibaka dyabo ndilombeene kwikala bu mooshi ulukwe pasatu. Dyadya dibaka adikala dinyingye mwanda Yehowa e na mbalo ikata munkatshi mwabo.

7, 8. (a) Elango kinyi dibaadi dituushe Mpoolo bwa beena Kidishitu bashii bebakile bakwete kulwa ngoshi na lukalo lwa kusangisha mbidi? (b) Bible etupa mweneno kinyi ebuwa pabitale dibaka?

⁷ Na dingi mpenda mu dibaka nyi mbalo ilombeene kupudisha lukalo lwa kusangisha mbidi. Pa bitale uno mwanda, kusangisha mbidi abekwata bu kintu kimune akibatwadila muloo. (Myeele 5:18) Sunga nsaa i nsongwalume ata nsongwakashi akisha kipungo akikalaa lukalo lwa kusangisha mbidi lwi bukopo mu mbidi mwaye, lwalwa lukalo ndulombeene kutungunuka na kumukalakasha. Su ta mwilame, lwalwa lukalo ndulombeene kumufisha mu kwikala na mwikelo wi bubi. Ku bukwashi bwa kikudi kiselele, Mpoolo batuushile dino elango bwa bantu bashii bebakile aye nkwamba shi: “Anka su tabee na bukome bwa kushaala beekande, baibakile mwanda mbikile buwa kwibakila pamutwe pa kutuwakana.”​—1 Beena-Kodinto 7:9; Jaake 1:15.

⁸ Sunga kwekala mwanda kampanda ulombeene kutakula muntu bwashi ayibakile, abitungu ekale na binangu bibuwa. Mwanda Mpoolo aakula shi, bantu beyibakishene “abakeekala na nkalakasho iibungi.” (1 Beena-Kodinto 7:28) Bantu beyibakishene abapetaa nkalakasho ishayipetaa bantu bashi bebakile.  Byabya su oyibakila, mushindo kinyi oodi mulombeene kwikala na nkalakasho ipeela kadi na muloo wibungi? Kintu kya kumpala nkusangula kalolo muntu ebuwa akutwela naaye mu dibaka.

9, 10. (a) Mushindo kinyi ubaadi Mpoolo muleshe masaku aatukaa nsaa i muntu beyibakishena na muntu shii mwina Kidishitu? (b) Nkinyi kilombeene kutuuka su muntu apela elango dy’Efile Mukulu dya kupela kwiyibakishena na muntu shi mwina Kidishitu?

⁹ Ku bukwashi bwa kikudi kiselele, Mpoolo baadi mutushe eyi aditungu kulonda kumpala kwa kusangula muntu a kwiyibakishena naaye, bambile shi: “Tanwibunganga na bantu bashii bakumiine.” (2 Beena-Kodinto 6:14) Kileshesho kyaye baadi mwikyatshile mu nshalelo a ba kidime. Su banya nyema ibidi i na bukome bwilekene, yooso ibidi ngilombeene kukyenga. Bi mumune, su muntu mwina kukumina eyibakishena na muntu shii mwina kukumina mbalombeene kwikala na bilumbu bibungi munkatshi mwabo. Su mwina dibaka umune e na lukalo lwa kushaala mu kifulo kya Yehowa ungi naamu tebyata na muulo, myanda yabaata na muulo ngilombeene kwilekena munkatshi mwabo, na mbalombeene kwikala na nkalakasho ibungi. Mpoolo balungwile beena Kidishitu bwabadya kwiyibakishena ‘nkapenda na mwina-Kidishitu.’​—1 Beena-Kodinto 7:39.

¹⁰ Ingi nsaa, beena Kidishitu bashii bebakile mbafikye mu kumona shi bibuwa kwiyibakishena na muntu shi mwina Kidishitu pamutwe pa kushaala bukupi. Bangi mbaate kitshibilo kya kupela kulonda elango dya mu Bible, bwa kwiyibakishena na muntu shii mufubi a Yehowa. Misusa ibungi akutuukaa bipeta bi bubi. Yawa muntu eyibakishena na muntu abashii balombeene kukita naaye myanda i na muulo mu nshalelo aabo. Mulombeene kwipusha bu ebupenka ngofu kukila bibaadi apusha kumpala kwabadya kwiyibakishena. Mwanda wa muloo kwi binunu na binunu bya beena Kidishitu bashii bebakile abalondaa dino elango pabitale uno mwanda. (Badika Misambo 32:8.) Sunga be na lukalo lwa kwibakila dingi efuku,  bakwete kushaala bukupi mpa na efuku dyabakapete muntu akwiyibakishena naaye munkatshi mwa balangwidi ba Yehowa Efile Mukulu.

11. Nkinyi kilombeene nkukwasha bwa kusangula mulume sunga mukashi ebuwa? (Tala na kashibo “ Nkinyi kyankimbi kwi muntu ankyebe kwiyibakisheena naye?”)

¹¹ Eyendo’shi, ta nka penda mufubi a Yehowa ooso mulombeene kwikala bu mwina dibaka ebuwa. Su we na lukalo lwa kwibakila, kimba muntu mulombeene kwikala na binangu bimune noobe, mpàngo ya mu kikudi i mumune noobe, na mufule Efile Mukulu byoodi mumufule. Mpika sha kishima na mupatulukye mutuushe mikanda ibungi ayakula pabitale uno mwanda, na we mulombeene kwiyikimba bwa kupeta malango a mu Bible na kwela nteko bwashi akukunkushe nsaa yokyebe kwata kino kitshibilo kikata. *​—Badika Misambo 119:105.

12. Nkipikwa kinyi kipalakane mu maumbo ebungi pabitale dibaka, na nkileshesho kinyi kya kulonda ki mu Bible?

¹² Mu maumbo ebungi, baledi nyi abasangwilaa mwana abo muntu a kwibakila. Muyiile kipikwa kyabo abauku shi baledi be na binangu bibuwa na mbamone myanda ibungi pabitale kyakya kitshibilo kikata. Dibaka dyabadi balumbuule adyobelekaa bu byabebilesha mu Bible. Kileshesho kya Abrahame batumine mufibi aaye mukwatshila mwan’aaye Isaake mukashi nyi elango dikata kwi baledi be na matalwa akwatshila baana baabo kyakya kitshibilo lelo uno. Makuta na nkumo ya kifuko kya mukashi tabibaadi na muulo ukata kwi Abrahame nya. Kadi baadi mukite mwaye mooso bwa kupetela Isaake mukashi munkatshi mwa balangwidi ba Yehowa. *​—Kibangilo 24:3, 67.

13-15. (a) Elango di mu Myeele 24:27 ndilombeene kukwasha nsongwalume kwete kwela binangu bwa kwibakila naminyi? (b) Kinyi kikumbeene kukita nsongwakashi elumbuula bwa kutwela ku bulunda?

¹³ Su okwete kunangushena bikata pabitale kwibakila, abitungu weyele luno lukonko, ‘ne mupwe kwilumbuula su?’ Kwikala mwilumbuule ta nkutale byopusha pabitale kifulo, malaka a kusangisha mbidi, kwikala pepi na muntu, sunga kobesha kukusha baana nya. Anka, mulume sunga mukashi akyebe kwibakila abitungu eele binangu pabitale bushito bukata bwakyebe kwikala nabo mu dibaka.

¹⁴ Nsongwalume akimbi mukashi abitungu eele binangu kalolo pabitale dino eyi dya kulonda: “Banda kukita mufubo wobe wa paasha, olumbuule mwifuba dyoobe; kuunyima, we mulombeene kwibaka nshibo.” (Myeele 24:27) Bino abikyebe kulesha kinyi? Mu aa mafuku su muntu akumiina ‘kwibaka nshibo [yaaye],’ sunga kwibakila bwa kukita kifuko, bibaadi abitungu’shi eyipushe shi, ‘Ne mwilumbuule bwa koobesha bushito bwa mukashi na baana batudi balombeene kutanda su?’ Kya kumpala abitungu afube, alumbuule efuba dyaaye. Wawa mwiya umune wi na bukwashi lelo uno. Mulume akyebe kwibakila abitungu elumbuule pabitale bushito bwakyebe kutwala. Su e na bukome bwa mbidi abitungu afube. Eyi dy’Efile Mukulu adilesha shi mulume sh’atala nkalo ya ku mbidi, ya mwishimba, na ya mu kikudi ya beena kifuko kyaaye nyi mmubi kukila shii-na-lukumiino!​—Badika 1 Timotee 5:8.

¹⁵ Mukashi akumina kutwela ku bulunda, abitungu akumiine shi e na mashito adya kutwala. Bible alesha muulo wi nawo ingi ngikashi ilombeene kwikala nayo mukashi kwi mulume aaye nsaa yakwete kumukwasha bwa kulombasha nkalo ya ba mu nshibo yaaye. (Myeele 31:10-31) Balume na bakashi bakwete kusuusa bwa kwibakila kushii kwilumbuula pabitale mashito aebatungu kutwala taboobesha nya mwanda tabauku akitungu shi bakitshine mwina dibaka nabo nya. Kintu ki na muulo ukata dingi, abitungu shi baaba abakyebe kwibakila bekale belumbuule  pabitale kulonda kwa malango a Efile Mukulu pabitale nshalelo a mu dibaka.

16, 17. Baaba bakwete kwilumbuula bwa kwibakila abitungu banangwile pabitale mayi kinyi a kulonda e mu Bible?

¹⁶ Kwilumbuula bwa dibaka akutekye kunangwila ku mudimo wabadi bape mulume na mukashi mu kifuko kwi Efile Mukulu. Abintugu mulume aukye akilesha kwikala nfumu a nshibo ya beena Kidishitu. Uno mudimo wadi nawo taumupa matalwa akukitshisha ba mu nshibo yaaye myanda pa bukopo nya. Anka abitungu alonde kileshesho kya Yesu pabitale bufumu. (Beena-Efeeze 5:23) Bi mumune na mukashi mwina Kidishitu abitungu aukye mudimo wa kinemo wabadi bamupe. Akumiina kwikala akokyela “mwiya wa mulume [aaye]” su? (Beena-Looma 7:2, Kilombeno kipya 2009) E ku mwiya wa Yehowa na Kidishitu. (Beena-Galate 6:2) Matalwa a mulume aaye mu nshibo aalesha ungi mwiya. Mulombeene kukokyela na kwiyisha nsaa yaadi ku matalwa a muntu shi mupwidikye su? Su bamono shi tabimusangasha, bibuwa alekye kwibakila.

¹⁷ Na dingi, mwina dibaka ooso abintu ekale mwilumbuule bwa kulombasha nkalo ya mungi. (Badika Beena-Fidipe 2:4.) Mpoolo bafundile shi: “Ooso a kwanudi e na kya kufula mukashi aaye bu byadi mwifule aye nabeene, mukashi naamu aneemekye mulume aaye.” Ku bukwashi bwa kikudi kiselele Mpoolo bamwene shi mulume e na lukalo lukata lwashi mukashi amunemekye ngofu. Mukashi naamu e na lukalo lukata lwa kufudibwa na mulume aaye.​—Beena-Efeeze 5:21-33.

18. Bwakinyi abitungu shi mulume na mukashi bekale na butontshi bwa mbidi nsaa yabeyileena?

¹⁸ Kipindji kya kwiyilena dingi, ta nkipungo kya kwasha maasha nya. Nyi nsaa ayitungu mulume na mukashi kulonga mushindo wabakyebe kwikala abekitshishena myanda, bwa kumona su mbalombeene kwiyibakishena. Nyi nsaa ayitungu shi muntu etaluule. Kitompwanga kya kwileshena kifulo kya ku mbidi kilombeene kwikala nakyo bantu beyibakishene​—sunga mbyabya, kwikala na lwalwa lukalo ta kwi bubi nya. Anka, baaba befulene mbalombeene kushikwa kintu kyooso kilombeene kulwishisha mwinaaye kipwano kyaaye n’Efile  Mukulu. (1 Beena-Tesalonika 4:6) Byabya su nukwete kwiyilena, abitungu nwikale na butontshi bwa mbidi; dyadya eyikashi ndilombeene nkukwasha mu muwa oobe, su oyibakila sunga kukutwa kwibakila.

19, 20. Mushindo kinyi autungu shi mweneno a beena Kidishitu bwa dibaka ekale mwilekene na a bantu bebungi lelo uno? Tuusha kileshesho.

¹⁹ Su mulume na mukashi abakumina shi dibaka dyabo dipwe mafuku ebungi, abitungu bekale na mweneno ebuwa pabitale mutshipo wabo wa dibaka. Mu nshalelo a binyibinyi, dibaka ta nfudiilo nya; nyi mbangilo​—mbangilo a kintu kyabadi batuule kwi Yehowa bwa kupwa mafuku ebungi. (Kibangilo 2:24) Bi malwa, mwanda yawa mweneno mupalakane munkatshi mwa bantu bebungi lelo uno. Mu bingi bipikwa, bantu abambaa shi kwibakila kwi bu “kwanya eshita.” Tabashinguula akikyebe kupatuula kyakya kileshesho pabitale nshalelo a bantu mu dibaka. Bwakinyi? Bu bi eshita dibuwa ndilombeene kunyinga pakudi mushindo, eshita dibuwa abitungu diikale dibofule bwa kwidishituula.

²⁰ Lelo uno bantu bakwete kumona dibaka bu kintu kya kapindji kapela. Abemutwelaa lubilo mwanda abapwandikisha shi adilombasha nkalo yaabo, kadi abatengyela kwimutuuka lubilo su abamono shi mwi nkalakasho. Byabya tentekyesha shi kileshesho kyabatuusha mu Bible pabitale kyakya kipwano kya dibaka​—nyi mooshi. Myoshi sunga kipaaba kyabadi balukye bwa kwanya mikooko abekilukaa bwa kupwa mafuku ebungi, ta mbwashi kilwile, sunga kwekala lukalakasho. Bi mumune na dibaka ndikitshibwe bwa kupwa mafuku ebungi. Tentekyesha shi Yesu bakwile shi: “Muntu taabuulanga kyaakya kibungiibwe kwi Efile Mukulu.” (Mateo 19:6) Su boyibakila, abitungu wekale na uno mweneno pabitale dibaka. Mutshipo wa dibaka ngulombeene kwikala bu bushito su? Nya.

21. Mulume na mukashi abitungu bekale na mweneno kinyi, na nkinyi kilombeene kwibakwasha bwa kukita byabya?

²¹ Mulume na mukashi abitungu bekale na mweneno ebuwa munkatshi mwabo. Su muntu kwete kwitatshisha bwa kutala  penda ngikashi ibuwa ya mungi, dibaka ndilombeene kwikala bu mbalo ya kwikisha na muloo. Mbilombeene kwikala bukopo bwa kutala penda myanda ibuwa ya muntu mukutwe kupwidika su? Yehowa atala nkapenda myanda yetu ibuwa, byabya bwa kutuula binangu ku myanda ibuwa ya muntu mukutwe kupwidika, twi na lukalo lwa bukwashi bwaye. Mufundji a misambo batekyele shi: “Su obe Yehowa obadika bi bungi bwa milwisho yetu a nanyi a kupanda?” (Misambo 130:3, Ñono na malango) Mulume na mukashi abitungu bekale na mweneno ebuwa a kwifwilenanga lusa.​—Badika Beena-Kolose 3:13.

22, 23. Mushindo kinyi ubaadi Abrahame na Saara balekyele bantu bayibakile kileshesho kibuwa?

 ²² Dibaka ndilombeene kutwala muloo na disanka nsaa yadinyingiila mu nkalakasho munda mwa bipwa bibungi. Bible etulesha bibaadi dibaka dya Abrahame na Saara nsaa ibabadi bantu banunu. Dibaka dyabo tadibaadi dikutwe bilumbu na nkalakasho nya. Banda kunangushena bibabidi abitungu shi Saara, mukashi baadi mu bipwa 60, alekye nshibo yaaye ibuwa mu kibundji kibuwa kya Ure bwa kwenda mu kushaala mu tushibo twa mapema munda mwa mafuku aaye ooso abashadile. Sunga mbyabya, baadi mwiyishe ku meso kwa mulume aaye. Baadi mukwashi mulombane bwa Abrahame, baadi amukwasha bwa kulombasha bitshibilo byaaye. Na kukokyela kwaye takubaadi kwa bisumanga nya. Mpa na “munda mwaye,” baadi ayitamina mulume aaye bu mwanana. (Kibangilo 18:12; 1 Mpyeele 3:6) Kanemo kabaadi nako kwi Abrahame kabaadi ka mwishimba.

²³ Eyendo, byabya tabilesha shi Abrahame na Saara abaadi abakula penda myanda i mumune nya. Baadi mutuushe binangu kampanda bibaadi ‘bifiitshishe’ Abrahame munda. Anka, ku bukunkushi bwa Yehowa, Abrahame baadi muteemeshe eyi dya mukashi aaye na kwiyisha kooso, dibaadi dyalulukye bu mwabi bwa kifuko kyaaye. (Kibangilo 21:9-13) Balume na bakashi lelo uno, sunga baaba bapwe kwibakila munda mwa bipwa makumi, mbalombeene kulonga bibungi kwi Abrahame na Saara bantu abaadi abatshinyi Efile Mukulu.

24. Mmabaka a mushindo kinyi akwete kutumbisha Yehowa Efile Mukulu, na bwakinyi?

²⁴ Mu kakongye ka beena Kidishitu, mwi mabaka binunu na binunu e na muloo​—mu mabaka mwi mukashi anemeka mulume aaye, na mulume naamu afulu mukashy’aaye na amwata na kinemo, na mwi mulume na mukashi abakitshi mwabo mooso bwa kutuula akikyebe eshimba dya Yehowa pa mbalo ya kumpala mu myanda yooso. Su bwata kitshibilo kya kwibakila, sangula muntu ebuwa a kwiyibakishena naaye, elumbuule kalolo bwa dibaka, kita moobe mooso bwa kwikala na dibaka difukame, aditumbisha Yehowa Efile Mukulu. Su bokitshi byabya, dibaka dyoobe adikyebe nkukwasha bwa kwilama mu kifulo ky’Efile Mukulu.