1-3. (a) Bwakinyi nyina mwana akitaa mwaye mooso bwa kutumpa mwan’aaye na kumufwadika bilamba bitokye na bimulombane kalolo? (b) Bwakinyi Yehowa akyebe shi balangwidi baaye bekale betooshe, na nkinyi akitutumu bwashi twikale betooshe?

NYINA mwana umune alumbuula mwana aaye akyebe kwenda mbalo kampanda. Bamutumpu mema na kumufwadika bilamba bitokye na bimulombane kalolo. Auku shi mankenda a mbidi e na muulo ukata bwashi mwana ekale na mbidi bukome. Na auku dingi shi abimweneka mwana ku meso kwa bantu mbilombeene kupa baledi nkumo ibuwa sunga kwibasabulusha.

² Yehowa, Nshetu e mwiyilu, akyebe shi bafubi baaye bekale betooshe ku butete booso. Eyi dyaye adyamba shi: “Bu byatudi na milayilo ii bino, twitosheeyi’twe baanabeene ku butete booso  bwa mbidi naa bwa kikudi.” * (2 Beena-Kodinto 7:1) Yehowa mwitufule; auku shi bwashi twikale biya abitungu twitooshe. Na dingi akumina shi atwe Batemwe baaye byatumweneka ku meso kwa bangi bantu bibatume mu kumutumbisha. Byabya, mushindo watumweneka betooshe ku meso kwa bantu na mwikeelo wetu autumbisha Yehowa n’eshina dyaaye diselele, pamutwe pa kumusabulusha.​—Ezekyele 36:22; badika 1 Mpyeele 2:12.

³ Kuuka kwashi Yehowa mufule bantu betooshe akwitutakula bwa kwikala betooshe ku meso kwaye. Atukyebe shi nshalelo etu amutumbishe mwanda twi bamufule. Na dingi, twi na lukalo lwa kushaala mu kifulo kyaaye. Binobino, tutande kutaluula bwakinyi bibuwa twikale betooshe, akilesha kwitoosha, na mushindo watudi balombeene kushaala betooshe. Kutaluula kwa ino myanda nkulombeene kwitukwasha bwa kumona mbalo ayitungu kulumbuula mu nshalelo etu.

4, 5. (a) Nkintu kinyi kya kumpala akitutumu mu kwikala betooshe? (b) Mushindo kinyi aumweneka kukutwa kwa butete kwa Yehowa mu bintu byaadi mupangye?

⁴ Ungi mushindo awitukunkushaa Yehowa nyi mu kwitupa kileshesho. Nyi bwakinyi Eyi Dyaye aditulungula shi: “Ambulayi Efile Mukulu.” (Beena-Efeeze 5:1) Kintu kya kumpala akitutumu bwashi twikale betooshe nkino: Yehowa, Efile Mukulu atukwete kulangwila, nyi Efile Mukulu shi na kato, na eselele mu myanda yooso.​—Badika Beena-Levi 11:44, 45.

⁵ Kukutwa kwa butete kwa Yehowa, bu bi ingi ngikashi yaaye yooso, akumweneka mu bipangwa byaaye. (Beena-Looma 1:20) Nsenga ngipangibwe bwashi ikale mbalo ilongame bwashi bantu bemushaale. Yehowa mukite bwashi myela na lupapi bikale abiitoosha abyo binabeene. Nsenga mbeyikite bwashi ikale ayiisuula ayo inabeene. Abimweneka kalolo shi mwanda utale mankenda wi na muulo ukata ku meso kwa yawa “Mupangye nsenga.” (Yeelemiya 10:12) Abitungu wikale dingi na muulo kwatudi’twe namu.

6, 7. Mushindo kinyi aulesha Miiya ya Moyiise shi baaba abaadi abalangwila Yehowa abaadi na kitungo kya kwitoosha?

 ⁶ Kingi kintu akitutumu bwashi twikale betooshe nyi mwanda Yehowa, Nfumu etu a kwiyilu kula, akyebe shi balangwidi baaye bekale betooshe. Mu Miiya ibaadi Yehowa mupe mwilo wa Isaleele, mankenda abaadi aende pamune na lulangwilo. Miiya ibaadi ayilesha shi Mwifuku dya kulekiibwa kwa milwisho, tshiite-mwakwidi mukata e panundu tabaadi etumpu mema penda musango umune nya, baadi etumpu misango ibidi. (Beena-Levi 16:4, 23, 24) Ba tshiite-mwakwidi abafubu abaadi na kya kwisuula maboko na mikoolo kumpala kwa kulambula milambu kwi Yehowa. (Efilu 30:17-21; 2 Myanda 4:6) Mu Miiya, abaadi baleshe myanda pepi na 70 ayilesha shi kukutwa kwa mankenda kubaadi akulwisha lulangwilo lwa muntu. Su mwina Isaleele tamwitooshe, ta mulombeene kwisanga mu lulangwilo nya, su bebikitshi mulombeene kutshibilwa kiimu kya lufu. (Beena-Levi 15:31) Muntu ooso apele kulonda kipikwa kya kutooshibwa, mpa na kutumpa mbidi yaaye sunga bilamba byaaye, baadi na kya ‘kukashibwa munkatshy’a kakongye.’​—Mbadiko 19:17-20.

⁷ Sunga mbyatushi mu Miiya ya Moyiise, ino miiya ayitulesha bi binangu bya Yehowa pabitale uno mwanda. Miiya ayilesha patooka shi baaba abaadi abalangwila Yehowa abaadi na kitungo kya kwitoosha. Yehowa ta mmwalulukye nya. (Malakii 3:6) Yehowa mukumbeene kukumina lulangwilo lwetu nka su ‘ndupwidikye na lushi kato.’ (Jaake 1:27) Byabya bibuwa tuukye kyetutekye pabitale uno mwanda.

8. Yehowa akyebe shi twikale betooshe mu myanda kinyi?

⁸ Mu Bible, kwikala betooshe ta nkutale penda mankenda a mbidi nya. Kwitoosha ku meso kw’Efile Mukulu nkutale myanda yooso ya nshalelo etu. Yehowa akyebe shi twikale betooshe mu myanda inanka: mu kikudi, mu mwikeelo, mu binangu, na ku mbidi. Binobino, tubande kutala akilesha mwanda na mwanda ooso.

9, 10. Kwikala betooshe mu kikudi akulesha kinyi, na nkinyi akitungu shi beena Kidishitu bapele?

⁹ Kwitoosha mu kikudi. Mu kikoso, kwitoosha mu kikudi akulesha kupela kwa kusangisha lulangwilo lwa madimi na lwa binyibinyi.  Pabaadi beena Isaleele bakatukye ku Babilone bwa kwaluka ku Yelusaleme, abaadi bebape dino elango: “Tukaayi mwamwa; tanukumanga ku bintu bishii-byakishila [bi butete, NWT]; . . . nwisompoole.” (Yeeshaya 52:11) Mwanda wa kumpala ubaadi walushe beena Isaleele ngwa kwalushuula lulangwilo lwa Yehowa. Lwalwa lulangwilo lubaadi na kya kwikala lwiselele​—lushi lulwishibwe na malongyesha kampanda, sunga bikitshino na bipikwa kampanda bya bipwilo bya mu Babilone abisabuula Efile Mukulu.

¹⁰ Lelo uno, atwe beena Kidishitu ba binyibinyi abitungu twikale badimukye bwashi lulangwilo lwetu talulwishibwanga na bipwilo bya madimi. (Badika 1 Beena-Kodinto 10:21.) Abitungu kudimuka pabitale uno mwanda bu bi bipwilo bya madimi mbipalakane mbalo yooso. Mu maumbo ebungi, bipikwa bibungi, na myanda ayikitaa bantu, na ingi misangeelo ayilondaa malongyesha a bipwilo bya madimi, mu binangu byashi, kwi kintu ki munda mwa muntu kisha kifwiya apafu muntu. (Mulungudi 9:5, 6, 10) Beena Kidishitu b’eyendo tabalondaa bipikwa byooso bipusheene na malongyesha a bipwilo bya madimi nya. * Tatwi balombeene kutadiila bwashi bantu betutakule mu kutupilwa miiya ya mu Bible pabitale lulangwilo lwiselele nya.​—Bikitshino 5:29.

11. Kwikala mwitooshe mu mwikeelo akulesha kinyi, na bwakinyi abitungu kwikala betooshe mu wawa mushindo?

¹¹ Kwitoosha mu mwikeelo. Kwikala mwitooshe mu mwikeelo nkutale mpa na kupela kukita myanda yooso itale lusandji. (Badika Beena-Efeeze 5:5.) Kwikala mwitooshe mu mwikeelo kwi na muulo ukata. Bu byatukyebe kwibimona mu shapitre alondo, bwa kwilama mu kifulo ky’Efile Mukulu, abitungu ‘kufutaala kutambuka lusandji.’ Baasha lusandji abapele kwilanga ku mashimba “taabapyaana bufumu bw’Efile Mukulu nya.” (1 Beena-Kodinto 6:9, 10, 18) Ku meso kw’Efile Mukulu, bantu be byabya be munkatshi mwa bantu “be butete.” Su ta mbobeshe kushaala betooshe, “kipindji kyabo . . . nyi ndufu lwakabidi.”​—Bifumbulwe 21:8, Kilombeno kipya.

12, 13. Nkwipushena kinyi kwi pankatshi pa binangu byetu na bikitshino byetu, na mushindo kinyi watudi balombeene kwikala betooshe mu binangu?

 ¹² Kwitoosha mu binangu. Binangu nyi abifwishaa bikitshino. Su tubatadiila myanda ibubi ayishaala mu binangu byeetu na mu mashimba etu, lelo sunga maloba twi balombeene kukita myanda ibubi. (Mateo 5:28; 15:18-20) Kadi su tubatwesha myanda ibuwa, iselele mu binangu byetu, ino myanda ngikumbeene kwitukwasha bwa kwikala na mwikeelo wiselele. (Badika Beena-Fidipe 4:8.) Mushindo kinyi watudi balombeene kwikala nsaa yooso betooshe mu binangu? Mwanda wa kumpala autungu kutaluula nyi nkupela kutala bintu byooso bikumbeene kulwisha binangu byetu. * Na dingi, twi balombeene kwikala atutwesha myanda ibuwa mu binangu byetu patulongo Eyi dy’Efile Mukulu efuku dyooso.​—Misambo 19:8, 9.

¹³ Bwa kushaala mu kifulo ky’Efile Mukulu, abitungu shi twikale nsaa yooso betooshe mu kikudi, mu mwikeelo, na mu binangu. Kwikala betooshe mu ino myanda atwikwisambila mu angi ma shapitre a uno mukanda. Binobino, tubande kutala mwanda wa kananka​—Kwitoosha ku mbidi.

14. Bwakinyi mankenda a mbidi ta mwanda utale penda muntu aye nabeene nya?

¹⁴ Kwitoosha ku mbidi akulesha kulama mankenda a mbidi na a mbalo yatudi bashaale. Mankenda a mbidi nyi mmwanda utale muntu aye nabeene, ushi utale ungi muntu su? Ta mbikumbeene kwikala byabya bwa balangwidi ba Yehowa nya. Bu byatumonanga ku mbangilo, mankenda a mbidi e na muulo ku meso kwa Yehowa, ta nkapenda mwanda shi e buuwa bwetu’twe nya kadi ngakumbeene kutuma bantu mu kutumbisha sunga kusabuula Yehowa. Banda kwela binangu pabitale kileshesho kyatumonanga ku mbangilo kwa uno shapitre. Su omona mwana e butshafu nsaa yooso na bilamba bibubi, se we kwiyipusha su baledi baaye be naminyi? Tatukumina shi kintu su nkimune kitale mushindo watumweneka ku meso kwa bantu sunga nshalelo etu kisabuluushe Nshetu e mwiyilu sunga kukutshisha bantu kuteemesha  mukandu watukwete kulongyesha nya. Eyi dy’Efile Mukulu adyamba shi: “Taatukyebe su nkapeela kutakusha muntu mu myanda ibi, bwashi bufubi bwetu bwikale bushii kutopekwa. Anka atwileesha atwe baanabeene, mu byooso bu bafubi b’Efile Mukulu.” (2 Beena-Kodinto 6:3, 4) Binobino, mushindo kinyi watudi balombeene kwikala nsaa yooso betooshe ku mbidi?

15, 16. Temuna bingi biubishi bitale mankenda, na bilamba byetu abitungu kwikala naminyi?

¹⁵ Mankenda etu a mbidi na mushindo watumweneka ku meso kwa bantu. Sunga byekala shi biubishi na nshalelo a bantu mmwilekeene kwiumbo n’eumbo, twi balombeene kupeta nsabunyi i buwa na mema bwa kwitumpanga nsaa yooso na bwashi atwe na baana beetu tatwikalanga butshafu. Bwa kwikala na mankenda abitungu kwikala na kiubishi kya kwisuula maboko na nsabunyi kumpala kwa kudya kintu kampanda sunga kumpala kwa kukuma bya kudya, kunyima kwa kufika ku nkumba, sunga kumpala na kunyima kwa kutumpa mpa na kushintula mwana bilamba.  Kwisuula maboko na nsabunyi nkukumbeene kwitukalwila ku mikumbo ibungi ikumbeene kwipa muntu. Nkukumbeene kwitukwasha bwashi ingi mikumbo ya lwambu tayipalakananga, na kukwasha bwa kusuuka mikumbo bu kusumbuka munda. Mu maumbo ebungi tamwi milengye ikata ayitwala butshafu abufiki mu mashibo nya, byabya bibuwa kushiika butshafu booso, bu bibaadi abikitshi beena Isaleele.​—Miiya Ikituulwe 23:12, 13.

¹⁶ Abitungu dingi kutumpanga bilamba byetu bwashi bikale bitookye na abimweneka kalolo ku meso kwa bantu. Bilamba bya mwina Kidishitu tabitungu shi bikale bya muulo wibukopo sunga bipya bibakatuka mu kutuuka nya, kadi bibuwa bikale bimulombane kalolo, bishi butshafu, na abilesha kwidinga. (Badika 1 Timotee 2:9, 10.) Sunga twekala mbalo kinyi, atukyebe shi byatumweneka ku meso kwa bantu bileshe shi twi “bape bulambukishi bw’Efile Mukulu, Mupaashi eetu, kineemo.”​—Tite 2:10.

17. Bwakinyi abitungu shi nshibo yetu na mbalo yatudi ikale ishi na butshafu na ayimweneka kalolo ku meso kwa bantu?

¹⁷ Nshibo yetu na mbalo yatudi bashaale. Nshibo yetu ngikumbeene kwikala ishi ibakwe na bintu bya muulo, kadi abitungu ikale ishi butshafu na ayimweka buwa ku meso kwa bantu muyiile mushindo watudi nawo. Bi mumune, su twi na motoka watwendaa nawo ku bisangilo sunga mu kulungula mukandu wibuwa, bibuwa tukite mwetu mooso bwashi tawikalanga na butshafu munda mpa na paasha. Tatulubanga shi su nshibo yetu na mbalo yatudi bashaale tayi butshafu ngikumbeene kutuusha bu kamonyi. Na dingi, atulongyeshaa bantu shi Yehowa nyi Efile Mukulu eselele, shi kato, na dingi shi, akyebe ‘kubutula abalwisha nsenga,’ na shi Bufumu bwaye abukyebe binobino kwalula nsenga bwashi ikale mpaladiiso. (Bifumbulwe 11:18; Luuka 23:43) Oolo, atukyebe shi abimweneka nshibo na bintu byetu ku meso kwa bantu bibaleshe shi kubanga binobino tukwete kwata kiubishi kya kwikala na mankenda kilombane bwa baaba abakatwele mu ndumbulwilo mupya taadi pepi.

18. Mushindo kinyi watudi balombeene kulesha kanemo ku Nshibo ya Bufumu?

¹⁸ Mbalo yetu ya lulangwilo. Kifulo kyatudi nakyo bwa Yehowa akitutakula mu kunemeka Nshibo ya Bufumu, mbalo yatwibungaa bwa lulangwilo lwetu lwa binyibinyi. Bantu benyi pabafiki ku nshibo  ya bufumu, atwikalaa na lukalo lwashi byabamono pa mbalo yetu ya kulangwila bibakanyishe. Bwashi Nshibo ya Bufumu ikale ayimweneka kalolo ku meso kwa bantu, abitungu twikale na kiubishi kya kwiyisulanga na kwiyilumbuula. Atulesha shi atunemeka Nshibo ya Bufumu nsaa ya twiyisuula na kwiyilumbuula. Mmwanda wa kinemo kikata patwipaana na nsaa yetu yooso bwa kwenda mu kusuula na mu “kulumbuula na kulongamisha” mbalo yetu ya lulangwilo. (2 Myanda 34:10) Uno mwanda ngutale dingi nsaa yatudi ku Nshibo ya Kikongeno sunga mu angi ma mbalo a bikongeno bya kifunda sunga bya mafuku asatu.

19. Bwa kwitoosha ku mbidi, abitungu tushikwe kinyi, na mbukwashi kinyi bwatudi balombeene kupeta mu Bible pabitale uno mwanda?

¹⁹ Bwa kwitoosha ku mbidi, abitungu tushikwe biubishi byooso na bikishino bi bubi, bu kutoma nfwanka, kukolwa malwa, na kutoma manga aakolanaa na bintu abilwisha binangu. Mu Bible ta mbaleshe biubishi na bipikwa byooso bi butete abisanganyibwa mbalo yooso lelo uno nya, kadi mwi mayi a kulonda alombeene kwitukwasha bwa kuuka abipushaa Yehowa pabitale bino bintu. Bu byatwiuku bi mweneno a Yehowa pabitale bino bintu, kifulo kyatudi nakyo bwaye akitutakula mu kwikala na nshalelo aadi mukumiine. Binobino, tubande kutaluula mayi atano a kulonda e mu Bible.

20, 21. Yehowa akumina shi tupele kukita myanda kinyi, na bwakinyi twi na kya kwibikita?

²⁰ “Bu byatudi na milayilo ii bino, twitoosheeyi’twe baanabeene ku butete booso bwa mbidi naa bwa kikudi; tukimbeeyi bya kwikita beeselele, tutshiin’Efile Mukulu.” (2 Beena-Kodinto 7:1) Yehowa akumina shi twitooshe ku bintu bilombeene kulwisha mbidi yetu na kikudi kyetu mpa na binangu byetu. Abitungu tushikwe bintu byooso bilombeene kwikasha muntu bu mpika aabyo bilombeene kutuula mbidi na binangu mu masaku.

²¹ Bible alesha kalolo bwakinyi abitungu ‘twitooshe’twe baanabeene ku butete booso bwa mbidi.’ Mukanda wa 2 Beena-Kodinto 7:1 aubanga bino shi: “Bu byatudi na milayilo ii bino.” Milayilo kinyi? Anka bu byabidi bileshibwe mu maverse e kumpala, Yehowa mulee shi: “Ami nenupokyeela. Nekala nshenu.” (2 Beena-Kodinto 6:17, 18) Banda kwela binangu:  Yehowa akulaa bwa nkukalwila na nkufula bu abikitaa nshe baana bwa mwana aye mulume sunga mukashi. Kadi Yehowa akyebe kukumbasha milayilo yaaye nka su tubapele butete booso “bwa mbidi na bwa kikudi.” Kutadiila kiubishi kampanda sunga mwikeelo kampanda wi bubi bwashi witulwishishe kino kipwano kibuwa kyatudi na Yehowa nyi nkukutwa kwa binangu.

22-25. Mayi kinyi a mu Bible akumbeene kwitukwasha bwa kusuuka biubishi na bikitshino bibubi?

²² “Ofule Yehowa Efile Mukulu oobe n’eshimba dyoobe dyooso, na kikudi kyoobe kyooso, mpaa na kinangu kyoobe kyooso.” (Mateo 22:37) Yesu baadi muleshe shi uno mwiya ndjo ukile yooso. (Mateo 22:38) Twi na kya kufula Yehowa. Bwa kumufula n’eshimba dyetu dyooso, na kikudi kyetu kyooso, na kinangu kyetu kyooso abitungu tusuukye bikitshino byooso bikumbeene kutuula muwa wetu mu masaku sunga kulwisha binangu byabadi betupe kwi Efile Mukulu.

²³ “[Yehowa] ngi apeyaa byooso muuwa na bukome, naa bibaashaala byooso.” (Bikitshino 17:24, 25) Muwa nyi nkya buntu ky’Efile Mukulu. Bu byatudi bafule Efile Mukulu, atukyebe kulesha shi atunemeka kya buntu kyaaye. Twi bashikwe biubishi na atupelaa kukita myanda ilombeene kulwisha mbidi yetu, mwanda atuuku shi bino bikitshino abilesha kukutwa kwa kanemo bwa muwa, kya buntu kyabadi betupe.​—Misambo 36:9.

²⁴ “Ofule muntu-noobe buu’be nabeene.” (Mateo 22:39) Misusa ibungi, biubishi bibubi na kukita kwa myanda i butete takulwishaa nkapenda yawa eyikitshi nya, mpa na bantu be pepi naaye. Bu kileshesho, miishi ya nfwanka ngilombeene kulwisha mpa na mbidi ya muntu e pepi na yawa atomo. Muntu alwisha mbidi ya bantu be pepi naye kwete kutupilwa mwiya w’Efile Mukulu wa kufula muntu naaye. Su muntu bakitshi byabya, alesha shi kwete kudimba pamba shi mmufule Efile Mukulu.​—1 Yowano 4:20, 21.

²⁵ ‘Bantu booso bakokyele bakunkushi na basha matalwa.’ (Tite 3:1, Kilombeno kipya) Mu maumbo ebungi, kwikala na angi manga sunga bingi bintu bu kabangi sunga kwiatoma nyi nkutupilwa kwa miiya y’eumbo. Bu byatudi beena Kidishitu, tatwi balombeene kwikala na aa manga sunga kwiatoma nya.​—Beena-Looma 13:1.

26. (a) Bwa kwilama mu kifulo ky’Efile Mukulu, abitungu tukite kinyi? (b) Bwakinyi kwikala betooshe ku meso kw’Efile Mukulu nyi mushindo wibuwa wa kwikala mu nshalelo etu?

 ²⁶ Bwa kwilama mu kifulo ky’Efile Mukulu, abitungu twikale betooshe, ta nkapenda mu mwanda umune utale nshalelo etu nya kadi mu myanda yooso. Kuleka sunga kwitoosha ku kiubishi kibubi na bikitshino bibuwa ta nkubofule nya, kadi muntu mulombeene kobesha. * Eyendo, uno nyi mushindo wi buwa wa kwikala mu nshalelo etu, mwanda Yehowa kwete kwitulongyesha nka bwa buwa bwetu. (Badika Yeeshaya 48:17.) Mwanda wa muulo ukata nguno: su atwitoosha ku butete booso atwikala na muloo awikalaa na muntu kwishimba patuwuku shi tukwete kutumbisha Efile Mukulu etu atudi bafule, na kwilama mu kifulo kyaaye.