1, 2. Nkinyi akikutakula mu kufula Yehowa Efile Mukulu?

WE MUFULE Efile Mukulu su? Su we mupwe kwilambula kwi Yehowa Efile Mukulu, lwalulo loobe ndulombeene kwikala shi oolo​—na binka byabya! Patutala kalolo se twi na kya kufula Yehowa. Su twi bafule Yehowa, tukwete kumwalwisha kifulo kyadi mwitufule. Bible ebilesha kalolo shi: “Atwe twi nee kifulo, mwanda aye ngi baabadidiile kwitufula.”​—1 Yowano 4:19.

² Yehowa babadidiile kwitulesha kifulo kyaaye. Aye nkwitupa nsenga, mbalo ibuwa kushaala. Kwete kwitukwasha bwa kupudisha nkalo yetu ya ku mbidi. (Mateo 5:43-48) Kukila paapa, kwete kwitukwasha bwa kupudisha nkalo yetu ya mu kikudi. Mwitupe Bible, Eyi dyaaye. Na dingi kwete kwituteka bwashi twele nteko kwadi na twikale bashinguule shi kwete kwituteemesha na akyebe kwitupa kikudi kyaaye kiselele bwa kwitukwasha. (Misambo 65:3; Luuka 11:13) Mwanda ukile bukata, Yehowa batumine Mwan’aye aadi mufule bu mulambu bwetu’twe bwa kwitukaasha mu bupika bwa lufu na milwisho. Yehowa mwituleeshe kifulo kikile bukata!​—Badika Yowano 3:16; Beena-Looma 5:8.

3. (a) Abitungu tukite kinyi bwa kwilama mu kifulo ky’Efile Mukulu? (b) Ndukonko kinyi lwa muulo lwatukyebe kutaluula binobino, na mbalo kinyi yatudi balombeene kupeta lwalulo?

 ³ Yehowa akumiina shi tupete kifulo kyaaye bwa looso. Byabya, su atukyebe kupeta kyanka sunga kukutwa, wawa mmwanda witutale atwe banabeene. Eyi dy’Efile Mukulu aditulesha shi: “Elameeyi mu kifulo ky’Efile Mukulu . . . bwa muuwa wa looso.” (Yuude 21, Kilombeno kipya 2009) Mwaku “elameeyi” aulesha shi twi na kya kukita kintu kampanda bwa kushaala mu kifulo ky’Efile Mukulu. Abitungu tuleshe kifulo kyaaye mu mushindo wibuwa. Byabya, lukonko lwi buwa alutungu kwiyipusha nduno, ‘Mmushindo kinyi wandi mulombeene kulesha kifulo kyande bw’Efile Mukulu?’  Lwalulo lwi mu mayi abakwile Yowano mutumibwa ku bukwashi bwa kikudi kiselele shi: “Kifulo ky’Efile Mukulu ki bino: tulame miiya yaaye. Na iinyi miiya yaaye ta mbushito bwitutentekwe nya.” (1 Yowano 5:3) Abitungu tutaluule ano mayi kalolo, mwanda twi na lukalo lwa kulesha Efile Mukulu etu mushindo watudi bamufule.

4, 5. (a) Mwaku “kifulo ky’Efile Mukulu” aulesha kinyi? (b) Lesha bibabangile kifulo kutama mwishimba dyoobe.

⁴ Pabafundile shi “kifulo ky’Efile Mukulu,” Yowano mutumibwa baadi apwandikisha kinyi? Bino bishima tabilesha kifulo kinakyo Efile Mukulu bwetu nya, kadi abilesha kifulo kyatudi nakyo bwaye. Okyotentekyesha nsaa ibabangile kutama kifulo bwa Yehowa mwishimba dyoobe su?

⁵ Banda kwela binangu, mususa wa kumpala ubolongyele bya binyibinyi pabitale Yehowa na mpàngo yaaye na pobobangile kutuula lukumiino mwadi. Bobangile kupusha shi sunga wemutandikye mu milwisho na we kula n’Efile Mukulu, ku bukwashi bwa Yesu Kidishitu, Yehowa mukupe mushindo wa kupeta muwa wa bu muntu mupwidikye na wa looso ubaadi Adame mushimishe. (Mateo 20:28; Beena-Looma 5:12, 18) Bobangile kusangeela bukata bwa mulambu ubaadi utuushe Yehowa paaye kutuma Mwan’aaye a kinemo bwashi etufwile. Eshimba dyoobe dibabangile kusangala, na obe nkubanga kufula Efile Mukulu aye mukuleshe kyakya kifulo.​—Badika 1 Yowano 4:9, 10.

6. Kifulo ky’eyendo akimwekaa naminyi, na kifulo kyobe bw’Efile Mukulu nkikutakule mu kukita kinyi?

⁶ Byabya kwikala na kyakya kifulo, nyi mbangilo a kifulo ky’eyendo kwi Yehowa. Kifulo ta mpenda kupusha mwishimba; ta mpenda kwakula shi nemufule Efile Mukulu nya. Kifulo bw’Efile Mukulu, akilesha myanda ibungi kushii penda kwakula shi: “Nemufule Yehowa.” Anka bi lukumiino, kifulo ky’eyendo akimwenekyelaa ku bikitshino byakituusha. (Jaake 2:26) Misusa ibungi, atuleshaa  kifulo kwi muntu nsaa yatukitshi myanda yadi mufule. Byabya, nsaa ibabangile kifulo bwa Yehowa kutama mwishimba dyobe, kyakya kifulo kibaadi kikutume bwashi wekale na nshalelo mwipushene na myanda ayisangasha Nshobe e mwiyilu. We Temwe mupwe kubatshishibwa su? Su mbyabya, kino kifulo kikata na kululama koobe kwi Yehowa nkukutakule mu kwata kitshibilo kya muulo ukata mu muwa oobe. We mwilambule kwi Yehowa bwa kukita akikyeb’eshimba dyaaye, na kulesha kwilambula koobe ku bukwashi bwa lubatshisho. (Badika Beena-Looma 14:7, 8.) Mayi aalondo abakwile Yowano mutumibwa aakwasha bwa kulombasha kwakwa kwilambula koobe.

7. Teemuna ingi miiya y’Efile Mukulu, na kwiyilama akulesha kinyi?

⁷ Yowano apatuula akilesha kifulo ky’Efile Mukulu shi: “Tulame miiya yaaye.” Miiya y’Efile Mukulu ayilesha kinyi? Yehowa mmwitupe miiya ibungi pabitale myanda kampanda ku bukwashi bwa Bible, Eyi dyaaye. Bu kileshesho, mukandikye mwikelo wi bubi bu kukolwa malofu, lusandji, kulangwila mankishi, kwiba na kudimba. (1 Beena-Kodinto 5:11; 6:18; 10:14; Beena-Efeeze 4:28; Beena-Kolose 3:9) Kulama miiya y’Efile Mukulu akulesha kwikala na nshalelo mwipushene na miiya ya mu Bible pabitale nshalelo a bantu.

8, 9. Mushindo kinyi watudi balombeene kuuka akikyebe Yehowa patufumankana na myanda yabashi betwelele mwiya kampanda mu Bible? Tuusha kileshesho.

⁸ Byabya, bwa kusangasha Yehowa, tabitungu shi twimeene penda mu kukokyela miiya kampanda nya. Yehowa ta mwitupe miiya pabitale ka mwanda kooso katale nshalelo etu a kwifuku n’efuku nya. Byabya, mu nshalelo a efuku dyooso, twi balombeene kufumankana na myanda yabashi beele mwiya kampanda mu Bible. Pabitale uno mwanda, mmushindo kinyi watudi balombeene kuuka bi binangu bya Yehowa? Mu Bible mwi mayi aalesha bi binangu bya Yehowa. Patulongo Bible twi balombeene kuuka myanda yabadi  bafule sunga bashikwe kwi Yehowa. (Badika Misambo 97:10; Myeele 6:16-19) Atushinguula nangunangu na myanda yataa na muulo. Nsaa yatulongo bwa kuuka Yehowa na mashinda aaye, atwikala na mushindo wa kukunkushibwa na binangu byaaye mu bikitshino byetu na patwata bitshibilo. Byabya, sunga twafumankana na mwanda kampanda wabashi betwelele mwiya mu Bible, twi balombeene nsaa yooso kushinguula shi “nkinyi akikyebe Yehowa.”​—Beena-Efeeze 5:17.

⁹ Bu kileshesho, mu Bible ta mwi mwiya awakula pabitale kupela kutala angi ma filme a ku TV aalesha myanda y’etombo sunga ya lusandji. Twi na lukalo na mwiya kampanda autosha kutala bino bintu su? Atuuku bi binangu bya Yehowa pabitale yaaya myanda. Eyi dyaaye aditulungula shi: “[Yehowa] mmushikwe babi na baaba bafule kutomboka.” (Misambo 11:5, Ñono na malango) Adyamba dingi shi: “Efile Mukulu akatshibila bantu basha lukyebanokyebano na baaba abakitshi lusandji kiimu.” (Beena-Ebreeyi 13:4) Patunangushena ano mayi afundjibwe ku bukwashi bwa kikudi kiselele, twi bakumbeene kushinguula akikyebe Yehowa kwatudi. Byabya atupelaa kutala ma filme sunga myanda yabalesha ku Internet sunga ku TV ayilesha myanda yabadi bashikwe kwi Efile Mukulu. Atuuku shi Yehowa akyebe kusangala su tubapele kutala bintu abilesha mwikelo wibubi wabakwete kumona kwi bantu ba uno ndumbulwilo bu bishi bubi. *

10, 11. Bwakinyi atwataa kitshibilo kya kukokyela Yehowa, na kukokyela kwetu kwi naminyi?

¹⁰ Mwanda wa kumpala awitutumaa mu kukokyela miiya y’Efile Mukulu mmwanda kinyi? Bwakinyi twi na lukalo lwa kwikala efuku dyooso na nshalelo mwipusheene na binangu bya Yehowa? Tatusangula yaawa nshalelo bwa kupela kunyokibwa sunga kusuuka masaku akumbeene kufwila baaba bashy’abalondo akikyebe Efile Mukulu  nya. (Beena-Galate 6:7) Kadi, atumonaa shi kukokyela kwetu kwi Yehowa akwitupa mushindo wa kumulesha shi twi bamufule. Anka bi mwana mukinga ekalaa na lukalo lwa kumona shi nshaaye mumufule na mumukumine, atwe namu twi na lukalo lwashi Yehowa etukumine. (Misambo 5:13) Aye nyi Nshetu, na atwe namu twi bamufule. Takwi kintu su nkimune akitupeyaa muloo ukata bu kuuka shi twi na nshalelo mukumbeene kukwasha bwashi ‘Yehowa asangale netu.’​—Myeele 12:2, Ñono na malango.

¹¹ Byabya, tatukokyelaa pa bukopo nya, sunga kusangula miiya ya kukokyela sunga kutuusha kitungo kampanda bwa kukokyela nya. * Tatusangula miiya ya kukokyela, sunga kukokyela nkapenda patumono shi mbilombane sunga shi mbibofule bwetu. Ku lungi lupese, twi “bakokyele n’eshimba dimune.” (Beena-Looma 6:17) Atupusha nka bibaadi byambe ungi mufundji a misambo shi: “Naapusha mwenyi wa mayi oobe, ne mwiafule ngofu.” (Misambo 119:47) Oolo, twi bafule kukokyela Yehowa. Atushinguula shi aye mmulombane bwashi tumukokyele mu byooso kushi kitungo kampanda na dingi etutekye bwashi twibikite. (Miiya Ikituulwe 12:32) Atukyebe bwashi Yehowa ambe bwetu bu bibambile bwa Nowa Mwiyi dyaye. Nowa baadi mufubi a Yehowa baadi muleshe shi mumufule mwanda baadi mumukokyele munda mwa bipwa makumi. Bible amba pabitale Nowa shi: “Kyakya ngi kibaakitshine Nowa, aye nkukita nka byabya bibamufundile Efile Mukulu.”​—Kibangilo 6:22.

12. Kukokyela kwetu kwi Yehowa akusangasha eshimba dyaaye nsaa kinyi?

¹² Yehowa apushaa bikunyi patumukokyela n’eshimba dimune? Eyi dyaye adyakula shi patukitshi byabya ‘atusangasha eshimba’ dyaye. (Myeele 27:11) Kukokyela kwetu  akusangasha binyibinyi eshimba dya Nfumu mukile booso mwiyilu na pa nsenga su? Oolo, na bi na kya kwikala byabya! Yehowa mwitupangye na bulungantu bwa kwisangwila. Bino abipatuula shi twi na bulungantu bwa kwisangwila; twi bakumbeene kusangula kukokyela Efile Mukulu sunga kupela kumukokyela. (Miiya Ikituulwe 30:15, 16, 19, 20) Su tubaata kitshibilo kya kukokyela Yehowa n’eshimba dimune na su akitutumu mu kukokyela nyi eshimba diule na kifulo kyatudi bafule Efile Mukulu, atusangasha Nshetu a mwiyilu ngofu na kumupa muloo. (Myeele 11:20) Byabya tubasangula nshaleelo ebuwa.

13, 14. Bwakinyi twi balombeene kwamba shi “miiya y’Efile Mukulu ta mbushito bwitutentekwe,” na nkileshesho kinyi akilesha byanka?

¹³ Yowano mutumibwa etulungula mwanda awitunyingisha ku mashimba pabitale myanda ayitutekye Yehowa: “Miiya yaaye ta mbushito bwitutentekwe nya.” Mu ungi Bible mbaluule bino bishima shi: “Inyi milangilo tangikambe bukopo kwatudi ooo.” (Kilombeno kipya) Miiya ya Yehowa tangikile bukopo nya. Sunga bantu bashi bapwidikye mbakumbeene kobesha kulama miiya yaaye.

¹⁴ Twate kileshesho: Kuuk’oobe a p’eshimba bakulungula shi akyebe omukwashe ku mudimo waye wa kwibaka nshibo. E na bintu bibungi abitungu kusemuna. Bingi bintu mbipelepele bwa muntu umune kutwala kushii lukalakasho, kadi bingi namu bi bushito abitungu bantu babidi bwa kwibisemuna. Kuuk’obe basangula bintu bya kumiina shi osemune. Mukumbeene nkuteka bwashi osemune bintu byauku shi mbikukile bushito su? Nya. Ta mulombeene kukumina shi akukyengyeshe pa nkusemusha bintu bikile bushito nya. Bi mumune, Efile Mukulu etu sha kifulo na kalolo ta mmulombeene kwituteka bwashi tulame miiya itukile bukopo nya. (Miiya Ikituulwe 30:11-14) Ta mukumbeene kukumiina shi otwale kyakya kiita ki bushito. Yehowa auku  pafudiile bukome bwetu, mwanda “awuku kalolo kyaakya kyabadi beetubumbe nakyo, mmushinguule shi twi lufuufi.”​—Misambo 103:14.

15. Bwakinyi twi bakumbeene kukulupila shi miiya ya Yehowa i nkapenda bwa buwa bwetu?

¹⁵ Miiya ya Yehowa tangilombeene kwikala bu bushito bwitutentekwe nya; i kwanka bwa buuwa bwetu. (Badika Yeeshaya 48:17.) Moyiise balungwile beena Isaleele shi: “Yehowa mmwitutumine eyi dya kukumbasha ino miiya yooso naa dya kutshiina Yehowa Nfumu Efile Mukulu eetu, bwa’shi twikale na mwabi [biya, NWT] mafuku ooso, naa bwa’shi eetulame na muuwa buu byatudi leelo.” (Miiya Ikituulwe 6:24) Atwe namu twi balombeene kukulupila shi p’etupa miiya yaaye, Yehowa akimbi buwa bwetu​—akyebe shi twikale biya mu mafuku e kumpala na tupete muwa wa looso. Eyendo, Efile Mukulu akimbi nkapenda buwa bwetu. Yehowa nyi Efile sha binangu bishi na nfudiilo. (Beena-Looma 11:33) Byabya aye auku kikumbeene kwikala bwa buwa bwetu. Na dingi Yehowa nyi kileshesho kikata kya kifulo. (1 Yowano 4:8) Kifulo, eyikashi dyaye dikata, nyi akimutuma bwa kwakula na kukita kyooso kyakitaa. Miiya yaaye yooso yaadi mwelele bafubi baaye mwiyele na kifulo.

16. Sunga myanda ibubi ya uno ndumbulwilo na mbidi yetu ikutwe kupwidika abitutakula mu kukita bubi, bwakinyi twi balombeene kwikala na nshalelo a kukokyela?

¹⁶ Bino tabilesha shi kukokyela Efile Mukulu nkubofule nya. Abitungu tulwe ngoshi na myanda ibubi ayitutumu uno ndumbulwilo mu kukita. Mwanda uno ndumbulwilo e “ku matalwa a mubi.” (1 Yowano 5:19) Abitungu dingi kulwa ngoshi na mbidi yeetu ishi ipwidikye, ayitutumu nka mu kutupilwa miiya y’Efile Mukulu. (Beena-Looma 7:21-25) Kadi kifulo kyatudi nakyo bw’Efile Mukulu nkilombeene kwitukwasha bwa kobesha. Yehowa elaa myabi kwi baaba abakumina kumukokyela bwa kulesha shi mbamufule. Apeyaa “bano abamukookyela” kikudi kyaaye kiselele. (Bikitshino 5:32) Kino kikudi akitusha mwatudi kikuba kibuwa​—ngikashi  ikumbeene kwitukwasha bwa kwikala na nshalelo a kukokyela.​—Beena-Galate 5:22, 23.

17, 18. (a) Mu uno mukanda atukyebe kutaluula myanda kinyi, na patutaluula yaaya myanda nkinyi kyatusha kuluba? (b) Nkinyi kyatukyebe kumona mu shapitre alondo?

¹⁷ Mu uno mukanda, atukyebe kutaluula mayi na miiya ya Yehowa na ingi myanda yooso ayilesha akikyebe eshimba dyaaye. Patutaluula ino myanda, abitungu shi tatulubanga ingi myanda ya muulo. Tatulubanga shi Yehowa tetutakula pa bukopo bwashi tulonde mayi na miiya yaaye nya; akyebe shi tumukokyele n’eshimba dyetu dimune. Tatulubanga dingi shi Yehowa etutekye bwashi twikale na nshalelo mukumbeene kwitutwadila myabi binobino mpa na muwa wa looso mu mafuku e kumpala. Tumone kukokyela kwetu n’eshimba dimune bu mushindo wibuwa watudi balombeene kulesha Yehowa shi twi bamufule ngofu.

¹⁸ Bwa kwitukwasha bwashi tushinguule buwa na bubi, Yehowa mwitupe kondo k’eshimba. Kadi bwashi ketukunkushe kalolo, abitungu shi kondo ketu k’eshimba kalongyeshibwe, bu byatukyebe kwibimona mu shapitre alondo.