1. Yehowa akakaa bantu be naminyi kwadi, na bwakinyi abitungu shi bekale bapasukye mu kikudi?

YESU bambile shi: “Abalangwila Yaya kwi balangwidi ba binyibinyi, mu kikudi na mu binyibinyi; mwanda baaba ngi balangwidi abakimbi Yaya.” (Yowano 4:23) Nsaa ayipete Yehowa bantu be byabya​—bu byodi’be—​ebakaka kwadi na kwi Mwana aaye. (Yowano 6:44) Kino nyi nkinemo kikata! Kadi, baaba bafule bya binyibinyi bya mu Bible, be na kya ‘kushinguula byabya abisangasha Mwanana,’ mwanda Satana nyi nsha madimi mukata.​—Beena-Efeeze 5:10; Bifumbulwe 12:9.

2. Patuula mushindo aumonaa Yehowa baaba abasaanga lulangwilo lwa binyibinyi na lwi bubi.

² Twate kileshesho kya mwanda ubaadi ukitshikye ku Mwengye wa Sinaayi pabaadi beena Isaleele batekye Aarone bwashi ebakitshine efile. Aarone bakuminyine aye nkukita kaana ka ngombe ka oòlo aye nkwamba shi akalesha Yehowa. Bambile shi: “Maalooba, nyi musangeelo bwa Yehowa.” Yehowa baadi mulenguule uno mwanda ubabakitshine paabo kusangisha lulangwilo lwi buwa na lwi bubi su? Nya. Bayipayiishe bantu pepi na binunu bisatu abaadi balangwile nkishi. (Efilu 32:1-6, 10, 28) Uno mwanda awitulongyesha kinyi? Su twi na lukalo lwa kwilama mu kifulo ky’Efile Mukulu, abitungu shi “tatukumanga kintu su nkimune ki butete” na kupela n’eshimba dimune kusangisha bya binyibinyi na kintu kyooso kilombeene kwibilwisha.​—Yeeshaya 52:11, NWT; Ezekyele 44:23; Beena-Galate 5:9.

3, 4. Bwakinyi abitungu shi twikale atutaluula mayi a mu Bible kalolo nsaa yatutala bipikwa na ma feete apalakane lelo uno?

³ Mwanda wa malwa, kunyima kwa lufu lwa batumibwa, abo abaadi abakitshi mwabo mooso bwa kukanda kusumbula kwa lukumino,  bantu abaadi abeamba bu beena Kidishitu bashi baadi bafule bya binyibinyi ababangile kukumiina bipikwa bya ba mpangano, ma feete sunga mafuku abataa bu “eselele” na abadi bekashe bu a bwina Kidishitu. (2 Beena-Tesalonika 2:7, 10) Potala angi a ku ano ma feete, okyebe kumona mushindo wa akwete kulesha kikudi kya pano pa nsenga, kushi kikudi ky’Efile Mukulu. Nsaa ibungi, ma feete sunga misangeelo ya pano pa nsenga ngipusheene ku mwanda umune: Akwete kusankisha ngabi ya mbidi, aatakula bantu mu kulonda malongyesha a bipwilo bya madimi na malenganyi​—myanda ayilesha “Babilone Mukata.” * (Bifumbulwe 18:2-4, 23) Na dingi, tatulubanga shi Yehowa aye nabeene baadi mumone bibabangile bino bipikwa byooso bibubi bi mu ma feete e kwanka lelo uno. Kushi mpaka mpa na lelo uno, aa ma feete akwete kulwiisha eshimba dyaaye. Tabitungu shi mweneno aaye ekale na muulo ku meso kwetu su?​—2 Yowano 6, 7.

⁴ Bu byatudi beena Kidishitu, atuuku shi angi ma feete ta asangasha Yehowa nya. Kadi abitungu twikale na kitshibilo mu mashimba etu bwashi tatwisanganga mu ano ma feete nya. Kutaluula bwa kuuka bwakinyi Yehowa mmushikwe ano ma feete akukyebe kunyingisha kitshibilo kyetu kya kupela kukuma kintu kyooso kikumbeene kwitukutshisha kwilama mu kifulo ky’Efile Mukulu.

5. Bwakinyi twi balombeene kwamba shi Yesu tabaadi mutandjikye mwifuku dya 25 mu mweshi w’Ekumi na wa kabidi?

⁵ Bible tesaambila pabitale feete a efuku dya kutandjikwa kwa Yesu nya. Na dingi, efuku dibaadi mutandikwe tadiukibwa kalolo nya. Kadi, abitungu tuukye shi tabaadi mutandjikye mwifuku dya 25 mu mweshi w’Ekumi na wa kabidi nya, kipungo akiikalaa mashika akile mu dyadya eumbo. * Kya kumpala, Luuka bafundjile shi pabaadi Yesu mutandjikye, “balami ba mikooko babaadi  bashaale mu mapya” balamanga mikooko yaabo. (Luuka 2:8-11) Su bantu abaadi ‘abashaala mu mapya’ munda mwa kipwa kishima, byabya tabibadya kwikala mwanda nya. Kadi, bu bi mu Beeteleeme amwikalaa mashika ngofu na mpeshi anokaa ngofu mu aa mafuku, abaadi abalama mikooko mu mbalo ifwame na balami ba mikooko tababaadi balombeene ‘kushaala mu mapya nya.’ Na dingi, Yoosefe na Mariya abayile ku Beeteleeme mwanda Keezare Oguste baadi mutume eyi bwashi bantu babadikibwe nfishi. (Luuka 2:1-7) Tatwi balombeene kupwandikisha shi Keezare baadi mukumbeene kuteka bantu bwashi bende ku bibundji bya kwabo bwa kubadikwa nfishi aku namu tababaadi bafule Bufumu bwa beena Looma.

6, 7. (a) Bipikwa bya Nowele abifiki kunyi? (b) Nkwilekeena kinyi kwi pankatshi pa ma kado a Nowele na mushindo awipeshenaa beena Kidishitu bintu?

⁶ Feete a Nowele tafiki mu Bifundwe nya, afiki mu ma feete a ba mpangano, bu kileshesho feete a Saturnales, baadi beena Looma abakitshina Saturne, efile a ba kidime. Ungi mukanda (New Catholic Encyclopedia) awamba shi muyiile bibabadi ababadika mafuku, balangwidi ba Mithra abaadi abakitshi feete mwifuku dya 25 dya mweshi w’Ekumi na wa kabidi bu “efuku dya kutandikwa kwa nguba abashi balombeene kutshokola.” “Nowele babangile mu mafuku abaadi lulangwilo lwa nguba ndupalakane ngofu mu Looma,” bipwa pepi na nkama isatu kunyima kwa lufu lwa Kidishitu.

⁷ Mu aa ma feete abo, ba mpangano abaadi abepeshena ma kado na kudya ngofu​—myanda yabakitaa mu Nowele mpa na bu lelo. Anka bu byabidi lelo uno, ma kado a Nowele ta ngepusheene na mukanda wa 2 Beena-Kodinto 9:7, awamba shi: “Ooso muntu atuushe muyiile kitshibilo kya mwishimba dyaaye, kushi kinyongwa sunga ku bukopo, mwanda Efile Mukulu mufule apanaa na muloo.” Beena Kidishitu ba binyibinyi abepeshenaa bintu na kifulo kyooso, tabatengyelaa nkapenda mwifuku kampanda nya, na tabatengyelaa shi pabapana, bantu bebape namu nya. (Luuka 14:12-14; badika Bikitshino 20:35.) Na dingi, be na muloo byabashi mu bupika bwa nkalakasho itale myanda ya Nowele na mabaasa abataa kwi bantu mu aa mafuku.​—Mateo 11:28-30; Yowano 8:32.

8. Baasha-binangu abatalaa nyenyenyi abaadi bape Yesu ma kado a efuku dya kutandjikwa kwaye su? Patuula.

 ⁸ Kadi, bangi mbalombeene kwamba shi, se baasha-binangu abatalaa nyenyenyi abaadi bape Yesu ma kado a efuku dya kutandjikwa kwaye? Nya. Kado kababadi bamupe kabaadi akalesha kinemo kibabadi abapa muntu mukata, bu bibaadi kipikwa mu aa mafuku a kala. (1 Banfumu 10:1, 2, 10, 13; Mateo 2:2, 11) Na dingi, tababaadi bafikye mu bufuku bubatandjile Yesu nya. Yesu tabaadi mwana tooka mu kidiilo kya nyema nya, baadi mupwe kukita myeshi ibungi na babamupetele mu nshibo.

9. Nkinyi kibaadi kikitshikye mu ma feete a mafuku a kutandjikwa abadi besambile mu Bible?

⁹ Sunga byekala shi kutandjikwa kwa mwana nyi mmwanda wa muloo ukata, Bible t’esambila pabitale feete su ngumune a efuku  dya kutandjikwa kwa mufubi a Efile Mukulu nya. (Misambo 127:4) Twi kwamba shi ndulengu lwabo su? Nya, mwanda Bible esambila pabitale ma feete abidi a efuku dya kutandjikwa​—kwa Faraone a mu Ejipitu na kwa Erode Antipase. (Badika Kibangilo 40:20-22; Maako 6:21-29.) Kadi, ano ma feete ooso abidi mbealeshe bu bileshesho bi bubi​—bikishekishe feete a Erode, mu babatshibile Yowano Mubatshishi mutwe.

10, 11. Mushindo kinyi ubaadi beena Kidishitu ba kumpala abamono ma feete a efuku dya kutandjikwa, na bwakinyi?

¹⁰ Ungi mukanda (The World Book Encyclopedia) awamba shi: “Beena Kidishitu ba kumpala abaadi abamono shi kukita feete a efuku dya kutandjikwa kwa muntu nyi nkipikwa kya ba mpangano.” Bu kileshesho, beena Greeke ba kala, abaadi abapwandikisha shi muntu ooso e na kikudi akimulamaa akipetekyelwa pa kutandjikwa kwa muntu na akitungunukaa na kumulama. Mukanda  wa Bipikwa bya kala pabitale mafuku a kutandjikwa (mu Anglais) awamba shi kyakya kikudi “ki mu kipwano na efile kampanda baadi mutandjikye efuku dimune na yawa muntu.” Kubanga kala, ma feete a efuku dya kutandjikwa ngepusheene na myanda ya malenganyi a bantu abalongaa mushindo wi nyenyenyi na bingi bintu bi mwiyilu na bibabidi nsaa ibaadi itandikye muntu bwa kubuka myanda ayifiki kumpala.

¹¹ Bafubi ba Yehowa ba kala tababaadi abapele kukita ma feete a efuku dya kutandjikwa nkapenda mwanda shi ngafikye ku bipikwa bya ba mpangano na myanda ya malenganyi nya, abaadi abapele dingi mwanda wa kulonda mayi a mu Bifundwe. Bwakinyi? Abo abaadi bantu baasha kwiyisha na kwidinga, tababaadi abaata kutandjikwa kwabo bu kintu ki na muulo ukata akitungu kukitshina feete nya. * (Mika 6:8; Luuka 9:48) Sunga mbyabya, abaadi abatumbisha Yehowa na kumutumbula bwa kya buntu kya muwa. *​—Misambo 8:4, 5; 36:10; Bifumbulwe 4:11.

12. Bwakinyi efuku dya lufu lwetu di na muulo kukila efuku dyetu dya kutandjikwa?

¹² Ku lufu lwa bantu booso balame kululama kwabo, abashaala mu binangu by’Efile Mukulu, na muwa wabo wa mafuku aafiki wi mu maboko aaye. (Yoobo 14:14, 15) Mukanda wa Mulungudi 7:1 awamba shi: “Nkumo i na muulo ukile wa mwimu wibuwa, na efuku dya lufu ndikile efuku dya kutandikwa.” Ino “nkumo” yetu nyi eshina dibuwa dyatudi bapete pa’twe kufubila Yehowa na kululama kooso. Nyi bwa kinyi, kwi nkapenda musangeelo umune wabadi batekye beena Kidishitu bwa kukita, ushi utale kutandjikwa kwa Yesu kadi lufu lwaye, aye e na “eshina” aditupa kipandjilo.​—Luuka 22:17-20; Beena-Ebreeyi 1:3, 4.

13, 14. Bwakinyi kukita kwa feete a Pasaka takwi buwa bwa beena Kidishitu?

¹³ Pasaka nyi feete akitaa baaba abeamba shi mbeena Kidishitu bwa kutentekyesha kusanguka kwa Kidishitu ku bafwe. Kadi Kidishitu baadi mutekye balongi baaye bwashi batentekyeshe kusanguka kwaye su? Nya. Mikanda ya myanda ya kala ayilesha shi beena Kidishitu ba kumpala tababaadi abakitshi feete a Pasaka nya na dingi nyi shi uno feete mufikye mu bipikwa bya ba mpangano. Ungi mukanda (The Encyclopœdia Britannica) awamba shi: “Mu Kilombeeno Kipya tamwi mbalo sunga ngimune yabadi besambe pabitale feete a Pasaka nya. . . . Bwiselele bwa angi mafuku tabubaadi mu binangu bya beena Kidishitu ba kumpala nya.”

¹⁴ Yehowa baadi mulombeene kukumina shi batentekyeshe kusanguka kwa Mwana aaye mu feete afiki mu bipikwa bya ba mpangano su? Nya! (2 Beena-Kodinto 6:17, 18) Na dingi, Bifundwe tambitekye sunga kupa bantu matalwa a kutentekyesha kusanguka kwa Yesu su mbalo imune nya. Byabya, kukita feete a Pasaka bwa kutentekyesha kusanguka kwa Yesu nyi nkukutwa kwa kululama.

15. Bwakinyi feete a bunane te buwa bwa bafubi b’Efile Mukulu?

¹⁵ Mu bipikwa bya kala bya ba mpangano mwi ma feete a bunane sunga kipwa kipya. Efuku na myanda ayikitaa bantu mu ma feete a Bunane mbilekeene muyiile eumbo n’eumbo. * Ungi mukanda (Standard Dictionary of Folklore, Mythology, and Legend) aulesha shi: “Mu maumbo ebungi a ku Mputu abasangeelaa kukila kwa kipwa na kufika kwa kipwa kipya na ma feete akata, kutoma kwa malwa ebungi, na misango ibungi abakitaa myanda ya buufu.” Wawa mukanda umune aulesha shi mu angi  maumbo namu “abamonaa kupwa kwa kipwa na kubanga kwa kingi kipwa bu nsaa ya muloo.” Kadi, mu Beena-Looma 13:13 atupete dino elango: “Twikaleeyi na bwikashi bwibuwa, bu bantu be mwitaata, kushii budyedye sunga buntomi, kushi lukyebanokyebano sunga miloo ibubi, kushi tulee sunga mikao.”​—1 Mpyeele 4:3, 4; Beena-Galate 5:19-21.

16, 17. (a) Bwakinyi abitungu shi bantu abakyebe kwiyibakishena bataluule bipikwa bya mbalo yabadi bashaale muyiile mayi a mu Bible? (b) Bwa bipikwa bu kipikwa kya kwasa bantu mupunga sunga bingi bintu bu tusaki tupelatupela twa malangi elekene pa mbidi, abitungu beena Kidishitu bataluule mwanda kinyi?

¹⁶ Ma feete a dibaka mwabakitshi myanda ya malenganyi ya mu Babilone Mukata ta eselele ku meso kw’Efile Mukulu nya. (Maako 10:6-9) Nyi bwakinyi mukanda wa Bifumbulwe 18:23 awamba shi: “Eyi dya nsongwalume mwibakile na dya mwina-kwaye taabeedipusha dimo kwobe [Babilone Mukata] nya.”

¹⁷ Bipikwa bitale mabaka mbilekeene muyiile eumbo n’eumbo. Bingi bipikwa abimwenekaa bu bishi bubi mbilombeene kwikala abifiki ku bipikwa bya beena Babilone bwa kwabikiisha bano abeyibakishena na bangi bafikye ku dibaka “mwabi.” (Yeeshaya 65:11, NWT) Kingi kipikwa kya wawa mushindo nyi nkipikwa kya kwasa bantu mupunga sunga bingi bintu bu tusaki tupelatupela twa malangi elekene pa mbidi. Bi kwikala shi kino kipikwa akifiki ku kinangu kyashi bya kudya abifukamishaa mashimba a bikudi bibi na kwibikutshisha kukita bano abeyibakishena bubi. Na dingi, kubanga kala mu maumbo ebungi bantu abapwandikisha shi mupunga aukwasha muntu bwashi atande, ekale na muloo, na ayishe na muwa. Byabya, booso abakyebe kwilama mu kifulo ky’Efile Mukulu be na kya kushikwa bino bipikwa.​—Badika 2 Beena-Kodinto 6:14-18.

18. Mayi kinyi a mu Bible alombeene kukunkusha mulume na mukashi abelumbuula bwa kukita feete a dibaka na baaba babetamina ku feete?

¹⁸ Bafubi ba Yehowa dingi abapelaa kukita bipikwa bipalakane pa nsenga bilombeene kulwisha dibaka dyabo sunga kinemo kya feete a dibaka dya beena Kidishitu sunga bilombeene  kulwisha mashimba a bangi bantu. Bu kileshesho, abapelaa kwakula miisambo i na mayi ebubi akumbeene kutapa bantu ku mashimba sunga atale myanda ya kusangisha mbidi na kupela miseku ikumbeene kupa bano abeyibakishena buufu sunga bangi bantu. (Myeele 26:18, 19; Luuka 6:31; 10:27) Abapelaa dingi kukita feete a dibaka mukilekile bukata shaleesha kwidinga, kadi alesha “lwabi lwa kwisadikila mu bupeta.” (1 Yowano 2:16) Su okwete kwilumbuula bwa kukita feete a dibaka, tolubanga shi Yehowa akumina shi dyadya efuku dikata dikale efuku dyodya kutentekyesha na muloo kushii kwinyongola. *

19, 20. Ungi mukanda aulesha kinyi pabitale kipikwa kya kwikoposhena kwa bilawudi kumpala kwa kutoma malwa, na bwakinyi kyakya kipikwa ki bubi bwa be na Kidishitu?

¹⁹ Kingi kipikwa kipalakame mwi bantu bebungi nsaa ya feete a dibaka nyi nkwikoposhena bilawudi kumpala kwa kutoma malwa. Ungi mukanda (International Handbook on Alcohol and Culture) ubaadi utuukye mu 1995 awamba shi: “Abimweneka shi kipikwa kya kwikoposhena kwa bilawudi kumpala kwa kutoma malwa . . . nyi nkipikwa kibaadi kwanka kala kya kupongoola bintu mu nsenga bwa kwibilambula b’efile . . . bwashi bebelele mwabi, bu abeele luteko na kwambanga shi ‘ikala na muwa!’ sunga shi ‘wekale mbidi bukome!’”

²⁰ Eyendo shi, bantu bebungi tabamonaa kwikoposhena kwa bilawudi kumpala kwa kutoma malwa bu kipikwa akifiki ku bipwilo bya madimi nya. Kadi, kiubishi kya kwela kilawudi kya nfinyo mwiyilu nkilombeene kwikala bu kuteka kwa mwabi aufuki “mwiyilu” mu mushindo ushi wipusheene na abyamba Bifundwe.​—Yowano 14:6; 16:23. *

21. Sunga ta ngatukile mu bipwilo bya madimi, ma feete kinyi alombeene beena Kidishitu kushikwa, na bwakinyi?

²¹ Bi mwikeelo wa bantu ukwete kwenda na kulwila​—mwikeelo wabebatumu kwi Babilone Mukata sunga washi mutoshe—​maumbo ebungi akwete kukitshisha ma feete akata. Mu aa ma feete bantu abendaa na kusha mu bilayi. Abashiyaa masha aasanyisha mbidi mu mushindo wi bufu na aalesha myanda ya bantu abalalaa na balume na’bo sunga na bakashi na’bo. Mbilombeene kwikala buwa su muntu ‘mufule Yehowa’ enda ku aa ma feete sunga kwiatala mu mushindo kampanda su? Paakitshi byabya, mukumbeene kulesha shi mushikwe bubi su? (Misambo 1:1, 2; 97:10) Se mwanda wibuwa bwikashaa su alonda binangu bya mufundji a misambo batekyele shi: “Kumba meso ande ku bintu bya-bisumanga”!​—Misambo 119:37.

22. Nsaa kinyi ilombeene mwina Kidishitu kwata kitshibilo pabitale kondo kaaye k’eshimba su mulombeene kwenda ku feete sunga kukutwa?

²² Mwifuku dya feete shii buwa bwa beena Kidishitu, mwina Kidishitu e na kya kwikala mudimukye bwashi takitanga kintu kampanda kilombeene kulesha shi kwete kwisanga mu yawa feete. Mpoolo bafundile shi: “Sunga nwadya, sunga nwatoma, sunga nwakita kinyi, kitaayi byooso bwa ntumbo y’Efile Mukulu.” (1 Beena-Kodinto 10:31; tala kashibo “ Mushindo wa kwata bitshibilo bi buwa.”) Byabya, su kipikwa sunga feete te na kwipushena kampanda na bipwilo bya madimi, ta mutale myanda ya politike sunga ma feete a bisamba, na takwete kutupilwa miiya ya mu Bible, mwina Kidishitu e na kya kwata kitshibilo aye nabeene su mulombeene kwenda ku yawa feete sunga kukutwa. Mulombeene dingi kutaluula bilombeene kupusha bangi bwa kupela kwibaponesha.

23, 24. Mushindo kinyi wa kupatulwila bantu bi miiya ya Yehowa?

²³ Bantu bebungi abamonaa mafuku a angi ma feete bu nsaa ilombeene kifuko sunga bakuuku kwibunga pamune. Byabya, su  muntu apwandikisha shi mpushisho etu a Bifundwe mukile bukopo sunga shi e bubi, twi balombeene kumupatulwila na kanemo kooso shi Batemwe ba Yehowa abanemekaa ma feete a bakitshi kalolo mu kifuko sunga kwi bakuuku baabo. (Myeele 11:25; Mulungudi 3:12, 13; 2 Beena-Kodinto 9:7) Atwisangaa pamune na bakwetu batudi bafule mu bingi bipungo bya mu kipwa. Kadi, pa mwanda wa kifulo kyatudi nakyo bw’Efile Mukulu na bwa miiya yaaye, tatukumina kulwisha yaaya mbalo ya muloo na kipikwa akilwisha eshimba dyaaye nya.​—Tala kashibo “ Lulangwilo lwa binyibinyi alutuushaa muloo.”

²⁴ Bangi Batemwe mboobeshe kupatulwila bantu abebepusha myanda i mu shapitre 16 a mukanda wa A nkinyi akilongyesha namu Bible? * Tentekyesha shi, lukalo lwetu ndwa kukuma bantu ku mashimba ta ndwa kwikakena nabo nya. Byabya, ikala na kanemo, lama lwishinko, na ‘bishima byobe bikale nguba ooso bibuwa, bi mwenyi.’​—Beena-Kolose 4:6.

25, 26. Mushindo kinyi ulombeene baledi kukwasha baana baabo bwa kukula mu lukumino na kufula Yehowa?

²⁵ Bu byatudi bafubi ba Yehowa, twi balongyeshibwe kalolo. Atuuku bwakinyi twi bakumine na atukitaa ingi myanda na kupela kukita ingi. (Beena-Ebreeyi 5:14) Byabya anwe baledi, longyeshayi baana benu bwa badya kwikala abeele binangu muyiile mayi a mu Bible. Nsaa yanukitshi byabya, nukwete kunyingisha lukumino lwabo, anwibakwasha bwa badya kwikala abatuusha myalulo ayitukila mu Bifundwe kwi baaba abebeele nkonko itale lukumino lwabo, na kwibalesha shi Yehowa mwibafule.​—Yeeshaya 48:17, 18; 1 Mpyeele 3:15.

²⁶ Booso bakwete kulangwila Efile Mukulu “mu kikudi na mu binyibinyi” abapelaa kukita ma feete ekutwene na Bifundwe na dingi abakitaa mwabo mooso bwa kwikala balulame mu myanda yooso ya mu nshalelo aabo. Lelo uno bantu bebungi abamonaa shi kwikala muntu mululame ta kwi na bukwashi su mbumune nya. Anka bu byatukyebe kwibimona mu shapitre alondo, mashinda a Efile Mukulu aekalaa nka e buwa.