APANDISE
Mushindo wa kukambila kiubishi kya kufinafina bipindji bya mbidi bya buufu
Kiubishi kibubi kisha kisangasha Efile Mukulu, nyi nkufinafina kwa bipindji bya mbidi ya buufu mwanda akulesha muntu akyebe penda kwisangasha aye nabeene na akulwisha binangu bya muntu. Muntu kwete kufinafina bipindji bya mbidi ya buufu mulombeene kubanga kumona bangi nka bu bintu byadya kupudisha nabyo lukalo lwa kusangisha mbidi. Abanga kumona shi kusangisha mbidi ta nkintu ki kwanka bwa kulesha kifulo pankatshi pa mulume na mukashi nya, kadi bu kufumankana kwa bantu babidi bwa penda kupudisha lukalo lwa kusangisha mbidi. Kadi kwakwa kwisankisha nkwa penda kapindji kapeela. Mu bya binyibinyi, yawa muntu pamutwe pa kwipaa bipindji byaye bya mbidi pabitale kukita “lukyebanokyebano, myanda ibutete, lwabi lwi bubi, kifulo kya myanda ibubi [ya kusangisha mbidi],” kwete kufinafina bipindji byaye bya mbidi bwa kwibwesha aa malaka.—Beena-Kolose 3:5, Kilombeno kipya.
Mpoolo mutumibwa bafundjile shi: “Anwe bande ba kifulo kikata, . . . twitoosheeyi’twe banabeene ku butetete booso bwa mbidi na bwa kikudi; tukimbeeyi bya kwikita beeselele, tutshiin’Efile Mukulu.” (2 Beena-Kodinto 7:1) Su kulonda kwa uno mwiya akukwikeela bukopo, tokumanga kupwandikisha shi takwi kya kukulupila nya. Yehowa ekalaa “na lusa” na ekwanka bwa nkukwasha. (Misambo 86:5; Luuka 11:9-13) Eyendo shi mushindo ukwete nkutopeka eshimba dyoobe na okwete kwitatshisha bwa kukambila kino kiubishi sunga byokwete kupona mu kyanka ingi nsaa aulesha shi we na binangu bibuwa. Shinguula dingi shi, “Efile Mukulu mukile mashimba etu ku bukata na’shi mmupatuule byooso.” (1 Yowano 3:20) Efile Mukulu amonaa kukila milwisho; amonaa bi muntu aye ooso. Bu byauku myanda yetu yooso mukumbeene kwituula pa mbalo yetu bwa kwitufwila lusa. Tokumanga kukooka kwialusha kwi Efile Mukulu mu luteko, anka abikalaa mwana asuukila kwi nshaaye nsaa yaadi na lukalakasho. Yehowa akyebe nkupa kondo k’eshimba kasha kakutopeka. (Misambo 51:1-12, 17; Yeeshaya 1:18) Eyendo, abitungu okite myanda ipushene na nteko yoobe. Bu kileshesho, abitungu wetatshishe bwa kupela mishindo yooso ya pornografi mpa na bakuuku bebubi. *
Su lukalakasho loobe bwa kupudisha kiubishi kya kufinafina bipindji bya mbidi bya buufu lukyalutungunuka, esambe na muledi mwina Kidishitu sunga ungi mwina Kidishitu munyingye mu kikudi sunga na kuuku oobe a p’eshimba. *—Myeele 1:8, 9; 1 Beena-Tesalonika 5:14; Tite 2:3-5.
^ par. 2 Bwa kwata kitshibilo kibuwa, we mulombeene kutaluula mushindo oobe wa kutumika na ordinatere a ku nshibo. Mu mashibo ebungi abamutulaa pa mbalo ayimono bantu booso. Na dingi, mu angi mashibo abaulaa ma programe a mu ordinatere aakwasha bwa kupela kufungula mbalo i bifwatulo bibubi. Sunga mbyabya, ta kwi programe su ngumune atudi balombeene kutudila lukulupilo nya.
^ par. 1 Pabitale angi malango a kumona bya kupudisha kiubishi kya kufinafina bipindji bya mbidi bya buufu, tala mwisambo wi mu Réveillez-vous! a mweshi w’Ekumi na umune 2006 awamba shi “Les jeunes s’interrogent . . . Comment vaincre cette habitude?” na wi mu mukanda wa Les jeunes s’interrogent—Réponses pratiques, Volime 1, mwisaki 178-182.
