Kutshibila ebendela mpala. Batemwe ba Yehowa abauku shi kukunamina ebendela sunga kwiditshibila mpala, bikishekishe nsaa yabayimbi loono lw’eumbo, nyi ndulangwilo na mmwanda aulesha shi bantu abatengyela kipandjilo kwi bakata beumbo pamutwe pa kwikikimba kwi Efile Mukulu. (Yeeshaya 43:11; 1 Beena-Kodinto 10:14; 1 Yowano 5:21) Ungi nfumu baadi byabya nyi Nfumu Nabukodonosore a mu Babylone a kala. Bwa kulesha bantu bukata bwa bufumu bwaye na katshintshi kaaye mu lulangwilo, uno nfumu mukata baadi mukitshishe nkishi mukata aye nkulungula bantu baaye bwabadya kumukunamina nsaa yabapusha mizike, bu byabayimbaa loono lw’eumbo. Byabya, bansongwalume basatu beena Ebreeyi​—Shadrake, Meshake, na Abede-Nego, abapelele shi tabakunamina yawa nkishi sunga bebatshibila kibawe kya lufu.​—Danyele, shapitre 3.

Carlton Hayes, mufundji a myanda ya kala, bafundile shi: “Kifulo ky’eumbo nyi kileshesho kikata kya lukumino, na dingi kintu akilesha luno lulangwilo lw’eumbo nyi ebebendela. Bantu abafuulaa bifulu pabakidi pepi nadyo; na dingi bwa kwiditumbisha ba ngomba mpa na baana abediyimbilaa ngono.” Uno mufundji baadi mukumbashe dingi shi mu lulangwilo lw’eumbo mwi na mafuku abamonaa “bu eselele,” na bantu babataa bu “beselele sunga bu bilobo” mpa na ma mbalo abakitaa nka bu abalangwila eumbo na bintu byaadyo. Mu feete umune mukata eumbo mu Brésil, ungi nfumu mukata atalaa myanda ya basalayi bambile shi: “Ebendela abedinemekaa na kwidilangwila . . . nka byabalangwilaa eumbo.” Eyendo, ungi mukanda (The Encyclopedia Americana) ubaadi uleshe shi: “Ebendela nkintu kiselele nka bi nkuluse.”

Mukanda ubatukatuka mu kuteemuna nguleshe mu mafuku akile shi ngono y’eumbo “ayilesha patooka bi mu mashimba a bantu  pabitale eumbo na dingi misango ibungi abatekaa bukwashi bw’Efile Mukulu bwashi alame bantu be mwiumbo na bakunkushi baabo.” Kadi bafubi ba Yehowa ta mbakutwe binangu nya, abamonaa myanda y’eumbo itale mabendela na ngono y’eumbo bu lulangwilo. Byabya, ungi mukanda (The American Character) pabaudi awisamba pabitale bibaadi baana ba Batemwe ba Yehowa abapele kutshibila ebendela mpala sunga kutshipa bw’eumbo ku kalasa mu États-Unis, ubambile shi: “Mu bilumbu bibungi bibabadi batshibe ku Tumiladi Tukata tw’eumbo abaadi bashinkamishe shi ino myanda yooso itale ebendela ibabadi abakitshi kwifuku n’efuku nyi ndulangwilo.”

Nsaa yabakwete kupela kutwelakana mu ma feete a eumbo mwanda ta ngepushene na abyamba Bifundwe, bafubi ba Yehowa bakwete kulesha patooka mushindo wabanemeka bulungantu bwa bangi bakwete kwibikita. Abanemekaa dingi ebendela bu kitundwilo ky’eumbo na kukumina bakata ba guvernema bu “baasha matalwa” shi “be ku mufubo w’Efile Mukulu.” (Beena-Looma 13:1-4) Byabya, Batemwe ba Yehowa abalondaa elango dya kwela nteko bwa “banfumu na booso be na matalwa.” Kadi patwele lwalwa luteko, tukwete kuteka “bwashi tushaale mu kufukama na kwiyikeela, mu kupwidika na mu kinemo.”​—1 Timotee 2:2.

Vote. Beena Kidishitu ba binyibinyi abanemekaa bulungantu bwa bangi nsaa yabakitshi vote. Tabakitaa kampanye ka kupelesha bantu kwenda ku vote nya, na dingi abanemeka banfumu basangudibwe mu wawa mushindo. Sunga mbyabya, tabatwelakanaa mu myanda ya politike ya mwiumbo nya. (Mateo 22:21; 1 Mpyeele 3:16) Mwina Kidishitu mulombeene kukita kinyi su mushalele mwiumbo dyabatekye bantu bwashi bakite vote pa bukopo sunga mbalo yabafiitshila bantu abapele kwenda ku vote munda? Su batentekyesha shi, Shadrake, Meshake na Abede-Nego abayiile mpa na ku kipya kya Dura, mwina Kidishitu afumankana na uno mwanda mulombeene kwata kitshibilo kya kwenda ku mbalo yabakitshi vote su kondo kaaye k’eshimba taakamukalakasha. Anka, tabitungu shi atupilwe mwiya wa kupela kutwelakana mu myanda ya politike nya. Abitungu ataluule ano mayi asamombo:

1. Balondji ba Yesu ‘ta mbaa-pano nya.’​—Yowano 15:19.

2. Beena Kidishitu abaleshaa mpala ya Yesu na Bufumu bwaye.​—Yowano 18:36; 2 Beena-Kodinto 5:20.

3.   Kakongye ka beena Kidishitu nkebungye mu lulangwilo lumune, na bantu be mwanka mbekwateene mu kifulo bu kibaadi nakyo Kidishitu.​—1 Beena-Kodinto 1:10; Beena-Kolose 3:14.

4. Booso abasangula muntu kampanda be na kilumbu kya byooso byakitshi.​—Tala mayi aesambila pabitale uno mwanda mu 1 Samwele 8:5, 10-18 na 1 Timotee 5:22.

5. Yehowa bamwene shi, bu bibaadi beena Isaleele abaadi abakimbi nfumu amweneka na meso, abaadi bamutune.​—1 Samwele 8:7.

6. Abitungu shi beena Kidishitu balungule mukandu wibuwa na mashimba amune, kushi na bunsensa, nsaa yabesamba pabitale Bufumu bw’Efile Mukulu na bantu ba mu bisaka byooso bya politike.​—Mateo 24:14; 28:19, 20; Beena-Ebreeyi 10:35.

Kufubila mbulamatadi. Mu angi maumbo, abatekaa baaba abapele kukita mudimo wa busalayi bwabadya kufubila mbulamatadi mu mudimo kampanda munda mwa mafuku. Su twafumankana na mwanda wi byabya, abitungu kusambila kumpala kwa kwata kitshibilo, pangi twi balombeene kwisamba na mukwetu mwina Kidishitu munyingye mu kikudi, kunyima twi kwata kitshibilo muyiile abitulesha kondo ketu k’eshimba.​—Myeele 2:1-5; Beena-Fidipe 4:5.

Eyi dy’Efile Mukulu aditulungula shi twi na ‘kya kwikala bakookyele bansushi na banfumu; kwikala belumbuule bwa kukita mufubo ooso wibuwa, . . . na kwikala bapopeele.’ (Tite 3:1, 2) Su twi batuule dino elango mu binangu, twi balombeene kwiyela ino nkonko: ‘Su na kumiina kufubila mbulamatadi nekala bu batupilwa kitshibilo kyande kya kupela kutwelakana mu myanda ya politike na kunyikasha bu kwete kutwelakana mu myanda ya bipwilo bya madimi su?’ (Mika 4:3, 5; 2 Beena-Kodinto 6:16, 17) ‘Kukita kwa uno mudimo akukyebe kunkutshisha mushindo wa kulombasha mashito andi nawo a bwina Kidishitu su?’ (Mateo 28:19, 20; Beena-Efeeze 6:4; Beena-Ebreeyi 10:24, 25) ‘Na dingi, kukita kwa uno mudimo akunkwasha bwa kumona bya kulombasha midimo yande, bu kukita kwa mudimo wa nsaa yooso su?’​—Beena-Ebreeyi 6:11, 12.

Su mwina Kidishitu bamono shi mulombeene kufubila mbulamatadi pamutwe pa kwenda mu lukano, beena Kidishitu naaye ta mbalombeene kumutopeka nya, bibuwa banemekye kitshibilo kyaaye. (Beena-Looma 14:10) Byabya, su amona shi ta  mulombeene kukita wawa mudimo, bangi mbalombeene dingi kunemeka kitshibilo kyaaye.​—1 Beena-Kodinto 10:29; 2 Beena-Kodinto 1:24.