Anka bu byabadi bebileshe mu 1 Beena-Kodinto 6:1-8, Mpoolo mutumibwa baadi mwakule pabitale bilumbu bilombeene kutuuka pankatshi pa beena Kidishitu. Baadi muleshe pabitale bilumbu kampanda bibaadi munkatshi mwa bangi beena Kidishitu abaadi na lukalo lwa ‘kwibisambisha kwi bantu ba-bisumanga.’ (Verse 1) Mpoolo balesheshe patooka bwakinyi beena Kidishitu tabe na kya kwenda mu kwifundena ku tumilaadi pamutwe pa kwiyipudisha mu kakongye. Tubande kutaluula bwakinyi baadi mutuushe dino elango na ingi myanda yabasha besambila mu dino elango.

Su twi na bilumbu na mwina Kidishitu netu pabitale myanda ya makuta, kya kumpala abitungu tukimbe mushindo wa kwibipudisha muyiile mweneno a Yehowa pamutwe pa kutala mweneno etu a myanda. (Myeele 14:12) Anka bu bibaadi Yesu muleshe, bibuwa kupudisha bilumbu bukidibukidi kumpala kwabidya kutama. (Mateo 5:23-26) Mmwanda wa kukanya, bangi beena Kidishitu bakwete kwikutwena ngofu mpa na kutwala bilumbu byabo ku tumilaadi. Mpoolo balesheshe shi: “Bii kito kikata pakudi kwikale bilumbu munkatshi mwenu.” Bwakinyi? Mwanda ukata watupela kwifundeena wawa mushindo nyi nkupela kulwisha nkumo ya kakongye na kupela kusabulusha Efile Mukulu atulangwila. Byabya atunangushena ngofu pabitale luno lukonko lwa Mpoolo: “Mbwakinyi bwanushy’a kukumiina beenukitshiina bwinyi bubi?”​—Verse 7.

Mpoolo baadi munangushene dingi shi Efile Mukulu mmupe kakongye mushindo wibuwa wa kupudisha bilumbu. Bakulu nyi mbalume beena Kidishitu bapete kiukilo kya binyibinyi kya mu Bible, na Mpoolo bambile shi mbalombeene “kusambisha bakwabo” mu “myanda ya pano.” (Verse 3-5) Yesu balesheshe shi bilumbu bitale milwisho ikata bu, kudimbiila muntu myanda na kwiba, mbalombeene kwibipudisha mu kulonda kwa ino myanda isatu: wa kumpala, kwenda mu kwimonena na muntu bwa kupudisha mwanda bubidi bwenu; wa kabidi, su tanwibepushene naaye, twala muntu umune sunga babidi, na wa kasatu, su  tamupushishe baba bantu, twala wawa mwanda kwi kakongye.​—Mateo 18:15-17.

Eyendo, bakulu beena Kidishitu ta mbansushi ba myanda ya makuta nya na ta mbalombeene kutwelakana mu yaaya myanda. Mudimo wabo ta ngwa kupudisha bilumbu bya makuta bi munkatshi mwa beena Kidishitu nya. Anka, abakitaa mwabo mooso bwa kwibakwasha muyiile abyamba Bifundwe na kupudisha mwanda mu kufukama. Su mwanda ngwibakile bukopo, mbalombeene kwiutwadila mukunkushi a kifunda sunga kufundila biro bya filiale a Batemwe ba Yehowa. Byabya, kwi myanda ishii mu dino elango dibatushile Mpoolo. Bu myanda kinyi?

Ingi nsaa, kwi ingi myanda ayitekye shi bantu bende ku tumilaadi bwa kunemeka abyamba miiya sunga bwa kukimba butaale. Bu kileshesho, muntu mulombeene kwenda ku tumilaadi bwa kukumbasha akyamba miiya na bwa kutshiba dibaka, bwa kupeta matalwa a kulama baana, kuuka bungi bwa makuta aatungu kumufuta bwa baana, bwashi bamufute assurance, bwashi bamufute makuta aaye su société bapono, sunga bwa kwelesha kashe ku mukanda aulesha kyabadi balombeene kukita na bintu byaaye su baafu. Kwi ingi myanda ikumbeene kutuma mwina Kidishitu bwa kwenda na kilumbu ku tumilaadi bwa kwikalwila. *

Su muntu enda na kilumbu ku tumilaadi kushii na binangu bya kulwishisha mukwabo, ta mutupilwe elango dya Mpoolo dibatushile ku bukwashi bwa kikudi kiselele nya. * Sunga mbyabya kintu ki na muulo ukata ku meso a mwina Kidishitu nyi nkutumbisha eshina dya Yehowa na kufukama na buumune bwa kakongye. Balongi ba Kidishitu abebatundwilaa ku kifulo kyabo na “kifulo . . . taakikimbilaa anka byakyo ki namwinyi ooo.”​—1 Beena-Kodinto 13:4, 5; Yowano 13:34, 35, Kilombeno kipya.