Bomono uno nsongwakashi e pa kifwatulo su?— Nyi mwana mukashi a Yefetee. Bible t’etulungula eshina dyaaye nya, kadi atuuku shi baadi musangashe nshaaye mpa na Yehowa. Tubande kulonga ingi myanda imutale na itale nshaye Yefetee.

Yefetee baadi muntu e buwa na baadi aata nsaa ibungi bwa kulongyesha mwan’aaye mukashi pabitale Yehowa. Baadi muntu e bukome na mukunkushi e buwa. Byabya beena Isaleele abaadi bamutekye bwa kwibakunkusha ku ngoshi bwa kulwa na beshikwanyi nabo.

Yefetee baadi mutekye bukwashi bw’Efile Mukulu bwashi atshokole ngoshi. Yefetee nkwitshipa shi, su batshokola ngoshi, akyebe kulambula Yehowa muntu a kumpala atuuku mu nshibo yaaye nsaa yakalukiila ku ngoshi. Yawa muntu akashaala  na nkafuba munda mwa mafuku aye ooso ku tabernakele a Efile Mukulu. Tabernakele nyi mbalo ibaadi bantu abende mu kulangwila Efile Mukulu. Byabya, Yefetee nkutshokola ngoshi! Nsaa ibalukiile kwaye, ouku shi nnanyi batuukile bu muntu a kumpala mu nshibo yaaye?—

Oolo, nyi mwan’aaye mukashi! Baadi mwan’aye umune a eleka, binobino, Yefetee akyebe kumukumba bwashi tafikanga kwadi. Uno mwanda ubaadi umwinyongoshe ngofu. Kadi tentekyesha shi, Yefitee baadi mulee Yehowa. Mwanda wibuwa, mwan’aye mukashi nkwamba shi: ‘Yaya, su we mulee Yehowa, kita muyiile byoyikalanga mumulee.’

Mwana a Yefetee baadi mwinyongole n’aye namu. Ku tabernakele, tabaadi mulombeene kwibakilwa na kutanda baana nya. Kadi baadi mukumiine ngofu kulombasha mulayilo wa nshaaye na kusangasha Yehowa. Bino bibaadi na muulo kwadi kukila kutwela mu dibaka sunga kupeta baana. Byabya aye nkukatuka kwabo na nkwenda mu kushaala ku tabernakele bwa muuwa waye ooso.

Opwandjikisha shi byabya bibakitshine bibaadi bisangashe nshaaye mpa na Yehowa?— Oolo, bibaadi bibasangashe! Su okwete kukokyela na kufula Yehowa we mulombeene kwikala bu mwana a Yefetee. N’obe namu okyebe kusangasha baledi boobe ngofu mpa na Yehowa.