DILONGYESHA 2
Rebeka baadi mukumiine kusankisha Yehowa
Rebeka baadi mwana mukashi baadi mufule Yehowa. Eshina dya mulume aaye nyi Isaake. N’aye namu baadi mufule Yehowa. Mushindo kinyi ubaadi Rebeka mwimonene na Isaake? Mmushindo kinyi ubaadi muleshe shi baadi mukumiine kusangasha Yehowa? Tubande kutala uno mwanda kalolo.
Abrahame na Sara ndjo baledi ba Isaake. Abaadi bashaale mu nsenga ya Kanaana, mbalo ibaadi bantu bash’abalangwila Yehowa. Kadi Abrahame baadi akumiina shi mwana aaye ebakile mukashi alangwila Yehowa. Ndjo aye nkutuma mufubi aaye pangi Elyezer, bwa nkakimbila Isaake mukashi mwiumbo dibabadi abetanyina bu Harane, mwamwa mubaadi bangi bakwabo na Abrahame.
Rebeka bakuminyine kufuba ngofu bwa kutapila ma shamo mema
Elyezer, nkwenda na bangi bafubi ba Abrahame. Lubaadi lwendo lula. Abo nkutwala shamo ekumi itwale bya kudya na ma kado. Mushindo kinyi ubaadi Elyezer muukye shi uno mwana mukashi ndjo ababasangula bwa Isaake? Nsaa ibafikile Elyezer na bangi bafubi ku Harane, abayimeene pa bwina bwa meema mwanda Elyezer baadi auku shi bantu mbalombeene kufika mu kapindji kapeela bwa kutapa meema. Aye nkuteka Yehowa na nkwamba shi: ‘Nsongwakashi ampa mema na atomesha shamo yande, yawa nyi oyikala musangule.’
Anka paapa, uno nsogwakashi Rebeka bafikile ku bwina bwa mema. Bible alesha shi baadi buwa bukile. Elyezer nkumuteka mema a kutoma na aye nkumwaluula shi: “Ata otome! Nakatomesha mpâ na shamo yobe.” Banda kunangushena! Ma shamo e na nyoota aatomaa mema ebungi bukile, byabya Rebeka baadi musembe ku bwina bwa mema misusa ikile bungi. Bomono mu kifwatulo mushindo wakwete kufuba ngofu?— Elyezer baadi mukeme mushindo ubaadi Yehowa mwaluule luteko lwaye.
Elyezer nkupa Rebeka ma kado ebuwa. Rebeka nkuteka Elyezer na bantu babaadi nabo bwabadya kwenda kwabo ku nshibo. Elyezer nkulesha kyabekalanga bamutumine kwi Abrahame kwakwa na mushindo ubaluula Yehowa luteko lwaye. Kifuko kya Rebeka kibaadi na muloo wi kashaa p’abo kumutadiila bwashi eyibakishene na Isaake.
Rebeka bayile ku Kanaana na Elyezer na bakeyibakisheena na Isaake
Kadi opwandikisha shi Rebeka baadi mukumiine kwiyibakisheena na Isaake su?— Rebeka baadi auku shi Yehowa ndjo batumu Elyezer kwakwa. Byabya nsaa ibabayipwishe Rebeka kwi kifuko kyaye su mmulombeene kwenda ku Kanaana bwa nkeyibakisheena na Isaake, baadi mwaluule shi: “Olo.” Anka paapa, bayile na Elyezer. Nsaa ibabafikile ku Kanaana, abaadi beyibakisheene na Isaake.
Bu bibaadi shi Rebeka baadi mukumiine kukita kikumiine eshimba dya Yehowa, bapetele myabi ikile bungi. Kunyima kwa bipwa bibungi, Yesu nkutandjikwa mu kifuko kyaye! Su we bu Rebeka na osangasha Yehowa, Aye namu akyebe nkwelela myabi.
