Ingi nsaa bantu bakwete kwitusabuula sunga kwitufiitshila munda nsaa yatwibalungula myanda itale Yehowa. Bino mbilombeene kwitutakula bwa kupela kwakula pabitale Efile Mukulu. Tobwelele binangu pabitale uno mwanda su?— Bible etulungula pabitale nsongwalume baadi mufule Yehowa kadi baadi mubande kuleka kwakula myanda itale Yehowa. Eshina dyaaye nyi Yeelemiya. Tubande kutaluula myanda yaaye ibuwa.

Pabaadi Yeelemiya kii mwana mukinga, Yehowa nkumulungula shi abitungu adimushe bantu bwashi balekyeshe kukita myanda ibubi. Bino bibaadi bukopo bwa Yeelemiya, na baadi atshiinyi. Aye nkulungula Yehowa shi: “Ntshii mulombeene kwakula, mwanda nkii mukinga bikile.” Kadi, Yehowa nkumulungula shi: “Topushanga  muntu su ngumume moo. Nee noobe bwa nkukalwila.”

Byabya Yeelemiya nkubanga kudimusha mwilo shi abakyebe kwibanyonka su tabakumiina kwaluluka. Omono shi mwilo ubaadi ulonde bibaadi Yeelemiya mwibalungule?— Nya. Abaadi babangye kumusabuula na kumufiitshila munda ngofu. Bangi nkukyeba na kumwipaa! Opwandjikisha shi Yeelemiya baadi apusha naminyi?— Baadi na moo aye nkwamba shi: “Ntaneesamba dimo mwanda mwishina dya Yehowa.” Kadi baadi mulekye kwisamba su?— Nya, baadi mufule Yehowa mu mushindo washibaadi mulombeene kulekyesha kwakula myanda imutale. Na dingi bu bi shi Yeelemiya tabaadi mulekye kwakula, Yehowa baadi mumupaashe.

Bu kileshesho, bantu babi nkwela Yeelemiya mu bwina bula buule na matekye. Tabaadi na byakudya sunga meema nya. Baaba bantu abakuminyine kwela Yeelemiya mwamwa bwashi afwe. Kadi, Yehowa nkumukwasha, aye nkupanda!

Kileshesho kya Yeelemiya nkilombeene nkulongyesha kinyi?— Sunga byekala shi baadi na moo ingi nsaa, tabaadi mulekyeshe kwakula pabitale Yehowa nya. Pwakula myanda itale Yehowa, bantu abakusabuula sunga nkufiikila munda. We mulombeene kukalakashibwa sunga kupusha moo. Kadi tokumbanga kupela kwakula pabitale Yehowa. Akyebe nkukwasha mu mishindo yooso, anka bu bibaadi mukwashe Yeelemiya.