Mbibofule kukookyela nshobe mu mishindo yooso su?— Ingi misusa bi bukopo. Ouku shi Yesu baadi mukyokyele Yehowa na baledi baaye mu mishindo yooso su?— Kileshesho kyaye nkilombeene nkukwasha bwa kukokyela baledi boobe sunga kwekala mwanda omono shi ta mbibofule kwiulombasha. Tubande kulonga ingi myanda ibungi pabitale uno mwanda.

Kumpala kwashi Yesu afikye pano pa nsenga, baadi na Nshaaye, Yehowa mwiyilu. Kadi Yesu baadi dingi na baledi pano pa nsenga. Mashina aabo nyi Yoosefe na Mariya. Ouku mushindo ubabadi bekale baledi baaye?—

Yehowa baadi mukaashe muwa wa Yesu mwiyilu eweela munda mwa Mariya bwashi Yesu atandjikwe na kwikala na muwa pa nsenga. Kino kibaadi kipaso! Yesu nkubanga kukula munda mwa Mariya anka bu abikulaa baana booso munda mwa ba nyinabo. Kunyima kwa myeshi kitema, Yesu batandjikilwe. Nyi mu uno mushindo ufikye Yoosefe na Mariya bu baledi ba Yesu pano pa nsenga.

Nsaa ibaadi Yesu na bipwa penda 12, baadi mukite kintu kibaadi kileeshe mushindo ubaadi mufule Nshaaye Yehowa ngofu. Bino bibaadi bikitshikye nsaa ibaadi Yesu na kifuko kyabo bakite lwendo lula lwa ku Yelusaleeme bwa nkakita feete mukata a Lukilo. Pa kwalukiila kwa ku nshibo, Yoosefe na Mariya ta mbamone Yesu nya. Ouku kubaadi?—

Yoosefe na Mariya abalukiile bukidibukidi ku Yeelusaleme na kukimba Yesu mbalo yooso. Abaadi benyongole ngofu mwanda tababaadi bamumone mbalo sunga ngimune. Kadi kunyima kwa mafuku asatu, abamusangeene mu ntempelo! Ouku bwakinyi Yesu baadi mu ntempelo?— Mwanda baadi alongo myanda itale Nshaaye, Yehowa. Baadi mufule Yehowa na baadi akumiina kulonga mushindo wa kumusangasha. Sunga nsaa ibaadi akulu na aye nkufika nsongwalume, Yesu baadi mukookyele Yehowa. Yesu baadi akokyela sunga pa bibaadi abimwelela bukopo na bino abilesha shi baadi mukyengye. Yesu baadi akokyela Yoosefe na Mariya?— Oolo, Bible ashinkamisha shi baadi akokyela.

Elango kinyi dibopete ku kileshesho kya Yesu?— Abitungu wekale okokyela baledi boobe, sunga byekala shi ta mbibofule. Okumiina kukita byabya su?—