1-3. (a) Bwakinyi nshibo yooso ya Abigaile ibaadi mu masaku? (b) Nkinyi ky’atukyebe kulongyela pabitale uno mukashi a kileshesho?

 ABIGAILE amweka kwete kutshiina kumpala kwa nsongwalume. E na kya kupusha moo mwanda kwi masaku akata aakyebe kwibafikila. Kwi basalayi 400 be na kitshibilo kya kwipaa bana balume booso ba mwa Nabale, mulume a Abigaile. Bwakinyi?

² Myanda yooso ibabangile na Nabale. Baadi mukite myanda y’etombo na kukutwa kwa bukalanga. Bwa uno musuusa, muntu abakaa, ta muntu a bisumanga nya; nyi nfumu aabaneemeka kwi kisaka kya basalayi bepaane na abauku kulwa ngoshi kalolo. Binobino, umune a ku bafubi ba Nabale, pangi mwikale mulami a mikooko, nkufika kwi Abigaile, na lukulupilo lwa’shi mmulombeene kwibapaasha. Kadi mbikunyi bilombeene mwana mukashi kukambila kilwilo kishima kya basalayi?

³ Tubandeyi kulonga myanda itale Abigaile. Baadi nnanyi? Bino bibabangile naminyi? Na kileshesho kyaye kya lukumiino nkilombeene kwitulongyesha kinyi?

4. Nabale baadi muntu a mushindo kinyi?

⁴ Abigaile na Nabale tababaadi na myanda i mumune nya. Nabale baadi mupete mukashi ebuwa, kadi Abigaile abaadi bamwibakile kwi muntu ebubi bukile. Nkya binyi’shi mulume baadi mpeta. Nyi bwakinyi baadi eata na kineemo kikile, kadi bangi abaadi abamumono naminyi? Ta kwi muntu abadi bakambe kwakwila bibubi mu Bible bu Nabale nya. Eshina dyaye adipatuula’shi “mmupupakane,” sunga’shi “nkitesha.” Bino abimweka’shi nku butandwa bwaye kubabadi bamuudikye dino eshina, su abaadi bamupe dyanka kunyima mwanda wa mwikelo waaye? Sunga mbyabya, bikitshino byaaye bibaadi bileshe patooka’shi dyadya eshina ndimukumbeene. Nabale baadi “n’eyikashi dibi na bukyelo.” Bu bibaadi nkodi a maalwa sha kapeesha, bantu babaadi abamutshinyi na kumushikwa.​—1 Sam. 25:2, 3, 17, 21, 25.

5, 6. (a) Mu koobe kumona, ngikashi kinyi ya muulo ibaadi nayo Abigaile? (b) Bwakinyi Abigaile baadi mwiyibakisheene na yawa muntu a bisumanga?

 ⁵ Abigaile baadi mwilekeene ngofu na Nabale. Eshina dyaye adileesha’shi: “Nshami basangala.” Ba nshe-bana bebungi abekalaa na nfyeedi ya kutanda nsongwakashi ebuwa bwa mpala, kadi nshe-bana sha binangu asangala ngofu p’aye kumona’shi mwan’aye mukashi e na mwikeelo wibuwa. Nsaa ibungi, bantu bebuwa bwa mpala t’abetatshishaa bwa kwikala na ngikashi bu: Budimu, binangu, eshimba dinyingye, sunga lukumiino nya. Abigaile tabaadi byabya nya. Bible amukaanyisha pa mwanda wa budimu bwaye na buwa bwaye bwa mpala.​—Badika 1 Samwele 25:3.

⁶ Lelo uno, bantu mbalombeene kwiyipusha bwakinyi yawa nsongwakashi mupatulukye baadi mwiyibakisheene na uno muntu a bisumanga. Tentekyesha’shi, mabaka ebungi a kala abaadi aakitshika mu kwipusheena kwa baledi ba mulume na ba mukashi. Mu mishindo yooso, akikumiina baledi kibaadi na muulo ukata. Baledi ba Abigaile abaadi batakule mwan’abo bwadya kutwelela Nabale, mu kulonda kwa makuta na nkumo bibaadi nabyo su? Mbulanda bubaadi bwibakitshishe byabya su? Sunga mbyabya, makuta a Nabale ta ngamwikashe mulume ebuwa nya.

7. (a) Mbikunyi bilombeene ba nambutwile kulongyesha bana baabo mweneno ebuwa pabitale dibaka lelo uno? (b) Abigaile baadi na kitshibilo kinyi?

⁷ Ba nambutwile basha binangu abalongyeshaa bana baabo kalolo mweneno ebuwa a dibaka. Ta mbalombeene kutakula bana baabo bwabadya kutwela ku bulunda pa mwanda wa makuta sunga kwibatakula bwa’shi babangye kwiyileena na ungi muntu aku namu tabakudile bwabadya kumona bya kutwala mashito a nshibo nya. (1 Kod. 7:36) Kadi bwa Abigaile, nsaa ngipwe kukila ya kunangusheena pa yaaya myanda. Sunga bekala bamwibakile naminyi, aye mmwikale nka mukashi a Nabale, na e na kitshibilo kya kulumbuula uno mwanda wibukopo.

8. Nabale baadi mukee nnanyi, na bwakinyi we mulombeene kwamba’shi kwakwa nkubulakana kukata?

⁸ Nabale baadi mutuule Abigaile kafuka-lupese ngofu. Muntu abakatuka mu kukaa ta muntu bu bantu booso nya, nyi Daavide. Uno Daavide baadi mufubi a Yehowa sha kululama abaabadi beele mwimu kwi mutemuki Samwele, aye nkuleesh’shi Efile Mukulu basangula Daavide muntu ebuwa bwa kupyana nfumu Saule. (1 Sam. 16:1, 2, 11-13) Bu bibaadi nfumu Saule abingi Daavide na mukao ooso bwa kumwipaa, Daavide baadi musuukye akafwama mu mapya na basalayi baaye 600.

9, 10. (a) Bwa’shi Daavide na bantu baye bapete bya kudya abaadi abakitshi kinyi? (b) Bwakinyi bibaadi abitungu’shi Nabale aleeshe lutumbuu ku bibaadi Daavide na bantu baaye bamukitshine? (Tala kikoso kya 10 mu mayi e kuushi kw’esaki.)

⁹ Nabale baadi mushaale mu Maone, kadi baadi afubila peepi na Karmele. a Bino bibundji bibidi bibaadi ma mbalo ebuwa bwa kumuna  mikooko. Nabale baadi na mikooko 3 000. Byabya bipya bibaadi kashila tababaadi babande kwibidima nya. Dya kuushi ndjo kubaadi kabaaka ka Parane. Dya kutunduka nguba, kubaadi eshinda adyende ku Kalunga kafwe adikidi mu bipya bishii bantu, mu nsenga yume poo, ibaadi na mpongo na ma balo a kufwamina. Mu aa ma mbalo djo mubaadi Daavide na bantu baye bafwamine, abakyengye bwa kumona bya kudya; kushii mpaka, abaadi abende mu kuta na abanyingiila nkalakashi ikile bungi. Abaadi abemoneena misango ibungi na ba nsongwalume abaadi abafubu bu balami ba mikooko ya muntu sha kamono Nabale.

¹⁰ Bano basalayi abaadi bakyengyeshe balami ba mikooko su? Bibaadi bibofule bwa’shi bekala abaata mukooko umune ku umune misango yooso, kadi ta babaadi bakite byabya nya. Mu kwilekeena na byabya, abaadi nka bu lubumbo lwifunyishe mikooko ya Nabale na bafubi baaye bwa kwibakalwila. (Badika 1 Samwele 25:15, 16.) Mikooko na balami bayo abaadi munkatshi mwa masaku e bungi. Nyema ya bukyelo ibaadi ikile bungi, na dingi bu bibaabadi ku mukalo wa kuushi kw’eumbo dya Isaleele, bangifi ba angi maumbo abaadi abafiki kwabadi misango yooso mu kwibakalakasha. b

11, 12. (a) Daavide baadi mutume mukyendji kwi Nabale naminyi? (b) Nkipaso kinyi kibaadi Nabale mwaluule baaba abafikile na mukyendji?

¹¹ Tabibaadi bibofule bwa kudiisha baaba bantu booso mu kabaaka nya. Ndjo dingi efuku, Daavide nkutuma bantu ekumi kwi Nabale mu kuteka bukwashi. Daavide baadi mutekye nsaa ibuwa. Kibaadi kipungo kya kukuula bwaa bwa mikooko, kipungo kya miloo kibaabadi abadi kalolo na kwabila namu bangi bintu. Dingi Daavide baadi musangule bishima byaye kalolo, na akula na kaneemo. Baadi mwiyitamine aye nabeene bu “mwan’obe Daavide,” pangi baadi auku na kaneemo kooso’shi Nabale mmukulu aaye. Nabale bamwalulwile naminyi?​—1 Sam. 25:5-8.

¹² Nkutomboka nka bu sha-mombe! Muyiile mayi a yawa nsongwalume atutemunanaga ku mbangilo kwa mwisambo wa Abigaile, Nabale babangile ‘kwibasaashila.’ Na kasaabu kooso aye nkupela na kushidika’shi ta mulombeene kupa Daavide mukate waye, meema, sunga mwita waye mwanda bintu bii na muulo ukata. Aye nkwisha Daavide milongo nka bu muntu a bisumanga na kumupwandjikisha na mpika kwete afwasuukasunganga. Mweneno a Nabale e mumune na a Saule baadi mushikwe Daavide. Ta kwi muntu su ngumune a kwabadi baadi na mweneno a Yehowa nya. Efile Mukulu baadi mufule Daavide na tabaadi amumono bu mpika ntomboshi nya, kadi bu nfumu akyebe kukunkusha Isaleele kumpala.​—1 Sam. 25:10, 11, 14.

13. (a) Daavide bakitshine naminyi pabaabadi bamusabuule kwi Nabale? (b) Eyi dya kulonda dyabadi bafunde mu Shake 1:20 aditulongyesha kinyi pabitale nsungu ya Daavide?

¹³ Pabalukiile bantu ba Daavide babaadi mutume bamulungula yaaya  myanda, Daavide bafiitshile munda ngofu. Aye nkwela eyi’shi: “Ooso muntu aate mwele waye!” Baadi mwilumbuule bwa kwenda mu kulwa ngoshi, aye nkukisha bantu baaye 400 kumpala bwabadya kubanga looshi. Betshipile bwa kwipaa mwana mulume ooso a mu nshibo ya Nabale. (1 Sam. 25:12, 13, 21, 22) Daavide baadi na kya kufiita munda, kadi mushindo waye wa kufiita munda ubaadi wibubi. Bible akula bino: “Nsungu ya muntu tangilombeene kukita kilulame kumpala kw’Efile Mukulu.” (Shak. 1:20) Mbikunyi bibaadi bilombeene Abigaile kupaasha ba mu nshibo yaaye?

14. (a) Abigaile baadi mukite kinyi kumpala kwa kulumbuula bubi bubaadi Nabale mukite? (b) Elango kinyi dikata dyatudi balombeene kulongyela mu kwilekeena kwi pankatshi pa Nabale na Abigaile? (Tala dingi mayi e kuushi kw’esaki.)

¹⁴ Twi kwamba’shi Abigaile mmupwe kukita kintu kampanda bwa kwenda mu kupwa kino kilubilo. Mu kwilekeena na mulume aaye, Nabale, Abigaile bakuminyine kuteemesha. Pamutwe pa nkesamba na Nabale, uno mwina mudimo besambile pa mwanda waye’shi: “Aye naamu mmuntu’nka byabya shii mulombeene kwisamba naye.” c (1 Sam. 25:17) Bu bibaadi Nabale etatula ngofu, tabaadi akumiina kuteemesha muntu nya. Kwakwa kwitatula nkupalakane mpa na ano mafuku eetu. Kadi uno nsongwalume auku’shi Abigaile te bii Nabale nya, nyi bwakinyi ende mu nkamulondela mwanda.

15, 16. (a) Mmushindo kinyi ubaadi Abigaile muleeshe’shi baadi nka bi mukashi sha kinangu abadi baleeshe mu mu mukanda wa Nkindji? (b) Bwakinyi kino kibaadi Abigaile mukite t’akileesha’shi baadi mutombokyele matalwa a mulum’aye a bu nfumu a kifuko?

¹⁵ Abigaile baadi munangusheene na nkukita myanda bukidibukidi. Atubadika bino: ‘Penyi papa Abigaile bayile lubilo.’ Mu uno mwisambo atusangana’shi pabitale uno mwana mukashi, kino kishima “kwenda lubilo,” akisanganyibwa misusa inanka. Baadi mulumbuule kya-buntu bwa nkapa Daavide na bantu baaye. Kubaadi mikate, nfinyo, mikooko, ntete ikangye, tukuba tuume twa nfinyo, bikuba bya nfingye biume. Eyendo, Abigaile baadi muukye kalolo bintu bibaadi nabyo, aye ndjo baadi atwala kalolo bushito bwa nshibo anka bu mukashi sha kinangu abadi bateemune mu mukanda wa Nkindji. (Nki. 31:10-31) Batumine bintu na beena mudimo baye, aye nabeene abanga kulonda kunyima. Atubadika bino: “Anka, ta mmulungule mulund’ê Nabale kintu ooo.”​—1 Sam. 25:18, 19, EEM.

 ¹⁶ Bino bibaadi mukite abileesha’shi Abigaile baadi mutombokyele matalwa a mulum’aye a bu nfumu a kifuko? Nya; lamiina’shi Nabale baadi mulwishiishe mwediibwe mwimu a Yehowa ngofu, kikitshino kyaaye kibaadi kilombeene kufwisha lufu lwa bantu be bungi bashii basoole mwanda ba mu nshibo yaaye. Su Abigaile bakutshilwe kukita bino, mase a bano bantu abadya kwikala pa mutwe paaye na pa mulum’aye? Mu uno mwanda baadi mukookyele Efile Mukulu aaye pamutwe pa kukookyela mulum’aye.

17, 18. Mmushindo kinyi ubaadi Abigaile mwisambe na Daavide, bakwile kinyi, na bwakinyi bishima byaye bibakumine eshimba dya Daavide?

¹⁷ Mu kapindji kapeela, Abigaile bafumankeene na Daavide na bantu baaye. Paapa dingi, bayikile lubilo ku mpunda aaye na kukunama mu nsenga kumpala kwa Daavide. (1 Sam. 25:20, 23) Akupu aye nkutuusha myanda yooso ibaadi mwishimba dyaye, na kumusendeela bwa’shi afwile namu mulum’aye lusa na booso ba mu nshibo yaaye. Nkinyi kibaadi kilongamishe bishima byaye?

¹⁸ Baadi mwitentekye bubi bwa mulum’aye na kuteka Daavide bwadya kumufwila namu lusa mwishina dyaye. Aye nkushinkamisha’shi mulum’aye baadi mupatakane nka bu abipatuula eshina dyaye, pangi akyebe kuleesha Daavide’shi kwilondeena naye bwa kumunyooka akwisha Daavide milongo. Aye nkuleesha Daavide patooka’shi mmukumiine mwadi’shi mmuntu aleesha mpala ya Yehowa, amushinkamiisha’shi baadi alu “ngoshi ya Yehowa.” Aye nkuleesha dingi’shi auku mulayilo wa Yehowa pabitale Daavide na bufumu bwaye, p’aaye kwamba’shi: “Yehowa . . . akakutuulu dingi bu nfumu a Isaleele.” Na dingi amutosha kukita kintu kilombeene kumusemusha ebaasa dya mase sunga kilombeene kumwikasha “eshimba kwiyilu”​—bino abileesha kondo k’eshimba akamukalakasha. (Badika 1 Samwele 25:24-31.) Bino bishima bibaadi bikume eshimba dya Daavide ngofu!

19. Daavide bakitshine naminyi pabapushishe mayi a Abigaile, na bwakinyi baadi mumukampule?

¹⁹ Daavide bakitshine naminyi? bakuminyiine bintu bibaadi Abigaile mumutwadile na aye nkwamba’shi: “Ende ntumbo Yehowa Efile Mukulu a Isaleele bakutumu lelo uno mu kwimoneena nami! [elele kinangu kyoobe kibuwa mwabi,] na [akwelele obe nabeene mwabi,] bwa pobonkanda lelo bwa kufika mu kwipayisheena.” Daavide baadi mumukampule bu bibaadi mukite myanda bukidibukidi bwa’shi afikye mu kufumankana naye, na kushinkamisha’shi Abigaile baadi mumukande bwa kuponesha mase mu nsenga. Amulungula’shi: “Alukiila koobe mu butaale. Nakookyela kwiyi dyoobe.”​—1 Sam. 25:32-35.

20, 21. (a) Nkinyi ky’omono bu kibuwa pabitale kukumiina kwa Abigaile bwa kwalukiila kwi mulume aaye? (b) Mbikunyi bibaadi Abigaile muleeshe eshimba dinyingye na ngyelelo a binangu ebuwa paaye kusangula nsaa ya kwisamba na Nabale?

²⁰ Abigaile baapu kwilekeena na Daavide, baadi mulombeene kunangusheena pabitale kwimoneena kwabo; na kumona bi Daavide mmuntu  ebuwa, sha lukumiino, na sha kalolo mu kwilekeene na mulume aaye Nabale. Kadi ta mutungunukye na kunangusheena pabitale kwakwa kwilekeena nya. Atubadika bino: “Abigaile balukiile kwi Nabale.” Oolo, balukiile kwi mulume aaye bwa nkalombasha mudimo waye wa bu mukashi a nshibo bwa muloo wa kifuko kyaye. Aye nkumulungula bwa bya buntu bibaadi mupe Daavide na bantu baye. Bibaadi abitungu’shi Nabale ebiukye. Baadi mulombeene kumulungula dingi bwa masaku akata aakyebanga kwibafikila. Su baadi mwibipushe kwi ungi muntu, bibaadi bilombeene kumukwatshisha buufu bwi kasha! Kadi ta mulombeene kumulungula wanka yaaya nsaa nya, mwanda baadi akitshi feete nka bu nfumu na baadi mukolwe ngofu.​—1 Sam. 25:36.

²¹ Pano dingi, baadi muleeshe eshimba dinyingye na ngyelelo a binangu ebuwa, aye nkutengyela mpa na malooba namashika, pabaadi papwe kumutanduka maalwa. Pano binangu byaye mbishalame namu kalolo bya’shi amuteemesha, sunga mbibaadi muntu a myanda itwelakane. Ndjo Abigaile nkumulondela abikalanga bikitshikye mwanda ooso. Kushii mpaka amutshinyi’shi tala amutombokyela, pangi mpa na kumukupila. Pa mutwe pa byabya, mulume nkushaala nkuumiina nka talaa, kushii kusaana.​—1 Sam. 25:37.

22. Nkinyi kibaadi kifikile Nabale, na nkinyi kyatudi balombeene kulonga pabitale myanda ibubi ayikitshika mu bifuko byetu?

²² Nkinyi kibaadi kifikile Nabale? “Eshimba dibamwibâbile munda, auma bukopo’nka bwibwe.” Pangi baadi akumbu maladi a eshimba. Byabya, kunyima kwa mafuku akile p’ekumi, aye nkufwa​—na ta nka penda pa mwanda wa maladi nya. Bible etulondela’shi: “Yehowa batuminyîne Nabale angi malwa, aye nkufwa.” (1 Sam. 25:38, EEM) Luno lufu lubaadi lumulombeene na lubaadi lufudiishe dikyenga dya Abigaile dya mu bulunda. Sunga mbyabidi’shi lelo uno Yehowa t’ayipeyaa dingi bantu mu uno mushindo, uno mwanda awitutentekyesha’shi ta kwi mwanda sunga ngumune wibubi aukitshika mu nshibo yeetu washii mulombeene kumona nya. Apalombana nsaa yaaye, afwisha kululama.​—Badika Luka 8:17.

23. Mmwabi kinyi dingi ubaadi Abigaile mupete, na mbikunyi bibaadi muleeshe’shi kupeta mwabi wa kwikala mukashi a Daavide ta nkumushintuule?

²³ Kukaasha kufungushibwa ku bupika bwa dibaka dibi, Abigaile bapete ungi mwabi. Pabaadi mupushe’shi Nabale baafu, Daavide nkutuma mukyendji na bantu bwa nkamwisambila na Abigaile. Aye nkwaluula’shi: “Mufubi oobe mukashi, nyi mpika mwilumbuule bwa kusuula ngwa ya bafubi ba nfumwami.” Mbinyibinyi, tabaadi mubangye kwitatula p’aye kumona’shi taadi akyebe kwikala mukashi a Daavide nya; baadi mwilambule bwa kwikala mwina mudimo a bafubi baye! Pano atubadika  dingi’shi baadi mukite myanda bukidibukidi bwa kwenda kwi Daavide.​—1 Sam. 25:39-42.

24. (a) Abigaile baadi mufumankane na nkalakashi kinyi mu nshalelo aaye mupya? (b) Kadi mushindo kinyi ubaadi mulume aaye na Efile Mukulu aaye abamumono?

²⁴ Bino t’abileesha’shi nshalelo a Abigaile na Daavide ekala nka mubofule nya. Daavide baadi mupwe kwiyibakisheena na Akinoame, na sunga mbibaadi Yehowa mutadiile bwa’shi bantu bebakile bakashi bebungi, bibaadi abifwisha nkalakashi ibukopo kwi bakashi basha lukumiino. Na Daavide tabaadi mubande kwikala nfumu nya, na kwi nkalakashi ibungi na bitompwanga abitungu’shi akambile kumpala kwa kufubila Yehowa mu uno mushindo. Kadi bu bibaadi Abigaile akwasha Daavide mu muwa waye ooso, aye nkumutandjila mwana mulume, ndjo aye nkumona’shi bapete mulume amwata na muulo na kumukalwila. Ungi mususa, Daavide nkumufungusha mu maasa a ntomboshi! (1 Sam. 30:1-19) Daavide baadi namu mwambule Yehowa, mufule na ataa na muulo baaba bakashi basha kalolo, eshimba dinyingye na lukumiino.