1, 2. (a) Nkinyi kibaadi kifikile Yoona na bantu abaadi abatambusha mashuwa? (b) Mwanda wa Yoona ngulombeene kwitukwasha naminyi?

 YOONA baadi mukumiine kutuusha kyooso akitungu bwa kufudiisha tuno tuleo twi bukopo. Tubaadi tuleo twa lupapi lukwete kwikupila ku myooshi ya mashuwa; mbunda-mbunda ya meema ikwete kwikupila bibukopo ku mashuwa. Tukuwa tubaadi atukalakasha Yoona ngofu ntwa muntu baadi atambusha mashuwa na beena dyaye abetatshisha bwa kushadika mashuwa ku lukalakashi lwa mbunda-mbunda ya meema. Yoona ashinkamisha’shi baaba bantu abafu binobino pa mwanda waye!

² Nkinyi kibaadi kikafishe Yoona ku uno nshaleelo e bukopo? Baadi mulwishiishe Efile Mukulu aaye, Yehowa ngofu. Bakitshiine kinyi? Bukuuku bwabo na Yehowa bubaadi bulombeene kulumbuluka dingi su? Myaluulo ya ku ino nkonko ngilombeene kwitupa malongyesha akata. Bu kileshesho, mwisambo wa Yoona awitukwasha bwa kumona’shi sunga mbantu be na lukumiino lwi bukopo, mbalombeene kukita bilubilo kadi atumono kyabadi balombeene kukita bwa kulumbuula myanda.

3-5. (a) Nsaa y’atuteemuna eshina dya Yoona, bantu bebungi abakambaa kwimeena pa kinyi? (b) Nkinyi ky’atuuku pabitale nshaleelo a Yoona? (Tala dingi mayi e kuushi kw’esaki.) (c) Bwakinyi mudimo wa Yoona wa bu mutemuki taubaadi ubofule?

³ Nsaa i bantu abanangusheena pa mwanda wa Yoona, abemenaa nka penda ku myanda yaaye ibubi, bu kukutwa kwaye kwa kukookyela na kuleesha kwaye kwa mutwe bukopo. Kadi baadi mukite myanda ibuwa ibungi. Tentekyesha’shi, Yoona abaadi bamusangule bwa kwikala mutemuki a Yehowa Efile Mukulu. Yehowa tabaadi mulombeene kumusangula bwa kumupa wawa mudimo ukata su baadi muntu shii na lukumiino sunga mukutwe kululama nya.

⁴ Bible etuleesha myanda ipeela itale Yoona ayitukwasha bwa kupusha  kalolo bibaadi. (Badika 2 Banfumu 14:25.) Kibundji kyaabo nku Gate-Hefere, kaumbo kabaadi mu bilometre binanka na ku Naazarete, kaumbo kabaadi Yesu Kidishitu mukudile kunyima kwa bipwa bifikye ku 800. a Yoona baadi mufube bu mutemuki mu mafuku abaadi Nfumu Yeroboame II amunu bu nfumu a bisamba ekumi bya Isaleele. Eliya baadi mupwe kufwa, mpyanyi aaye, Elisha baadi mupwe kufwa nsaa ibaadi nshaye na Yeroboame ku bufumu. Yehowa baadi mufube na bano batemuki bwa kufudiisha lulangwilo lwa Baale, beena Isaleele abaadi bakatukye mwishinda dilulame nka mu kukumiina kwabo. Binobino eumbu di ku matalwa a nfumu baadi “[mutungunukye na kukita] bubi ku meeso kwa Yehowa.” (2 Bf. 14:24) Byabya mudimo wa Yoona taubaadi ubofule nya. Sunga mbyabya baadi mwiulombashe na lukumiino looso.

⁵ Dingi efuku, nshaleelo a Yoona baadi mwalulukye ngofu. Yoona abaadi bamupe mufubo ukata kwi Yehowa ubaadi mumone bu wibukopo bukile. Ubaadi mudimo kinyi?

6. Yehowa baadi mupe Yoona mudimo kinyi, na bwakinyi ubaadi autshinyisha?

⁶ Yehowa baadi mulungule Yoona’shi: “Ebwee, wende ku Niniive lupata lukata, webaukishe’shi, bubi bwabo mbupwe kufika na kwandji.” (Yoona 1:2) Twi kupusha kalolo’shi uno mudimo ubaabadi bamupe ubaadi bukopo. Niniive baadi mu bilometre 800 dya kutunduka nguba, bwa nkekufika lwa ngwaa, muntu baadi mulombeene kupwa mweshi ushima mwishinda. Kadi kibaadi akikalakasha Yoona ngofu ta ndwendo lula nya. Ku Niniive, Yoona baadi na mukandu wa kiimu kya Yehowa wa kulungula beena Aasiriya, abaadi bantu baukikwe ngofu bu bantu bash’etombo na bukitekite. Bu bibaadi balangwidi b’Efile Mukulu bapele kuteemesha Yoona, ba mpangano abaadi balombeene kumuteemesha su? Mufubi umune a Yehowa baadi mulombeene kukita kinyi mu dino eumbo dikata dya Niniive, dibaabadi babangye kwitamina kunyima bu “lupata lwa baa-sha mufubo wa kupongoola mase”?​—Na. 3:1, 7.

7, 8. (a) Bwakinyi twi balombeene kwamba’shi Yoona baadi mwate kitshibilo kya kusuuka mudimo ubaabadi bamupe kwi Yehowa? (b) Bwakinyi tatwi balombeene kwamba’shi Yoona baadi na moo nka bu ebyembya?

⁷ Ino nkonko ibaadi ilombeene kwifunya mu mutwe wa Yoona. Kadi t’atuuku nya. Kyetu ky’atuuku nka penda’shi basuukile. Yehowa baadi mumulungule bwa kwenda dya kutunduka; Yoona nkwenda dya kupona, nkunyisha kwenda kula kukile. Aye nkwalaala dya ku lupese, mu kibundji kibaadi akimeena mashuwa kibaabadi abetamina bu Yafa,  kwakwa ndjo kubaadi mukapete mashuwa abaadi aende ku Tarsise. Bangi bafundji abamba’shi Tarsise baadi mu Espagne. Su mbyabya, Yoona baadi mutambukye bilometre 3 500 kukatuka ku Niniive. Lwalwa lwendo lwi bino lwa nkafika ku nfudiilo kwa Mbuu a Mediteranee lubaadi lulombeene kukitshika munda mwa kipwa kishima. Yoona baadi mwate kitshibilo kya kusuuka mudimo ubaadi Yehowa mumupe!​—Badika Yoona 1:3.

⁸ Bino abikyebe kuleesha’shi Yoona baadi na moo nka bu ebyembya? Ta twi balombeene kumutshibila kiimu musango umune nya. Anka bu by’atukyebe kumona, Yoona baadi n’eshimba dinyingye ngofu. Anka bi ooso a kwatudi, Yoona baadi muntu mukutwe kupwidika baadi akitshi bilema bibungi. (Mis. 51:5) Nanyi a kwatudi sha pushishe moo?

9. Ingi misuusa ayitupa Yehowa mudimo kampanda atupushaa naminyi? Mbya binyibinyi kinyi byatushii balombeene kwilwankana?

⁹ Ingi nsaa mbilombeene kumweka’shi Efile Mukulu etutekye bwa kukita mudimo wibukopo, sunga watushii balombeene koobesha. Twi balombeene kumona mudimo wa kulambukisha mukandu wibuwa wa Bufumu bw’Efile Mukulu autungu’shi beena Kidishitu bakite buwibukopo. (Mat. 24:14) Tatwilwankananga bya binyibinyi bibaakwile Yesu’shi: “Bintu bioso mbibofule kwi Efile Mukulu.” (Mak. 10:27) Su ingi nsaa twayilwankana bino bya binyibinyi, pangi twi balombeene kupusha kalolo lukalakashi lwa Yoona. Kusuuka kwaye kubaadi kufwishe nkalakashi kinyi?

10, 11. (a) Nsaa ibaadi mashuwa aende kula na kyeese, Yoona baadi mukulupile kinyi? (b) Mashuwa na bantu abaadi abeatambusha abaadi mu masaku kinyi?

¹⁰ Tubande kupwandjikisha Yoona kwete kutwela mu mashuwa, e kwikala a ba nsunga beena Fenisii. Kwete kutala yawa mukata atambushaa mashuwa na beena dyaye abelumbuula bwa kubanga lwendo. Nsaa y’abakwete kwenda kula na kyeese na kwifubwila munkatshi a meema, pangi Yoona baadi amono’shi bapanda ku masaku atshinanga. Kadi musango umune myanda ibashintulukile.

¹¹ Kipapi kikata kibebwele mu kalunga ka meema na kibebwesheshe mbundambuda ya meema ibaadi ilombeene mpa na kwina mashuwa atudi nao lelo uno. Bu bibaadi’shi mbunda ya meema ibaadi ikile bungi, mu kapindji kapeela, mashuwa ababangile kwiyina. Mu aa mafuku Yoona baadi muukye kino kibafundjile kunyima’shi: ‘Yehowa batumine kipapi kii bukopo pa kalunga’ su? T’atuuku nya. Kadi baadi mumone bibaadi basha mashuwa ababanga kuteka b’efile baabo belekeenelekeene, na ashinguula’shi b’efile baabo ta mbalombeene kwibakwasha sunga nkapeelapeela. (Lv. 19:4) Yoona bafundjile’shi: ‘Mashuwa abakyebanga kutanyika.’ (Yoona 1:4) Na mushindo kinyi ubaadi Yoona mulombeene kuteka Efile Mukulu abaadi asuuku?

12. (a) Bwakinyi tatwi balombeene kutopeka Yoona musango umune bu bibaadi mulaale nsaa ya kipapi ki bukopo? (Tala mayi e kuushi kw’esaki.) (b) Mmushindo kinyi ubaadi Yehowa muleeshe yawa baadi mufwishe ano malwa?

 ¹² Bu bibaadi mupushe’shi ta mulombeene kukwasha baaba bantu na kantu su nkapeela, Yoona bayikile mu kadimbo kabaadi muushi mwa mashuwa na nkupeta mbalo ya kwalama. Aye nkulaala mwanka. b Mukata a mashuwa bapetele Yoona mmulaale, aye nkumubuusha bwa’shi asambile efile aaye bu abikitshi bantu booso. Bu bibaadi bantu booso be mu bwato bashinkamishe’shi kino kipapi ki nka na mwanda kampanda, ababangile kuta bubale bwa kuuka’shi nnanyi baadi mwibafwishiishe aa malwa. Kushii mpaka, Yoona babangile kutuputa nsaa ibaadi amono bangi bantu abatuuku’shi ta be na mwanda. Mu kapindji kapeela, abo nkukwata yawa muntu. Yehowa ndjo baadi mutume kyakya kipapi, aye nkukita bwa’shi bubale bukwate yawa muntu​—Yoona!​—Badika Yoona 1:5-7.

13. (a) Yoona baadi mutonde kinyi kumpala kwa basha mashuwa? (b) Yoona bebalungwile bwa’shi bamukite kinyi, na bwakinyi?

¹³ Yoona nkuleesha myanda yooso pa butooka. Baadi mufubi a Efile Mukulu sha bukome booso, Yehowa. Uno ndjo Efile Mukulu abaadi asuuku na abaadi mutombokyele, aye nkwibatwesha mu masaku akata. Bano bantu abaadi bakalakashwe ngofu; Yoona baadi mwimwene byabakwete kusuusa. Abo nkumwipusha akitungu’shi bamukite bwa’shi bapaashe mashuwa na myuwa yabo. Bebalungwile kinyi? Pangi Yoona baadi mutshiine nsaa ibaadi anangusheena pakwete kwiyina mu meema e mashika na akwete kutunkakana. Kadi mbikunyi bibaadi mulombeene kutadiila bwa’shi baaba bantu booso bafwe aku namu auku’shi e bya kwibapasha? Ndjo aye nkwibalungula’shi: “Ntentuleeyi nungyele mu meema bwa’shi abatame; nauku kalolo’shi nyi mpa mwanda wande pabeenwibwela kino kipapi.”​—Yoona 1:12.

14, 15. (a) Mmushindo kinyi watudi balombeene kwambula lukumiino lwa Yoona? (b) Bano basha mashuwa abaadi bakumiine nka musango umune bibebalungwile Yoona su?

¹⁴ Bino bishima bya Yoona abileesha’shi tabaadi na moo nya. Bibaadi bisangashe eshimba dya Yehowa p’aye kumona kunyinga kw’eshimba kwa Yoona, kikudi kyaye kya kwilambula mu kyakya kipungo kibukopo. Pano tubamono bi bukopo bwa lukumiino lwa Yoona. Twi balombeene kumwambula lelo uno nsaa y’atutuulu buwa bwa bangi pa mbalo ya kumpala. (Yo. 13:34, 35) Su tubamono muntu e mu lukalo lwa kintu kampanda kya ku mbidi, mu kinangu, sunga mu kikudi, twi balombeene kwitatshisha bwa kumukwasha su? Su twakita byabya, atusangasha Yehowa ngofu!

 ¹⁵ Pangi bino bibaadi Yoona mulungule basha mashuwa bwa’shi bakite bibaadi bibakalakashe, mwanda, pabebalungwile kumpala abaadi bapele! Pa mutwe pa kukita byabya, abo nkukita mwabo mooso bwa kukambila kipapi​—kadi bibaadi nka bu abeele mu meema. Kipapi kibanyishiishe kukaamina. Kunyima abo nkumona’shi tabe na kya kukita nya. Abo nkwela musaase kwi Efile Mukulu a Yoona Yehowa bwa’shi ebafwile lusa, na babatentwiile Yoona, bamwela mu meema, aye nkwiyina.​—Yoona 1:13-15.

16, 17. Banda kuleesha kibaadi kifwile Yoona nsaa ibaabadi bamusumbule mu meema. (Tala dingi kifwatulo.)

¹⁶ Yoona batukiile mu mbunda-mbunda ya meena. Pangi atompo kuywa bwa’shi t’eyinanga, na kwete kumona mashuwa akwete kwenda na kwitola kula naye na mpumo ya meema ibaadi mashuwa aalekye ayimwalusha. Yaaya mbunda-mbunda ya meema ibabangile kumwina. Aye nkwiyina nka na paashi, na nkushimisha lukulupilo looso lwa kupanda.

¹⁷ Yoona baadi muleeshe kunyima bibaadi mupushe yaaya nsaa. Babangile kutentekyesha ingi myanda. Anangusheena na kwinyongola kooso’shi tamono dingi ntempelo a Yehowa mukile buwa a mu Yeelusaleme nya. Baadi epusha bu ayiki mpa na paashi, peepi na mbalo ibaadi  bitako bya myengye, mwamwa ndjo mubaadi bilembwelembwe bibaadi bimulamate aye ooso. Bamwene’shi kwaye kubaapu, bapu kifika mu mashaama.​—Badika Yoona 2:2-6.

18, 19. Nkinyi kibaadi kifwile Yoona pabaadi muushi a meema? Nkintu kinyi kibaadi kimumine, na nnanyi baadi mwikitume? (Tala mayi e kuushi kw’esaki.)

¹⁸ Kadi kubakitshikile ungi mwanda! Kubaadi kintu kibaadi akisaana peepi naye​—kubatuukile kintu kifiita kikata. Akifiki na kwifubwila kwadi. Kibabuula mukanwa, kibamuminyi.

¹⁹ Aye nkwamba’shi kwande kubaapu. Aku namu Yoona baadi apusha moo. Kadi kii na muuwa! Wawa mushipa ta ngumusume, kumudya sunga muwa taubaadi umutshibikye nya. Baadi nk’ayooka, aku e mu mbalo ibaadi ilombeene kwikala bu mashaama aaye. Ku kapeela kapeela, Yoona nkubanga kupusha moo. Kushii mpaka, Efile Mukulu aaye Yehowa ndjo “batumine mushipa ukata bwa kumina Yoona.” c​—Yoona 1:17.

20. Luteko lwa Yoona pabaadi munda mwa mushipa ukata alwitulongyesha kinyi?

²⁰ Minite nkukila, mpa na nsaa. Mu wawa mufito washamwene kasha bamutanda, Yoona beshinkile mu binangu aye nkwela luteko kwi Yehowa Efile Mukulu. Twi balombeene kupeta malongyesha ebungi pabitale luteko lwa Yoona lwi mu Yoona shapitre 2. Bino abileesha’shi Yoona baadi na kiukilo kikata kya Bifundwe, mwanda baadi muteemune myanda i mu mukanda wa Misambo misango ikile bungi. Mu luno luteko balesheshe dingi eyikashi di na muulo ukata: Lutumbu. Yoona baadi mufudiishe luteko lwaye bino: “Bwande’mi, naayimbi musambo wa lutumbu, nkulambule milambu, nkumbashe kulaa kwande. Yehowa ngi sha-kipandjilo!”​—Yoona 2:9.

21. Elango kinyi dibaadi Yoona mupete pabitale kupaashibwa, na twi balombeene kutentekyesha elango kinyi di na muulo?

²¹ Mu yaaya mbalo i pa bwayo​—“mu mala a mushipa”​—Yoona baadi mushinkamishe’shi Yehowa mmulombeene kupaasha muntu ooso, by’ekala mbalo kinyi sunga nsaa kinyi. Sunga mmwamwa, Yehowa baadi mumumone na kupaasha mufubi aaye. (Yoona 1:17) Anka penda Yehowa ndjo mulombeene kulama muntu na muwa munda a mafuku asatu bufuku na kaanya  munda mwa mushipa ukata. Mbikile buwa kutentekyeshe lelo uno’shi Yehowa mmwikale “na mwuwa wobe mwiyaasa dyaaye.” (Dan. 5:23) Muwa wetu ooso, bumuntu bwetu booso bi nka mu maasa mwaye. Atuleesha namu lutumbu kwadi su? Su mbyabya twikale atumuneemeka.

22, 23. (a) Mbikunyi bibaadi lutumbu lwa Yoona lutompibwe? (b) Kileshesho kya Yoona nkilombeene kwitukwasha naminyi nsaa y’atukitshi bilubilo?

²² Kadi twi kwamba kinyi pabitale Yoona? Aye namu baadi mupete elango dya kuleesha lutumbu kwi Yehowa paaye kumukookyela su? Oolo. Kunyima kwa mafuku asatu, mushipa ubafikile na Yoona ku kyèese awo ‘nkulasa Yoona pa nsenga yuume.’ (Yoona 2:10) Banda kunangusheena​—kunyima kwa yaaya myanda yooso, Yoona tabaadi mwitatshishe bwa kuywa bwa nkafika kwifwa nya! Sunga mbyabya, bibaadi abitungu’shi akimbe eshinda dya kwenda bwa nkafika ku Ninive. Kadi mu kapindji kapeela, lutumbu lwaye alutompibwa. Mukanda wa Yoona 3:1, 2, auleesha bino: “Eyi dya Yehowa dibaafikile dimo ku matwi a Yoona: ‘Ebwee, wende ku Niniive, lupata lukata, webatemukile bino byankuukisha.’” Yoona baadi mulombeene kukita kinyi?

²³ Tabaadi mwialasheene nya. Atubadika bino: “Yoona beebwele, baayiile ku Niniive, aye nkulonda bibaakwile Yehowa.” (Yoona 3:3) Oolo, baadi mukookyele. Binyibinyi, baadi mupete elango dikata ku bilema byaye. Atwe namu twi balombeene kwambula lukumiino lwa Yoona. Atwe booso atukitaa milwisho; atukitaa bilubilo. (Lom. 3:23) Yaaya nsaa atubofulaa, su atupetelaa elango ku bilubilo byetu na kubanga kufubila dingi Yehowa na kukookyela kooso su?

24, 25. (a) Yoona bapetele efuto kinyi? (b) Mmiloo kinyi ayitengyela Yoona mu mafuku e kumpala?

²⁴ Yehowa baadi mufute Yoona pa mwanda wa kukookyela kwaye su? Oolo. Ku lungi lupese, Yoona baadi mupushe’shi basha mashuwa abaadi bapande. Kipapi kibataadile musango umune kunyima kw’aye kukumiina kutuusha muwa waye na baaba bantu abaadi mu mashuwa nkubanga “kutshiina Yehowa bikata” na abo nkubanga kumulambula milambu pamutwe pa kulambula b’efile baabo ba madimi.​—Yoona 1:15, 16, EEM.

²⁵ Ku lungi lupese, efuto dikata dibaadi difikye kunyima. Yesu baadi mufube na mafuku abaadi Yoona mukishe munda mwa mushipa ukata bu kinfwanyi kya mu kimonwa kya mafuku abaadi mulombeene kukisha mu mashaama sunga Sheole. (Bakika Mateo 12:38-40.) Yoona akasangala dingi ngofu nsaa y’akapusha uno mwanda efuku dy’akasanguka bwa kushaala na muwa pa nsenga! (Yo. 5:28, 29) Yehowa akwelela n’obe namu mwabi. Anka bu Yoona, okumiina kulongyela ku bilema byoobe na kuleesha kukookyela na kwipaana bwa bangi su?