1. Kinyongwa kya Maata kibaadi naminyi na kibafikile ku kinyi?

 MAATA baadi kyatentekyesha mashama a mukwabo, bwina bwabadi batentekye ebwe kunundu. Kinyongwa kibaadi kimunemeene kwishimba nka bu ebwe di bushito. Baadi auku kalolo’shi mukwabo Lazaare mmufwe. Mafuku ananka abalondele lufu lwa mukwabo abaadi bukopo kwadi pa mwanda wa maalo, bantu abafiki mu kumutembela, na abafiki mu kumusamba.

2, 3. (a) Kwimoneena na Yesu kubaadi kukwashe Maata naminyi? (b) Mayi abakwile Maata aaleesha kinyi pa bimutale?

² Binobino, muntu mwimane kumpala kwa Maata nyi nkuuku a Lazaare mukata. Pabamono Yesu kinyongwa kibamukaamina, mwanda aye nyi muntu umune baadi mulombeene kupaasha mukwabo. Mwanda wa kukaanya, Maata baadi munyingishiibwe nsaa ibafumankeene na Yesu ku nsongo ya kibundji kya Betani. Nsaa ipeela ibabesambile, Maata basangulukile na kunyinga mbidi pa mwanda wa kalolo, na kifulo kikata kibamuleesha Yesu. Yesu bamwelele nkonko ibamukwashishe bwa kunyingisha lukumiino lwaye pabitale lusangukilo. Mwisambo wabo ubatakwile Maata mu kwakula ano mayi e na muulo ashibaadi mubande kwakula dingi: “Naakumiina’shi we Kidishitu, mwana eEfile Mukulu yaawa baadi naa kya kufika pano pa nsenga.”​—Yowano 11:27.

³ Nka bu abileesha ano mayi, Maata baadi mwana mukashi e na lukumiino lukata. Myanda yaaye ipeela yabadi bakule mu Bible ayitupa malongyesha akata aetukwasha bwa kunyingisha lukumiino lwetu. Bwa kwibishinkamisha, tubandeyi kutaluula mwanda wa Maata wa kumpala wabadi baleeshe mu Bible.

4. Kifuko kya Maata kibaadi kyenyi kwi Yesu naminyi, na abaadi mu kipwano kinyi na Yesu?

⁴ Myeshi ipeela kumpala, Lazaare baadi na muwa na mbidi bukome. Baadi elumbuula bwa kutambula mwenyi mukata, Yesu Kidishitu kwaye ku nshibo mu Betani. Lazaare, Maata na Madiya abaadi bantu bapya kwi Yesu​—abaadi bana ba muntu bashaale mu  nshibo immune. Bangi bantu abakimbulaa myanda abapwandikisha’shi Maata nyi baadi mukulu a booso, mwanda aye nyi baadi akitshi myanda bu nsha nshibo na ingi nsaa abamutemuna’aye kumpala. (Yowano 11:5) Ta kwi mushindo wa kuuka su umune a kwabadi baadi mwibakilwe nya. Anka byabekala bebakile sunga bukupi, abaadi ba kuuku ba p’eshimba ba Yesu. Pabaadi alungula mukandu wibuwa mu Yudea, mubafumankeene na kubingwabingwa kwibungi, Yesu baadi mushaale kwabo. Kushii mpaka, baadi musankile butaale na bukwashi bubaadi mupete mu nshibo yaabo.

5, 6. (a) Bwakinyi Maata baadi na midimo ibungi pabafikile Yesu mu kwibatala? (b) Madiya bakitshiine kinyi pabafikile Yesu mu kwibatembela?

⁵ Maata baadi na bibungi bya kukita bwa kulumbuula mu nshibo bwa kukuukila Yesu. Baadi nka na mifubo ibungi ya kukita na baadi afubu na kisumi kyooso. Ngi bibaadi mukite mpa nka na pabafikile Yesu. Batekyele kibaa ki na byakudya bibungi bwa mwenyi aabo mukata na bantu abamushindjikiile. Kunyima, babebatambwile na muloo ooso. Nsaa ibafikile Yesu, abaadi bamukuukile na kwififyena, kumufuula sandale, kumutumpa meema ku mikoolo na kumwela mwimu wa malaashi ku mutwe. (Badika Luka 7:44-47.) Abaadi bakite byooso abitungu bwa kumulumbulwila mbalo ibuwa na kumupa kidiibwa.

⁶ Maata na Madiya babaadi bepaane mu kulumbuula kufika kwa Yesu. Sunga bibaadi abimweka Madiya bu’ye mutuule binangu ku myanda ya mu kikudi, kumpala baadi mubande kukwasha mukwabo bwa kuteeka. Anka kunyima kwa Yesu kufika, myanda ibaadi ishintulukye. Yesu nkumona bu nsaa ipwandikiile kulongyesha! Mu kwilekeena na balambukishi abaadi mu aa mafuku, Yesu baadi anemeka bana bakashi na nkwibalonyesha pabitale Bufumu bw’Efile Mukulu, bubaadi bu mutwe wa mwanda wa bulambukishi bwaye. Madiya baadi musangeele bwabwa bulambukishi aye nkushaala pa ngwa ya Yesu bwa kuteemesha.

7, 8. Bwakinyi Maata bafiitshile munda, kunyima balesheshe nsungu yaaye naminyi?

⁷ Twi kumona mu binangu bibabangile Maata kufiita munda. Midimo ya kuteeka bidiibwa bibungi bwa kukuukila beenyi ibaadi inyishe kumufiitshisha munda na kukumbakasha binangu byaye. Babangile kunyenga mpala na kwela misodya nsaa yakwete kukindakana na kumona mukwabo mukashi mushale kushi kumukwasha su? Ta bya kwitukemesha su baadi mwibikite. Tabaadya kukita yaaya midimo yooso penda bupenka bwaye nya!

⁸ Ku nfudiilo, Maata tabaadi na mushindo wa kwishikila na nsungu yaaye nya. Batshibile Yesu mwisambo, bwa kushikuula ki mwishimba dyaaye na kwakula’shi: “Mwanana, bino taabikukitshi kintu apandekye mukwetu mukashi bupenka ku mufubo? Byabya,  mulungule bwa kunkwasha.” (Luka 10:40) Bino bishima bibaadi bukopo. Akupu batekyele Yesu bwadya kulungula Madiya bwa’shi akamukwatshisheene.

9, 10. (a) Yesu balulwile Maata naminyi? (b) Atuuku naminyi’shi Yesu tabaadi mwate mudimo wa Maata na muulo upeela?

⁹ Lwaluulo lwa Yesu lubaadi lukemeshe Maata, nka bu byalukwete kukemesha bangi bantu ababadika Bible. Bamulungwile na kalolo kooso’shi: ‘Maata, Maata okalakala, na wekupilakupila bwa bintu bibungi. Kwi nka kintu kimune ki na mwanda. Madiya basangula kikile buwa, kyaakya kishaakikamwatshiibwa.’ (Luka 10:41, 42) Yesu baadi akyebe kwakula kinyi? Baadi akyebe kwamba’shi Maata mmufule bintu bya ku mbidi kukila Efile Mukulu? Baadi mubepuule mudimo waye wa kulumbuula bidiibwa su?

¹⁰ Nya. Yesu balesheshe patooka’shi binangu bya Maata abileesha kifulo na mbitookane. Mu kwakula kalolo, Yesu ta mumone’shi kupokyela beenyi kwi bubi nya. Mafuku apeela kumpala bakuminyine kupetekyelwa ku “kyakudya kikata.” (Luka 5:29) Yesu tabaadi akwila kya kudya kya Maata nya; nyi myanda yaadi mutuule pa mbalo ya kumpala. Baadi mukambe kwipaana mu kuteeka kidiibwa mu mushindo ubaadi mukutwe kuuka mwanda wi na muulo ukata. Mwanda kinyi?

11, 12. Yesu baadi mulangye Maata na kalolo naminyi?

¹¹ Yesu Mwana a eleka a Yehowa Efile Mukulu, baadi mu nshibo ya Maata alongyesha bya binyibinyi. Kubaadi kintu ki na muulo kukila kidiibwa kibuwa kibaadi ateekye. Kushii mpaka Yesu baadi mupushe bibubi mwanda Maata baadi mukutwe kupetekyelwa pa ino mbalo ibaadi mulombeene kutamisha lukumiino lwaye, kadi bamulekyele bwa’shi esangwile aye nabeene. a Maata baadi na matalwa a kwisangwila aye nabeene kya kukita, anka tabaadi na matalwa a kukitshisha Madiya bwa’shi akutwe kuteemesha Yesu nya.

¹² Ngi bwakinyi Yesu baadi mushintuule mweneno a Maata na kalolo kooso. Baadi mwitanyine maata misango ibidi n’eyi diikye bwa’shi eshinkye, na kumushinkamiisha’shi tabitungu ‘akalekale, na kwikupilakupila bwa bintu bibungi’ nya. Bamulungwile’shi pakudi bidiibwa bya mu kikudi, bidiibwa bipeela mwilonga dimune sunga abidi mbilombane. Nyi bwakinyi tabaadi mulombeene kukutshishwa Madiya ku  kintu “kikile buwa” kibaadi kisangule bwa kumuteemesha Yesu nya!

13. Kipaso kibaadi Yesu mulangye Maata ki kwitulongyesha kinyi?

¹³ Twi balombeene kulonga myanda ibungi ku uno mwisambo. Tatwi bya kuleka kintu su nkimune bwakidya kwikala na muulo kukila “lukalo lwetu lwa mu kikudi.” (Mat. 5:3) Su atukyebe kwambula kalolo ka Maata na kwikala bafubi bebuwa, tatukumanga ‘kukalakala na kwikupilakupila’ bwa mwanda wi na muulo upeela wetukutshishwa myanda i na muulo ukata. Patwipeteena na bakwetu, ki na muulo ta mpenda kwibakwasha sunga kwibapa bidibwa bibungi nya, kadi nkwinyingisheena na kwikankamisheena mu kikudi nyi kwi na muulo. (Badika Beena-Looma 1:11, 12.) Sunga twakutwa kwibapa bidiibwa bibungi, twi kwinyingisheena nabo.

14. Bwakinyi twi kwakula’shi Maata nyi kileshesho kibuwa pabitale kukumiina elango?

¹⁴ Maata baadi mukumiine elango dya Yesu na kupetela dilongyesha kwanka su? Oolo. Mu mwanda ubafundjile Yowano mutumibwa pabitale bakwabo na Maata, etutentekyesha’shi: “Yesu baadi mufule Maata na mukwabo mukashi, na Lazaare.” (Yowano 11:5) Kubaadi kukile myeshi ibungi kunyima kwa Yesu kufika mu Betani bu byabidi bileshibwe kunundu. Kushii mpaka, Maata tabaadi mukwate nsungu bwa elango dya kifulo dibamupeele Yesu nya. Baadi mwidyate na muulo. Mu uno mwanda dingi Maata mmwitulekyele kileshesho kibuwa kya lukumiino, mwanda takwi su ngumune a munkatshi mwetu shii na lukalo n’elango ingi nsaa.

15, 16. (a) Maata bakitshiine kinyi pababangile mukwabo kukumba? (b) Bwakinyi lukulupilo lwa Maata na Madiya lubabofwile?

¹⁵ Nsaa ibaadi ndumyanaye mukumbe maladi, Maata bakitshiine kyooso kibaadi akitungu kukita. Bakitshiine kyooso kibaadi mulombeene kukita bwa kumunyingisha bwa’shi ekale bibuwa. Anka, mukumbo wa Lazaare ubaadi awende nka na kukaamina. Nsaa yooso nkashanaye baadi ku lupese lwaye bwa kumupasukila. Misango ibungi pabaadi apatala Maata mukwabo baadi akumbu, baadi atentekyesha bipwa bibungi byabapu kushala pamune mu dikyenga na mu muloo na kwikwatshisheena!

¹⁶ Pabamwene Maata na Madiya’shi Lazaare bakabilwa, abatumine mukyendji kwi Yesu. Bakitshine mafuku abidi mwishinda na kulungula mukandu wibuwa bwa kufika kwabadi. Babatumine mayi apeela kwi Yesu bwa kumulungula’shi: “Mwanana, oodi mufule kwete kukumba.” (Yowano 11:1, 3) Abaadi abauku’shi Yesu baadi mufule Lazaare na kwikala na lukumiino’shi baadi na kya kukita kyoso akitungu bwa kukwasha kuuku aaye. Abaadi abakulupila’shi Yesu baadi na kya kufika kumpala kwa’shi Lazaare akabilwe su? Su naabyo, lukulupilo lwabo lubadi lupwe mwanda Lazaare bafwile.

17. Bwakinyi Maata baadi mwinyongole, na nkinyi kibakitshine pabapushishe’shi Yesu e peepi na kibundji?

¹⁷ Maata na Madiya babadidile mukwabo, bakimba bya kumushiika na kutambula beenyi bebungi ba ku Betani na ba ku bibundji bibefunyishe. Abakitshine byabya byoso kushi kupusha mbalo i Yesu. Bu bibaadi bikile mafuku ebungi, bi kwikala’shi Maata baadi munyiishe kwinyongola. Kunyima kwa mafuku ananka na Lazaare kufwa, Maata bapushile’shi Yesu e peepi na kibundji. Bu bibaadi mukashi e na kishima, sunga mbibaadi na kinyongwa, Maata bakatukile kushi kuukisha Madiya enda mu kufumanka na Yesu.​—Badika Yowano 11:18-20.

18, 19. Maata baadi na lukulupilo kinyi, lukumiino lwaye lubaadi lumwenekye naminyi?

 ¹⁸ Maata pabamwene Yesu, babangile kumulungula mwanda wabadi nao kwishimba na Madiya: “Mwanaana, su boodya kwikala panka, mukwetu tabaadya kufwa nya.” Kadi Maata baadi nka na lukulupilo. Balungwile dingi Yesu’shi: “Anka sunga mbinobino dimo, naawuku’shi kyooso kyotekye kw’Efile Mukulu, akupa kyanka.” Musango umune Yesu nkumulungula ano mayi bwa kumunyingisha: “Mukwenu asanguka.”​—Yowano 11:21-23.

¹⁹ Maata anangusheena’shi Yesu kwete kwisamba bwa lusangukilo lwi kumpala nyi bwakinyi bamwalwile’shi: “Naawuku’shi asanguka nguba a kusanguka, mwifuku dya nfudiilo.” (Yowano 11:24) Baadi na lukumiino lunyingye mu lwalwa lukulupilo. Bangi balambukishi ba mu bipwilo bya beena Yuuda baabetamina bu Baasaduseo abaadi abapele’shi takwikala lusangukilo nya, aku namu mwanda wa lusangukilo ubaadi upatuulwe kalolo mu  Bifundwe biyokyelwe. (Nda. 12:13; Mak. 12:18) Maata baadi auku’shi Yesu baadi mulongyeshe bwa lusangukilo akupu abuusha mpa na muntu mufwe​—sunga byekala’shi ta mufwe munda mwa mafuku e bungi bu Lazaare. Tabaadi auku kibaadi akikyebe kukitshika nya.

20. Patuula akipushisha mayi a Yesu abadi baleeshe mu Yowano 11:25-27 na lwaluulo lwa Maata.

²⁰ Yesu bakwile ano mayi ashii bya kwilwankana: ‘Ami nee lusangukilo nee muwa.” Eyendo, Yehowa mmupe Mwan’aye matalwa a kusangula bantu mu nsenga ishima mu mafuku aafiki. Yesu bayipwishe Maata’shi: “Okumiina byabya su?” Ngi Maata nkutuusha lwaluulo lwi bu mutwe wa mwanda wa uno shapitre. Baadi na lukumiino’shi Yesu nyi Kidishitu, sunga Mesiya, na’shi nyi Mwana a Yehowa Efile Mukulu, na Aye nyi abaabadi bakwile kwi batemuki baadi na kya kufika pa nsenga.​—Yowano 5:28, 29; badika Yowano 11:25-27.

21, 22. (a) Yesu balesheshe lusa lwaye bwa bantu abadidi naminyi? (b) Leesha bibaadi bikidikye lusangukilo lwa Lazaare.

²¹ Yehowa Efile Mukulu na Mwan’aye Yesu Kidishitu abataa lukumiino lwi bu lwa Maata na muulo su? Myanda ibaadi ikitshikye kunyima ayitupa lwaluulo. Bayiile kabilo mu kwitanyina mukwabo mukashi. Kunyima, bamwene’shi Yesu benyongwele ngofu pakwete kwisamba na Madiya na bantu bebungi abaadi abadidi. Bamwene mpolo ayituuku ku meeso kwa Yesu p’aye kuleesha kushii buufu abikalaa kinyongwa kya lufu. Bapushishe Yesu kwatumu eyi dya’shi bakatushe ebwe dibaadi dishikye ku mashaama a mukwabo.​—Yowano 11:28-39.

²² Maata muntu akuminaa ku myanda yooso ya Yesu, aye nkwelesha mpaka’shi mbidi yaaye tayibangile kutuuka eshiko, mwanda bapu kukita mafuku ananka na kufwa. Yesu bamwalulwile’shi: “Ntshi mukulungule’shi, su okumiina omono ntumbo y’Efile Mukulu?” Bakuminyine, aye nkumona ntumbo ya Yehowa Efile Mukulu binyibinyi. Yaaya nsaa, Yehowa bapeele Mwan’aye bukome bwa kubuusha Lazaare! Uno mwanda aukyebe kukitshika aushaala ulamate mu binangu bya Maata: Yesu nkwela musaase’shi “Lazaare, tuuka!”; misalakato ya Lazaare ibabangile kupushika mu mashaama, kii na bilamba bibaabadi banyengyeele kitanda kyaye, na atuuku bipeelabipeela ku kibelo kya mashaama. Yesu batumine eyi’shi “mwanguleeyi, numulekye ende!” Na muloo ooso, Maata na Madiya abakunduka lubilo mu kwikwateena biipa na mukwabo. (Badika Yowano 11:40-44.) Kinyongwa kibaadi kwishimba dya Maata kibakatukile musango umune!

23. Yehowa na Yesu abakyebe nkukitshina kinyi, na abitungu okite kinyi?

²³ Uno mwanda awituleesha’shi lusangukilo lwa bafwe ta mwanda wa kupwandjikisha nya; nyi mwanda wa binyibinyi ubaadi  ukitshikye wikale dilongyengyesha dya mu Bible aditupa muloo. (Yoobo 14:14, 15) Yehowa na Mwan’aye abakumiina kufuta basha lukumiino, nka bu bibaabafutshile Maata, Madiya na Lazaare. Abakakufutu n’obe namu su bolama lukumiino lwibukopo.

24. Mmayi kinyi a nfudiilo abadi bakule mu Bible pabitale Maata?

²⁴ Bible akula mwanda wa Maata misango ibungi. Kubaadi ku mbangilo kwa lubingo lubaabayipayile Yesu. Bu bibaadi auku makyenga abaadi aamutengyela ku nfudiilo kwa lwalwa lubingo, Yesu bayiile mu kutembela ba kuuku baaye. Bwa kwenda ku Betani Yesu batambukile bilometre 3 kukatuka ku Yeelusaleme. Yesu na Lazaare abaadi abadi ku nshibo ya Simone muntu baadi na nsudi, na mu yaaya nsaa abaadi bakule ano mayi a nfudiilo atale Maata: “Maata baadi aaba bintu.”​—Yowano 12:2.

25. Bwakinyi mmwabi ukata kwi tukongye wa kwikala na bakashi be bu Maata?

²⁵ Pano atumono’shi Maata mmukashi a kishima! Pabesambila mwanda waye bwa musango wa kumpala mu Bible baadi afubu; pabamwisambila bwa musango wa nfudiilo kwete kufuba dingi, etatshisha bwa kulombasha nkalo ya bantu baadi mushaale nabo. Nyi mmwabi ukata kwi tukongye twa beena Kidishitu lelo uno wa kwikala na bakashi beena Kidishitu abalondo kileshesho kya Maata—abaleesha misusa yooso lukumiino mwi Yehowa pa kumufubila n’eshimba dimune na kukwasha bangi. Maata baadi mutungunukye na kwikala na lukumiiino su? Nyi byabimweka. Kushii mpaka, Maata baadi muyididiile na kwibaka lukumiino lwaye. Luno lukumiino lubaadi lulombeene kumukwasha bwa kukambila bitompwanga.

26. Lukumiino lwa Maata lubamukwashile naminyi?

²⁶ Kunyima kwa mafuku apeela, Maata bapetele kinyongwa kya lufu lwa Nfumwaye Yesu. Kukatusha byabya, ba nsesa babayipayile Yesu abaadi abakimbi dingi kwipaa Lazaare, kadi lusangukilo lwa Yesu lubaadi lunyingishe lukumiino lwa bantu bebungi. (Badika Yowano 12:9-11.) Akupu, lufu lubafikile mu kwabuula kipwano kibaadi pankatshi pa Maata na bakwabo. T’atuuku kalolo pabaabidi bikitshikye nya, anka atuuku’shi lukumiino lwa Maata lubamukwashile bwa kunyingiila mpa na ku nfudiilo. Nyi bwakinyi beena Kidishitu lelo uno be na kya kwambula lukumiino lwa Maata.