1, 2. Mmushindo kinyi ubaadi yawa mukunkushi a kifunda amono bantu baasha lukumiino babadi bakwile mu Bible, na bwakinyi baaba bantu abaadi balombeene kwikala bakuuku be buwa?

 “KWETE KWAKULA pabitale bantu ba mu Bible nka bu bakuuku baaye ba kala.” Ndjo bibaadi byakule ungi mukwetu mukashi kunyima kwa kuteemesha mwisambo wa mukunkushi a kifunda baapu kukula. Baadi mwakule ky’eyendo mwanda yawa mukwetu baadi mukishe bipwa bibungi mu kulonga kw’Eyi dy’Efile Mukulu na kwidilongyesha bantu​—byabidi bifikye mu mushindo wa’shi bantu baasha lukumiino babadi besambile mu Bible mbekale nka bu bakuuku baaye baadi muukye bi nshalelo aabo ooso mushima.

² Obe namu t’omono’shi be bungi ba kwa badi abaadi bakuuku be buwa bukile su? Mbekale bantu ba binyibinyi ku meeso koobe su? Banda kunangusheena’shi nwi mu kutemba okwete kutentekyesha bwa kwiukeena na bantu bu: Nowa, Luuta, Eliya, na Eshitele. We kumona mu binangu bukitshishi bwabadi balombeene kwikala nabo mu muuwa oobe​—abakulungula bishima bibuwa na abikunyingisha!​—Badika Nkindji 13:20.

3. (a) Kulonga pabitale bileshesho bya bantu baasha lukumiino nkulombeene kwitukwasha naminyi? (b) Nkonko kinyi y’atukyebe kutaluula?

³ Mbinyi binyi ku “lusangukilo lwa . . . balulame,” abikala bibofulo bwa kupeta bakuuku be byabya. (Bik. 24:15) Byabya, sunga mbinobino, kulonga pabitale balume na bakashi baasha lukumiino babadi besambile mu Bible nkulombeene kwitukwasha. Mu mushindo kinyi? Mpoolo mutumibwa atuusha luno lwaluulo lwi na muulo: “Nwikale abaambula baaba abakapiana kiakia kibalayilwe, pa lukumiino na lwishinko [lwabo].” (Eb. 6:12, Kilombeeno kipya 2014) Bu bibatubanga kulonga myanda ya bantu baasha lukumiino, tubande kutaluula nkonko ipeela ayitutentekyesha bishima bya Mpoolo: Lukumiino nkinyi, na bwakinyi twi nalo lukalo? Mbikunyi byatudi balombeene kwambula bantu ba kala baasha lukumiino?

4. Bantu abapwandikisha’shi lukumiino nkinyi, na bwakinyi be mu kilubilo?

⁴ Lukumiino nyi eyikashi dibuwa, dikale’shi bantu booso balume na bakashi b’atukyebe kwisambila mu uno mukanda abaadi bedyate na muulo ukata. Lelo uno, bantu bebungi t’abauku akipatuula lukumiino lwa binyibinyi nya. Abamono’shi kwikala na lukumiino, nkunkumiina kushii bishinkamiisho. Kadi bakwete kwidimba. Lukumiino ta nkukumiina kyooso kyabakwete kwakula nya; na dingi lukumiino lwa binyibinyi ta ndukalo bisumanga nya; t’aluleesha nka penda kukumiina nya. Kukumiina  kyooso ky’abetulungula kwi masaku. Lukalo ndulombeene kupwa, na dingi kukumiina penda’shi Efile Mukulu e kwanka ta nkupwa kwa mwanda nya, mwanda “mpaa na bikudi bibi namu mbikumiine, na abisuusaa.”​—Shak. 2:19, Kilombeeno kipya 2014.

5, 6. (a) Lukumiino lweetu ndwimeene pa bintu kinyi bibidi bish’abimweka? (b) Abitungu’shi lukumiino lwetu lushimatshile pa myanda kinyi? Tuusha kileshesho.

⁵ Lukumiino lw’eyendo alubungu byabya byooso. Banda kupusha byabapatuula lukumino mu Bible. (Badika Beena-Ebelu 11:1.) Mpoolo aleesha shi lukumiino lwa binyibinyi ndwimeene pa bintu bibidi byatushii balombeene kumona. Kya kumpala, lukumiino ndwimeene pa bintu bya binyibinyi bikwanka “bishabimweka.” Ano meeso eetu ta ngalombeene kumona ingi myanda ya binyibinyi​—bu Yehowa Efile Mukulu, Mwan’aye, sunga Bufumu bukwete kumunana binobino mwiyilu nya. Kya kabidi, lukumiino lwa binyibinyi ndwimeene pa “bintu abikulupilwa”,​—myanda ishyabandjile kukitshika. Tatwi balombeene kubanda kumona ndumbulwilo mupya akyebe kufwisha Bufumu bw’Efile Mukulu binobino nya. Bino abipatuula’shi lukumiino lweetu mu byabya bya binyibinyi na yaaya myanda y’atukulupila talwi na bishinkamiisho su?

⁶ Ta mbyabya nya! Mpoolo aleesha’shi lukumiino lwa binyibinyi ndwimeene pa bishinkamiisho bi bukopo. Nsaa yw’etanyiina lukumiino bu ‘kishinkamiisho,’ ofubu na kishima kyatudi balombeene kwaluula dingi bu “kintu akitshibi mpaka.” Banda kupwandjikisha’shi kuuku oobe baata kitshibilo kya kukupa nshibo. Babadiila nkupa mikanda ya lupango na bakulungula’shi: “Ino nshibo ipya ngyoobe.” Takulungula’shi okashaala mu aa masaki a mikanda nya; nyi kwamba’shi ino mikanda ayishinkamisha kumpala kwa mbula-matadi’shi ino nshibo tayidi yoobe. Bi mumune namu, lukumiino lweetu lwi na bishinkamiisho na ndushimate pa myanda ya binyibinyi yatudi bakulupile.

7. Lukumiino lwa binyibinyi aluleesha dingi kinyi?

⁷ Byabya, lukumiino lwa binyibinyi ndutale dingi kwikala na lukulupilo lwi bukopo na bishinkamiisho bimeene mwi Yehowa Efile Mukulu. Lukumiino alwitukwasha bwatudya kumumona bu Nsheetu a kifulo na kukulupila’shi milayilo yaaye yooso ayilombana. Kadi lukumiino lwa binyibinyi aluleesha myanda ibungi. Anka bu kintu kikwete kuyooka, abitungu twiludiishe bwa’shi lunyishe kutama. Abitungu lumwekye mu bikitshiino, bisumanga alufu.​—Shak. 2:26.

8. Bwakinyi lukumiino lwi na muulo ukata?

⁸ Bwakinyi lukumiino lwi na muulo ukata? Mpoolo aluula luno lukonko patooka. (Badika Beena-Ebelu 11:6.) Tatwi balombeene kwifubwila kwi Yehowa sunga kumusangasha su tatwi na lukumiino nya. Katupwito sunga kepatshila kakata na ke na muulo bwa kipangwa kyooso kii na kinangu nkwifubwila peepi na kutumbisha Nsheetu a mwiyilu Yehowa.

9. Mmushindo kinyi auleesha Yehowa’shi mmukye lukalo lwatudi nalo lwa kwikala na lukumiino?

⁹ Yehowa auku bi lukalo lwetu lwa  lukumiino, nyi bwakinyi etupa bileshesho bya kwitulongyesha mushindo watudi balombeene kwibaka na kuleesha lukumiino. Mmutuule mu kakongye ka beena Kidishitu balume baasha lukumiino na baasha bileshesho bibuwa abetukunkusha. Na etulungula’shi: “Nwambule lukumiino lwabo.” (Eb. 13:7) Ta mufudiile nka paapa nya. Mpoolo baadi mufunde pabitale “kisaka kikata . . . kya tumonyi,” balume na bakashi ba kala babaadi betulekyele bileshesho bibuwa bya lukumiino. (Eb. 12:1) Mpoolo ateemuna mulongo wa bano baasha lukumiino babadi bateemune mu Bena-Ebelu shapitre 11 , aku namu ta mbooso nya. Mu Bible mwi myanda ibungi ya binyibinyi yabadi balonde itale balume na bakashi, bakulu na bakinga, batuukye mu ma mbalo elekeenelekeene. Be na myanda ibungi ya kwitulongyesha, bikishekishe atwe be mu kipungo ki bantu bakutwe lukumiino.

10. Mbikunyi bilombeene kwilongyela kwetu kwa pa bupenka kwitukwasha bwa kwambula bantu baasha lukumiino abasanganyibwa mu Bible?

¹⁰ Twe mulombeene kwambula muntu oshii mubande kulondesha kalolo nya. Bu byokwete kutungunuka na kulonga uno mukanda, okamono’shi mbakimbuule myanda ibungi bwa nkukwasha bwa’shi olondeshe kalolo baaba bantu baasha lukumiino. Bwakinyi twe mulombeene kulondoola kalolo na kukimbuula ingi myanda ibatale? Nsaa y’welongyela pa bupenka, eyine na kanyeene mu kukimbuula yaaya myanda ku bukwashi bwa mikanda ya kukimbuula yoodi nayo. Banda kupwandjikisha mbalo yabidi bikitshikye, kupusha by’akula, wemone bu’be baadi panka. Ki na muulo ukata, etatshishe bwa kupusha bibaadi bipushe baaba bantu. Nsaa y’wepaana kwi baaba bantu baasha lukumiino, abekadika bantu ba binyibinyi koodi, weubidisheena nabo ngofu​—bangi abakamweka bu bakuuku boobe bakata ba kala.

11, 12. (a) Mbikunyi byoodi mulombeene kwipusha peepi na Abrahame na Sara? (b) Mbikunyi bilombeene nkukwasha kileshesho kya Aana, Eliya, sunga Samwele?

¹¹ Nsaa y’webauku kalolo, wekala na lukalo lwa kwibambula. Bu kileshesho, banda kunangusheena’shi abakupa mudimo upya wa kukita. Mu ndumbulwilo a Yehowa, be nkuteka bwa kutamisha mudimo oobe mu ungi mushindo. Pangi mbalombeene nkuteka bwa kukatuka mbalo yoodi mushaale bwa kwenda mbalo yabadi lukalo na balungudi bebungi, sunga pangi mbakutekye bwa kubanga kukita ungi mushindo wa bulungudi oomono bu ushii buwa sunga oshii mubiile. Pokwete kutala wawa mudimo na kwela nteko pa mwanda wao, we mulombeene kupeta bukwashi nsaa y’onangusheena ku kileshesho kya Abrahame su? Aye na mukashi aaye Sara abaadi bakumiine kuleka kibundji kyabo kibaadi na nshaleelo e buwa Ure, na Yehowa namu baadi mwibeelele mwabi. Bu by’olondo kileshesho kyabo, okapusha’shi binobino toodi webauku ngofu kukila kumpala.

¹² Mu mushindo umune, su muntu  oodi mwiubidisheene naye akukitshina myanda kushii kaneemo na ayikubofusha​—we mulombeene kupela kwenda mpa na mu bisangilo. Kutaluula kileshesho kya Aana na mushindo ubaadi mupele kulekyela lukalakashi lwa Penina mbalo, mbilombeene nkukwasha bwa kwata kitshibilo kibuwa​—na we mulombeene kumona Aana bu loole oobe a binyibinyi. Mu kipaso kimune, su obofula pa mwanda wemono bu shii na muulo, we mulombeene kwipusha peepi na Eliya nsaa y’oolongo pabitale bibaadi mwinyongole na bibaadi Yehowa mumunyingishe. Na Bansongwa bakwete kufumankana na nkalakashi ayituukila kwi balongi nabo baasha muuwa unyangye mbalombeene kwipusha peepi na Samwele su abaapu kulonga bibaadi mukite pabaadi bana ba Eliya abakitshi myanda ibubi ku tabernakele.

13. Kwambula kwa lukumiino lwa muntu abadi besambile mu Bible akuleesha’shi lukumiino lobe ndwa bisumanga ku meeso kwa Yehowa su? Patuula.

¹³ Kwambula lukumiino lwa baaba bantu babadi besambile mu Bible akuleesha’shi lukumiino lobe ndwa bisumanga ku meeso kwa Yehowa su? Ta mbyabya nya. Banda kutentekyesha, Eyi dya Yehowa aditunyingisha bwa kwambula bantu baasha kulumiino. (1 Kod. 4:16; 11:1; 2 Tes. 3:7, 9) Na dingi, bangi ba ku bantu batukyebe kulonga, abaadi n’abo namu bambule bangi abaadi na lukumiino kumpala kwabo. Mu Shapitre a 17 a uno mukanda, Madiya baadi muteemune mayi a Aana, nyi akileesha patooka’shi baadi mulonde kileshesho kya Aana. Bino bibaadi bibofushe lukumiino lwa Madiya su? Nya! Pa mutwe pa byabya, kileshesho kya Aana kibaadi kikwashe Madiya bwa kunyingisha lukumiino lwaye mu mushindo ubaadi mupete eshina dibuwa kwi Yehowa Efile Mukulu.

14, 15. Mbintu kinyi bi mu uno mukanda, na mushindo kinyi watudi balombeene kutumika nabyo kalolo?

¹⁴ Uno mukanda mbeutuushe bwa nkukwasha bodya kunyingisha lukumiino lobe. Ano ma shapitre aalondo, mbasangishe miisambo ibaadi ayituuku mu Kitenta kya Mulami kubanga mu kipwa kya 2008 na ku 2013, ibaadi na mutwe wa mwanda awamba’shi: “Ambulayi lukumiino lwabo.” Byabya, twi balombashe ingi myanda. Twi batweshe nkonko bwa kwisamba na bantu na kupeta malango. Mbeele dingi bifwatulo bi buwa na abipatuula myanda kalolo nka penda bwa uno mukanda, bingi mbebitamishe na bebilumbuula. Atwi mupete dingi bingi bintu abitukwasha, bu mufunda wa bipungo na ma karte. Mukanda wa Ambulayi lukumiino lwabo ngutuushibwe bwa kwilongyela pa bupenka, mu kifuko na mu kakongye. Bifuko bi bungi mbilombeene kusangeela kubadikanga yaaya miisambo pamune na mayi akaamine.

¹⁵ Atukulupila’shi uno mukanda aukukwasha bwa kwambula lukumiino lwa bafubi ba Yehowa ba kala baasha lulamato. Na aukukwasha bwa kunyingisha lukumiino lobe na kwifubwila peepi na Nsheetu a mwiyilu, Yehowa!