1, 2. (a) Beena Isaleele abaadi mu nshaleelo a mushindo kinyi? (b) Ku mwengye wa Karmele Eliya baadi mufumankane na bulwishi bwa mushindo kinyi?

 ELIYA kwete kutala kibumbu kya beena Isaleele bakookye bakwete kulwa bwa kukaamina Mwengye wa Karmele. Sunga mbyakudi namashika, kukii kafito na mbibofule bwa kumona byabadi bakookye pa mwanda wa bulanda na nsala. Mwiumbo dyabo mubaapu kukita bipwa bisatu na kipindji bya munanga.

² Munkatshi mwabo mwi batemuki 450 ba Baale, bakwete kwitatula na kuleesha’shi mbashikwe Eliya mutemuki a Yehowa. Nfumu mukashi Yezabele baadi mwipayishe bafubi be bungi ba Yehowa, kadi uno muntu kwete kulwa nka bwa kufudiisha lulangwilo lwa Baale. Eliya atungunuka na kutopeka lulangwilo lwa Baale mpa na ku mafuku bungi kinyi? Pangi baaba batshiite-mwakwidi abanangusheena’shi yawa muntu umune ta mulombeene kwibakambila. (1 Bf. 18:4, 19, 20) Nfumu Akabe bafikile n’aye namu, mmukaamine ku etempu dyaye. N’aye namu’nyi mmushikwe Eliya.

3, 4. (a) Bwakinyi Eliya baadi na moo? (b) Nkonko kinyi y’atukyebe kutaluula?

³ Uno mutemuki e mwifuku dilekeene na angi ooso. Bu bibaadi Eliya kwete kutala, baadi ashinguula’shi akukyebe kutuuka looshi lukata pankatshi p’Efile Mukulu na bantu babi. Apusha naminyi nsaa yakwete kumona nguba kwete kukaamina? Tamulombeene kukutwa kutshiina nya, “baadi muntu anka bu’twe.” (Badika Shake 5:17.) Twi balombeene kuuka’shi, Eliya mbamwifunyishe kwi bantu abaadi balekye kulangwila Yehowa, nfumu aabo baadi mutombokyele Yehowa, na ba tshiite-mwakwidi abaadi abayipaa balangwidi b’Efile Mukulu; Eliya baadi mwimone bupenka.​—1 Bf. 18:22.

⁴ Nkinyi kibaadi kitweshe Isaleele mu ano malwa? Na uno mwanda ngukutale naminyi? Tubande kutaluula kilesheesho kya lukumiino lwa Eliya na byakidi kilombeene kwitukwasha ano mafuku eetu.

5, 6. (a) Nkwikakeena kinyi kubaadi mu Isaleele? (b) Mushindo kinyi ubaadi Nfumu Akabe munyishe kutapa Yehowa kwishimba?

⁵ Munda mwa bipwa bi bungi, Eliya basheele abandjila bibaabadi balwiishe lulangwilo lwa Yehowa, kintu kikile buwa kibabadi nakyo mwiumbo  dyabo. Bwemwena obe nabeene’shi, mu Isaleele mubaadi ngoshi munda mwa mafuku ebungi pankatshi pa lulangwilo lwi selele na lwa madimi, pankatshi pa lulangwilo lwa Yehowa na lwa ma nkishi lwa miilo ibefunyishe. Mu mafuku a Eliya, lwalwa looshi lubaadi alunyisha kukaamina.

⁶ Nfumu Akabe baadi mwinyongoshe Yehowa ngofu. Aye nkwibakila Yezabele, mwana a nfumu a Sidone. Yezabele baadi mwate kitshibilo kya kupalakasha lulangwilo lwa Baale mu Isaleele na kushimisha lulangwilo lwa Yehowa looso. Akabe nkubanga kulonda nka kyooso akyakula Yezabele. Akabe nkwibaka ntempelo na kilambwilo kya Baale na aye ndjo muntu a kumpala kubanga kukunamina yawa efile a ba mpangano.​—1 Bf. 16:30-33.

7. (a) Bwakinyi lulangwilo lwa Baale lubaadi bubi? (b) Pabitale bungi bwa mafuku abaadi ayishe munanga mu mafuku a Eliya, bwakinyi twi balombeene kushinkamisha’shi Bible ta mwitupisheene mu ngakwilo aaye? (Tala dingi  kashibo.)

⁷ Bwakinyi lulangwilo lwa Baale lubaadi bubi? Lubaadi alulubisha beena Isaleele, bantu be bungi abapambukile mu eshinda dya Efile Mukulu a binyibinyi. Lubaadi lulangwilo lwi bubi na lwa bukyelo. Mu lulangwilo lwabo mubaadi ba ndumba balume na bakashi, bepaane mu kutambuka lusandji, mpa na kulambula bana baabo mu kaalo bu mulambu. Nyi bwakinyi Yehowa batumine Eliya bwadya nkalungula Akabe’shi akwikala munanga mpa na apakaleesha mutemuki a Efile Mukulu nfudiilo aawo. (1 Bf. 17:1) Kunyima kwa ndambo ya bipwa kumpala kwa’shi Eliya nabeene amwenekyele Akabe na kumulungula bwa’shi abungye mwilo na batemuki ba Baale ku Mwengye wa Karmele. a

8. Uno mwanda wa lulangwilo lwa Baale awitulongyesha kinyi lelo uno?

⁸ Kadi kuno kwikakeena nkwi tutale atwe namu lelo uno naminyi? Bangi mbalombeene kwamba’shi mwisambo wa lulangwilo lwa Baale ta wi na muulo nya, mwanda lelo uno ta kwi ma ntempelo na bilambwilo bya Baale. Kadi uno mwanda ta wi bu mwanda wa kala ushii na muulo kwatudi nya. (Lom. 15:4) Kishima “Baale” akipatuula “sha kintu” sunga “nfumu.” Yehowa baadi mulungule mwilo waye’shi abitungu umusangule bu “baale” aabo, sunga bu mulume aabo. (Yesh. 54:5) Takwi bantu bakwete kulangwila bangi b’efile kushii Efile Mukulu a bukome booso su? Byabya, su bantu bepaana mu nshaleelo aabo mu kukimba kwa makuta, mudimo, kukisha kwa kapapi, kutambuka kwa lusandji, sunga kwipaana kwi b’efile bakile bungi pamutwe pa kulangwila Yehowa, bakwete kusangula aabo nfumu. (Mat. 6:24; badika Beena-Looma 6:16.) Mu ungi mushindo twi balombeene kwamba’shi, myanda ibungi ibaabadi abakitshi mu lulangwilo lwa Baale ikwete kukitshika lelo uno ngofu. Nsaa  y’atunangusheena pabitale kwikakeena kubaadi pankatshi pa Yehowa na Baale nkulombeene kwitukwasha bwa kusangula kalolo pabitale Efile atukyebe kulangwila.

9. (a) Mbikunyi bibaadi Mwengye wa Karmele mbalo ilombane bwa kuleesha’shi Baale nyi efile a madimi? (Tala mayi e kuushi kw’esaki.) (b) Nkinyi kibaadi Eliya mulungule bantu?

⁹ Bu bibaabadi ku Mwengye wa Karmele, bantu abaadi balombeene kumona kalolo​—ku lupongo lwa Kishone mpa na ku Kalunga Kakata (Kalunga ka Meditelanee) kula dya ku myengye ya mu Libano dya kunundu. b Bu bibaadi nguba ende na kukaamina dyadya efuku, bantu babaadi abamono’shi be mu nshaleelo ebubi. Nsenga ibuwa ibaadi Yehowa  mupe baana ba Abrahame ibaadi ipwe kulwila yooso. Tayidi nsenga yuume poo na munanga upukye pa mwanda wa bubi bwa mwilo w’Efile Mukulu unabeene! Bu bibaadi bantu bebungye pamune, Eliya baadi mwibalungule bwa’shi befubwile pepi aye nkwakula’shi: “Anukumbakana byabya na ku nguba kinyi? Su nyi Yehowa mwikale Efile Mukulu mulondeeyi; su Baale, mulondeeyi!”​—1 Bf. 18:21.

10. Mmushindo kinyi ubaadi mwilo wa Eliya ‘aukumbakana,’ na mwanda kinyi wa binyibinyi wi na muulo ubaabadi bayilwankane?

¹⁰ Pabaadi Eliya mwakule’shi: “Anukumbakana” baadi akyebe kwamba kinyi? Uno mwilo taubaadi awuku’shi ubaadi na kya kusangula pabitale kulangwila Yehowa sunga Baale nya. Abaadi abakumiina kulangwila booso babidi pamune​—abaadi abakumiina kusangasha Baale na bipikwa byabo aku namu abatekye myabi kwi Yehowa Efile Mukulu. Pangi abaadi abanangusheena’shi Baale baadi mulombeene kwelela biumbulwanga na bimunwanga byabo mwabi; ku lungi lupese namu “Yehowa sha-bukome booso” ebakalwila ku ngoshi. (1 Sam. 17:45) Abaadi bayilwankane mwanda wa binyibinyi wi na muulo wababash’abapusha kalolo kwi bantu lelo uno. Yehowa t’eabishenaa lulangwilo lwaye na muntu su ngumune nya. Atekye’shi tumulangwile ank’aye nabeene. T’akuminaa lulangwilo looso lusangye na ingi mishindo ya kulangwila!​—Badika Efilu 20:5.

11. Mmushindo kinyi wi bishima bibakwile Eliya pa Mwengye wa Karmele bi kwitukwasha bwa kutaluula dingi lulangwilo lwetu na myanda yatudi batuule pa mbalo ya kumpala?

¹¹ Byabya, baaba beena Isaleele abaadi ‘abakumbakana’ nka bu muntu akyebe kulonda mashinda abidi musango umune. Bantu bebungi lelo uno bakwete kukita kyakya kilema, batadilanga bangi ba “baale” bwa’shi batwele mu nshaleelo aabo na kukumbanga lulangwilo lwa Yehowa ku lupese. Kulonda mwiya wa Eliya wa kupela kukumbakana akwitukwasha bwa kutaluula lulangwilo lwetu na myanda y’atudi batuule pa mbalo ya kumpala.

12, 13. (a) Eliya baadi mutompe bantu na kinyi? (b) Mbikunyi byatudi balombeene kuleesha’shi twi na lukulupilo lwi mumune na lwa Eliya?

¹² Eliya bebalungwile’shi akyebe kwibatompa kapeela. Batekyele ba tshiite-mwakwidi ba Baale bwabadya kwimana pa kilambwilo na kulambula; kunyima batekye efile aabo bwa’shi ashiikye wawa mulambu. Bibaadi abitungu’shi Eliya akite namu nka byabya. Aye nkwamba’shi: “Yawa Efile aluula pa kutuusha kaalo, yawa nyi [Efile Mukulu] a binyibinyi.” Eliya baadi auku Efile Mukulu a binyibinyi. Lukumiino lwaye lubaadi bukopo bukile, nyi bwakinyi baadi mwambe’shi batemuki ba Baale babangye kumpala. Ndjo abo nkwata ngombe mulume bwa kulambula na kulangwila Baale. c​—1 Bf. 18:24, 25.

 ¹³ Tatwi dingi mu kipungo kya bilengyeleshi nya. Kadi, Yehowa ta mwalulukye. Twi balombeene nka kukulupila mwadi bu bibakitshine Eliya. Bu kileshesho, nsaa i bangi bantu abapele akyakula Bible, ta twi balombeene kwibatshiina nya, twi batadiile baleeshe bi mweneno aabo. Anka bu Eliya, atukulupila mwi Efile Mukulu a binyibinyi bwa kupudisha wawa mwanda. Atwibikitshi nsaa y’atupele kwikulupila, kadi tukulupile Mwiyi diyokyelwe dya Yehowa mwanda di kwanka bwa “kulumbuula” myanda.​—2 Tim. 3:16, Kilombeeno kipya 2014.

14. Eliya baadi asepe batemuki ba Baale naminyi, bwakinyi?

¹⁴ Batemuki ba Baale ababangile kulambula mulambu wabo na kwitamina efile aabo. Babaadi abeele musase’shi “Baale, etwaluule!” Abo nkutungunuka na kwela misaase, munda mwa minite, mpa na mwa nsaa ibungi. Bible akula’shi: “Anka takubeekeele eyi sunga lwaluulo.” Pabalombeene midi, Eliya babangile kwibasepa, ebafukuulanga’shi abimweka’shi Baale kwete kufuba ka mudimo kampanda t’amono bya kwibaluula, pangi bende ku kisuku, sunga’shi mmulaale abitungu muntu a kumubuusha. Eliya baadi ebaseesamisha’shi: “Elaayi misaase n’eyi dii bukopo.” Eliya bamwene’shi lulangwilo lwa Baale ndwa bisumanga, na baadi akumiina’shi mwilo w’Efile Mukulu wimwene’shi luno lulangwilo ndwa madimi.​—1 Bf. 18:26, 27.

15. Mmushindo kinyi wi mwanda wa batshiite-mwakwidi ba Baale auleesha’shi kusangula ungi mukunkushi kukaasha Yehowa nyi nkukutwa kwa binangu?

¹⁵ Ku nfudiilo a byoso ba tshiite-mwakwidi ba Baale binangu nkwibatupika, abo nkubanga kwela “misaase ii bukopo, na muyiile kyubishi kyaabo, babeetapile myeele na milumbu, mpaa na bibaabeekeele na mase pa mbidii pooso.” Byooso byabya nka bu abeele mu mema! “Anka takubeekeele eyi sunga lwaluulo, sunga kintu akisaanasaana.” (1 Bf. 18:28, 29) Eyendo, Baale tabaadi kwanka nya. Ibaadi nka penda nangunangu ya Satana bwa kulubisha mwilo wa Yehowa. Kushii mpaka, kusangula ungi mukunkushi kukaasha Yehowa akufwishaa bantu nka ku matope na buufu.​—Badika Misambo 25:3; 115:4-8.

16. (a) Pabaadi mulumbuule kilambwilo kya Yehowa pa Mwengye wa Karmele Eliya baadi alungula mwilo kinyi? (b) Mbikunyi bibaadi Eliya muleeshe lukulupilo mwi Efile Mukulu aaye?

¹⁶ Kunyima kwa midi, nsaa ibalombeene bwa’shi Eliya alambule namu. Aye nkulumbuula kilambwilo kya Yehowa kibaabadi bapwe kusaasula kwi beshikwanyi ba lulangwilo lwiselele. Aye nkulonga mabwe 12, bwa kutentekyesha bantu bebungi ba mu bisamba 10 bya mu  bisamba 12’shi babaadi na kya kulonda Miiya ya Moyiise ibaabadi bape mwilo wa Isaleele. Akupu aye nkubanga kulumbuula mulambu waye na kuusha meena ku bukunkula booso bwa kilambwilo. Aye nkubundula mpa na mukola ku bukunkula bwa kilambwilo na kwimuusha meema. Kunyima kwa’ye kutadiila’shi batemuki ba Baale bakite by’abakumiina bwa’shi kaalo kamone bya kutemba, baadi mukite bintu bilombeene kushima kaalo kumpala kwa Yehowa​—bu bibaadi na lukulupilo lwi bukopo mwi Efile Mukulu aaye.​—1 Bf. 18:30-35.

17. Mmushindo kinyi wi luteko lwa Eliya aluleesha myanda ibaadi mutuule pa mbalo ya kumpala, na mbikunyi byatudi balombeene kwambula kileshesho kyaye mu nteko yeetu?

¹⁷ Nsaa ibalombeene bintu byooso, Eliya nkwela luteko. Luteko lupeelepeele kadi lwi na bukome, aluleesha patooka myanda ibaabadi batuule pa mbalo ya kumpala kwi mutemuki. Kya kumpala, akumiina’shi bantu booso baukye’shi “Efile Mukulu mu Isaleele” nyi Yehowa ta Baale nya. Kya kabidi, baadi akumiina’shi muntu ooso ashinguule’shi akitshi byabya byooso mwanda mmufubi a Yehowa; ntumbo yooso na lutumbu abyende nka wi Efile Mukulu aaye. Ku nfudiilo, baadi muleeshe’shi kwete kwitatshisha bwa mwilo wabo, akumiina’shi Yehowa aalushe ‘mashimba a mwilo waye.’ (1 Bf. 18:36, 37) Sunga mbibabidi’shi kutomboka kwabo kubaadi kufwishe malwa akile bungi, Eliya baadi mutungunukye na kwibafula. Mu nteko yeetu kwi Efile Mukulu, abitungu twikale na kwiyisha na kuteka ngofu pabitale eshina dy’Efile Mukulu, na kuleesha namu lusa bwa bangi be na lukalo na bukwashi.

18, 19. (a) Mbikunyi bibaadi Yehowa mwaluule luteko lwa Eliya? (b) Eliya balungwile bantu bwa’shi bakite kinyi, na bwakinyi tabibaadi abitungu kufwila ba tshiite-mwakwidi ba Baale lusa?

¹⁸ Kumpala kwa’shi Eliya eele luteko, bantu abaadi abeyipusha su Yehowa namu akitshi myanda bu Baale. Kunyima kwa luteko takubaadi dingi bya’shi muntu eyipusha dimo. Bible aleesha bino: “Kaalo ka Yehowa kabaayikile, ako nkushiika mulambu, ntèètè, mabwe, na lufuufi; kabaakamiishe na meema abaadi mu mukola.” (1 Bf. 18:38) Uno mwanda ubaadi wa kukaanya! Kadi bantu abakitshine naminyi?

¹⁹ Abo booso abaadi beele misaase’shi: “Yehowa nyi Efile Mukulu [a binyibinyi]! Yehowa nyi Efile Mukulu [a binyibinyi]!” (1 Bf. 18:39) Ku nfudiilo a byooso, abaukile Efile Mukulu a binyibinyi. Sunga mbyabya, ta mbabande kuleesha lukumiino nya. Bwa kwakula kalolo, kukumiina’shi Yehowa nyi Efile Mukulu a binyibinyi pa mwanda babaamono kaalo akayiki mwiyilu bu lwaluulo ku luteko ta mushindo wibuwa wa kuleesha lukumiino nya. Ndjo Eliya kwibateka bwa’shi baleeshe lukumiino lwabo mu ungi mushindo. Aye kwibateka bwabadya kukita kibaabadi  balombeene kukita bipwa bi bungi kumpala​—kukookyela Miiya ya Yehowa. Mwiya w’Efile Mukulu awakula’shi abitungu kwipaa batemuki booso ba madimi na kusaasula ma nkishi. (Miy. 13:5-9) Baaba ba tshiite-mwakwidi ba Baale abaadi beshikwanyi na Yehowa Efile Mukulu, na abaadi abakitshi bikutwene na mpàngo yaaye mu kikyebe kya mashimba aabo. Abitungu kwibafwila lusa su? Abo namu abaadi bapushe bano bana booso bashii basoole mwanda babaabadi abashiiki mu kaalo bwa kulambula Baale su? (Badika Nkindji 21:13; Yel. 19:5) T’abitungu kufwila baaba bantu lusa sunga nkapeela! Ndjo Eliya nkutuma eyi bwa’shi bebayipee, abo nkwibayipaa booso.​—1 Bf. 18:40.

20. Bwakinyi uno mwanda wa bibaadi Eliya mwipayishe ba tshiite-mwakwidi ba Baale wabakwete kubepuula kushii kabingilo ngwitutale namu na’atwe lelo uno?

²⁰ Lelo uno, bantu bebungi ababepuula myanda ya mu Bible abapende bibaadi bikite Eliya ku nfudiilo pabaadi ku Mwengye wa Karmele. Bangi mbalombeene kutshiina bwa’shi tala bangi balangwidi ba bingi bipwilo bamona’shi uno mwanda awibapa matalwa a kukyengyesha bantu ba mu bingi bipwilo na bukyelo booso. Na, mwanda wa malwa lelo uno, kwi bantu bakile bungi abakitshi myanda y’etombo mu mashina a bipwilo byabo. Byabya, Eliya tabaadi mulamate ku kipwilo kampanda nya. Baadi mwibikite na kululama kooso mwanda baadi aleesha mpala ya Yehowa. Beena Kidishitu ba binyibinyi abashinkamisha’shi ta mbalombeene kwambula Eliya bwa kutwala tupete bwa kwipaa bantu babi nya. Pamutwe pa byabya, abalondo miiya itale balongi booso ba Yesu y’atusangana mu mayi a Kidishitu abalungwile Mpyeele aamba’shi: “Alusha lupete lwobe mu mbalo yaalo; mwanda baaba booso abakakwata lupete abakafwiila ku lupete.” (Mat. 26:52, Kilombeeno kipya 2014) Yehowa akafubu na Mwana aaye bwa kufwisha kululama mu mafuku e kumpala.

21. Bwakinyi Eliya mmwikale kileshesho kibuwa bwa Beena Kidishitu lelo uno?

²¹ Bushito bwa beena Kidishitu ba binyibinyi nyi nkuleesha lukumiino mu mwikeelo wabo. (Yo. 3:16) Mushindo umune wa kwibikita nkwambula lukumiino lwa muntu sha kululama Eliya. Baadi alangwila nka penda Yehowa, na kutakula bangi bwabadya kumwambula. Baadi muleeshe bubi bwa lungi lulangwilo lubaadi Satana afubu nalo bwa kulubisha bafubi ba Yehowa. Pamutwe pa kwikulupila na kumona myanda mu waye mushindo, Eliya baadi mutadiile Yehowa bwa’shi aye afudiishe wawa mwanda. Baadi mukalwile lulangwilo lwiselele. Twambuleyi booso lukumiino lwaye!