1, 2. Leesha bibaadi lwendo lwa Madiya, na nkinyi kibaadi akimukalakasha bwa kushala kalolo ku mpunda?

 MADIYA tabaadi amono bya kushala kalolo ku mpunda baadi mumusemune munda mwa nsaa ibungi nya. Yoosefe baadi atambuka lwa ngwa kumpla kwaye, abaadi abende ku Beteleeme kibundji kibaadi kwibula. Madiya bapushishe dingi mwana kwasana mwifu.

² Madiya baadi n’eyimi dipwe kukoma, Bible akula’shi “Baadi pepi na kutanda mwana.” (Luk. 2:5, Kilombeno kipya) Nsaa ibaadi Madiya na Yoosefe abakidi peepi na mafuba a bantu, pangi abaadi abalekye kudima sunga kukuna bwa kutala kipaso kibaadi Madiya. Bwakinyi Madiya bakatukile kwabo ku Nazarete, enda lwendo lula?

3. Madiya bapetele bushito kinyi na nkinyi kyatukataluula pa bimutale?

³ Byoso bibaadi bibangye myeshi ipeela kumpala, pabaadi uno nsongwakashi mwina Yuuda mupete bushito bwi pabwabo bushapetele ungi muntu. Kutanda mwana a kekala Mesiya, Mwan’Efile Mukulu! (Luk. 1:35) Pabakumbeene mafuku a kutanda, nyi pababangile lwendo lwabo. Nsaa ibaabadi abende, Madiya bafumankeene na nkalakashi ibungi, ibaadi ilombeene kutuula lukumiino lwaye mu kutompibwa. Tubandeyi kutaluula kibamukwashishe bwa kunyingisha lukumiino lwaye.

4, 5. (a) Bwakinyi Yoosefe na Madiya abayile ku Beteleeme? (b) Mbutemuki kinyi bubaadi bukumbane muyiile mwiya wa Kayisa?

⁴ Ta mpenda Yoosefe na Madiya abaadi mu kitungo kya kwenda nya. Kayisa Ongisite batumine eyi bwa’shi muntu eese akabadikwe mu kibundji kyaye kya butandwa. Yoosefe bakitshiine naminyi? Atubadika bino: ‘Yoosefe namu bakatukile ku Ngalileya mu kibalo kya Nazareete, nkwenda ku Yudeya, mu kibalo kia Daavide akiitanyinwa’shi, Beteleeme, pa mwanda baadi a mu nshibo na mwina kifuko kya Daavide.’​—Luka 2:1-4, Kilombeeno kipya 2014.

⁵ Kayisa Ongisite ta batushishe wawa mwiya bisumanga nya. Butemuki bubaadi bupwe kufundjibwa bipwa 700 kumpala,  bubaadi abwakula’shi Mesiya atandjikwa mu Beteleeme. Kubaadi kibundji kya Beteleeme kibaadi mu bilometre 11 na ku Nazarete. Byabya, butemuki bubaadi bushinkamishe’shi, Mesiya akatandjikwa ku “Beteleeme Efrata.” (Badika Mika 5:2.) Bwa kufika mu kaaka kabundji kapeela obakatuka ku Nazarete mwishinda dya ku Samadiya bantu abaadi abakitshi bilometre 130. Yoosefe baadi ende ku Beteleeme, mwanda kibaadi kibalo kya ba nkabwa ba kifuko kya Nfumu Daavide​—mutuukile Yoosefe na Madiya.

6, 7. (a) Bwakinyi lwendo lwa ku Beteleeme lubaadi bukopo kwi Madiya? (b) Kunyima kwa kumwibakila, Madiya baadi mushingule kinyi pabitale kwata kwa bitshibilo? (Tala mayi e kuushi kw’esaki.)

⁶ Madiya baadi mukumiine kukwatshisheena kitshibilo kya Yoosefe bwa’shi banemekye mwiya wa Kayisa su? Lwendo lubaadi bukopo kwadi. Abimweneka’shi babaadi pankatshi pa mpeshi n’eshipo, nyi bwakinyi mpeshi baadi bya kunoka bu bibaadi eshipo adyende na kupwa. Ungi mwanda, Kishima kya’shi ‘bakatukile ku Ngalileeya [akaamina]’ nkikumbane, mwanda Beteleeme badi ku mwengye, bwa nkekufika bibaadi abitungu kukaamina kipindji kya metre 760 na bibaadi abitungu kukaamina myengye na kwalala bwa nkafika ku Beteleeme. Pangi abaadi bakite mafuku ebungi mwishinda, pa mwanda wa Madiya baadi ende na kwikishanga kapindji-kapindji. Aku namu mukashi ooso ki nsongwakashi su taadi peepi na kutanda ekalaa na lukalo lwa kwikala peepi na  kifuko kyaye mpa na balole baye bwa’shi nsaa ya kutanda bamukwashe. Kushii mpaka, bibaadi abitungu ekale n’eshimba dinyingye bwa kwenda.

⁷ Sunga mbyabya, Luuka akula’shi Yoosefe “bayile kwanka na Madiya mpyan’ê akuteela (abaadi mulee kwibakila).” (Luk. 2:4, 5, EEM) Bu bitabaadi mukashi a Yoosefe, ta baadi mulombeene kwiatshila bitshibilo nya. Tabaadi amono’shi mulume aye nyi abanga kukunkusha myanda ya mu kifuko na baadi anemeka bitshibilo byaye bwa kulombasha mudimo ubamupele Efile Mukulu pa kumukwatshishena mu bitshibilo byaye. a Madiya baadi mwate kitshibilo kya kukookyela mulume aye, bino nyi bibaadi muleeshe lukumiino.

8. (a) Nkinyi kibaadi dingi kitakule Madiya bwa kwenda na Yoosefe ku Beteleeme? (b) Bwakinyi Madiya mmwikale kileshesho kibuwa kwatudi?

⁸ Nkinyi kibaadi dingi kitakule Madiya bwa kukookyela? Baadi auku butemuki bwa kutandjikwa kwa Mesiya mu Beteleeme? Bible tamwibileeshe nya. Abimweka’shi Madiya baadi euku, mwanda uno mwanda abaadi bapwe kwiwiuka kwi bakata ba bipwilo mpa na bangi bantu. (Mat. 2:1-7; Yo. 7:40-42) Na dingi baadi auku Bifundwe kalolo. (Luk. 1:46-55) Byabikala’shi baadi  mukumiine kwenda bwa kukokyela mulume aaye, mu kukokyela mwiya wa mbulamatadi, sunga bwa kulombasha butemuki bwa Yehowa​—Madiya mmulekye kileshesho kibuwa. Yehowa aata kwiyisha na kukokyela kwa balume sunga kwa bakashi na muulo ukata. Bu byabidi’shi mu ano eetu mafuku bantu tabakwete kukookyela, kileshesho kya Madiya akitunyingisha bwatudya kwikala na kukokyela.

9, 10. (a) Madiya na Yoosefe abaadi pangi batentekyeshe myanda kinyi nsaa yabaadi abefubwila pepi na Beteleeme? (b) Nkunyi kubaadi Madiya na Yoosefe balale na bwakinyi?

⁹ Abimweka’shi pabamwene Beteleeme ku bula, Madiya bayishishe eshimba. Pababaadi abakaamina tu myengye, abakidila peepi na mafuba a mitshi ya olive​—ibaadi na tukuba tupwe kumonga bwa kuumbula​—Madiya na Yoosefe abaadi pangi batentekyeshe myanda ya mu kino kibundji kipeela. Kabaadi ka kibundji kapeela kabashibaadi balombeene kubadika mu bibundji bya mu Yunda, anka bu bibakwile Mutemuki Mika; kadi ndjo mubaadi mutandikwe Boaze, Naomi na Daavide bipwa nkama kumpala.

¹⁰ Madiya na Yoosefe abasangene kibundji kyooso kiuule na bantu. Bangi abaadi bafikye kumpala kwabo bwa kwifundisha, byabya tababaadi bapete mbalo ya kulala nya. b Babakutshilwe kya kukita, abo nkulala mu kikutu. Banda kunangushena bibaadi Yoosefe mukalakashwe pa kumona mukashi aaye akyengye na mitanyo yashapushishe kasha, ikwete kwenda na kukaamina. Mwamwa mu kikutu ndjo mubaadi mukwatshile Madiya mitanyo ya kutanda.

11. (a) Bwakinyi ba tabo mbalombeene kupusha bibaadi Madiya mupushe? (b) Mmu mishindo kinyi mubaadi Yesu mwikale bu mwana mbedi?

¹¹ Ba tabo mbalombeene kupusha bibaadi Madiya mupushe. Bipwa pangi 4 000 kumpala, Yehowa baadi mwakule’shi bakashi booso abakakyengye na mitanyo pa kutanda mwanda wa mulwisho wabadi bapyane. (Kib. 3:16) Kushii mpaka, na Madiya namu bakyengyele na mitanyo. Mukanda wa Luuka taulesha mitanyo ibaadi Madiya mupete pa kutanda nya kadi aulesha nka’shi: “Aye nkutanda mwan’aye-mbendi mulume.” (Luk. 2:7) Oolo, yawa mwana baadi ‘mwana mbedi’​—mu bana pangi musambo ba Madiya. (Maako 6:3) Uno mwana baadi na kya kwikala mwilekene na bangi. Tabaadi nka penda mwan’aye-mbedi nya kadi “mwana-mbedi a ku bipangwa bioso,” bya Yehowa, Mwana eleka a Efile Mukulu!​—Kol. 1:15, Kilombeeno kipya 2014.

12. Nkunyi kubaadi Madiya muladishe mwana aaye, na kutandjikwa kwa Yesu nkwilekene naminyi na abileesha bantu mu bifwatulo?

 ¹² Mukanda wa Luuka aulombasha’shi: “Bamupombelêle mu bilamba, amuladisha mu kidîlo kya nyema.” (Luk. 2:7) Mu nsenga ishima nsaa yabalesha bibaadi kutandjikwa kwa Yesu mu bifwatulo, abalengyeshaa yaya mbalo. Kadi tubandeyi kutala kibaadi kikitshikye. Madiya bamuladishe mu kidiilo kya nyema. Tentekyeshayi’shi, kubanga kala mpa na lelo uno atwiuku’shi mu kikutu mubaabadi bashale, nyi mbalo ayikalaa butshafu na ayinunkaa eshiko dibubi. Eyendo, takwi baledi balombene kukumiina’shi mwana aabo atandjikwe mu kikutu, su kwi ingi mbalo. Baledi bebungi abakumiinaa’shi bana baabo bekadikye bibuwa. Madiya na Yoosefe abaadi abakumiina’shi mwana a Efile Mukulu ekadikye bibuwa!

13. (a) Mmu mushindo kinyi mubaadi Yoosefe na Madiya bakite kyakya kii na muulo akitunganga kukita? (b) Lelo uno baledi basha binangu mbalombeene kwambula Yoosefe na Madiya naminyi?

¹³ Sunga mbyabya, tababaadi batuule binangu byabo ku yaya nkalakashi nya; abaadi bakite nka kyakya kii na muulo akitunganga kukita. Laminayi’shi, Madiya baadi etatshisha bwa mwana, aye nkumupombela bilamba, akupu nkumuladisha kalolo mu kidiilo kya nyema, na kukita bwa’shi ekale na kibobo na ku mukalwila. Sunga mbibaadi mu uno nshalelo ebubi, Madiya baadi mukite kyooso akitungu bwa kukalwila mwana aaye. Aye na Yoosefe abaadi abauku nyi’shi, kintu ki na muulo ukata nyi nkulongyesha yawa mwana bwa kufula Yehowa. (Badika Miiya Ikituulwe 6:6-8.) Lelo uno, baledi basha binangu bakwete kulongyesha bana baabo myanda ya mu kikudi mu uno ndumbulwilo shikwete kukumiina kufubila Efile Mukulu.

14, 15. (a) Bwakinyi balami abaadi na lukalo lwa kumona mwana? (b) Balami abakitshine kinyi kunyima kwa kumona Yesu mu kikutu kya nyama?

¹⁴ Kubatukiile tuleo mususa umune, tubaadi tutweshe kafutakanyi yaaya mbalo. Balami ba nyema abatwelele mususa umune mu kikutu mu kumona baledi, bikishekishe mu kumona mwana. Bano bantu abaadi na muloo ukata. Abakatukile lubilo ku tumyengye kubaabadi abalama nyema yaabo. c Ababangile kulungula Yoosefe na Madiya pabitale myanda ya kukanya ibabamono kwakwa kwabekalanga. Munkatshi a bufuku, mwikeyile bebamwenekyele mususa umune. Ntumbo ya Yehowa nkwibefunyisha, mwikeyilu  nkwibalungula’shi Kidishitu, sunga Mesiya batandjikwa mu Beteleeme. Ebalungula’shi abakasangana mwana mbamuladishe mu kidiilo kya nyema, mbamupombele mu bilamba. Akupu, ako nkukitshika mwanda wa kukaanya​—kubatukile kibumbu kikata kya ba mwikeyilu kibaadi akitumbisha Efile Mukulu.​—Luk. 2:8-14.

¹⁵ Tabitukaanyisha pa kumona’shi bano bantu basha kwiyisha abafikile lubilo ku Beteleeme nya! Abaadi na muloo wa kumona mwana batandjikwa nka bu bibaadi mwikeyilu mwibalungule. Tababadya kulama uno mukandu wibuwa penda bwabo nya. “Babawukiishe kibaabadi bebalungule . . . Booso babaadi bebapushe babakaanyine bwa bibaadi bibalungule balami ba mikooko.” (Luk. 2:17, 18) Kushii mpaka, bakata ba bipwilo ba mu aa mafuku tababaadi bakumiine bibakwile balami ba mikooko nya. Kadi Yehowa baadi mwate bano bantu basha kwiyisha na be na lulamato na muulo. Bano bantu abaadi banyingishe Madiya naminyi?

16. Nkinyi kibaadi na kya kunyingisha lukumiino lwa Madiya?

¹⁶ Kutanda kubaadi kukokyeshe Madiya ngofu kadi baadi nka atemeesha kalolo byooso byabaadi abakula. Na dingi “Madiya balamanga yaya mianda yooso mwadi’ye, na kwiyitentekyeshanga mwishimba diaye.” (Luk. 2:19, Kilombeeno kipya 2014) Uno nsongwakashi baadi anangushena pabitale yaaya myanda. Baadi auku’shi wawa mukandu wa mwikeyilu ubaadi na muulo ukata. Yehowa Efile Mukulu aye, baadi akumiina bwa’shi Madiya eukye yawa mwana abatanda kalolo na mudimo wakekala nao. Byabya baadi mukite myanda ibungi kushi penda kupusha. Baadi mulamiine byabya bishima kwishimba bwa’shi ekale anangusheena pa byanka misusa yooso mu bipwa abifiki. Bino ndjo bibaadi na kya kunyingisha lukumiino lwa Madiya lubaadi muleshe mu muwa waye ooso.​—Badika Beena-Ebelu 11:1.

17. Nkinyi kyatudi balombeene kukita bwa kwambula lukumiino lwa Madiya?

¹⁷ We kulonda kileshesho kya Madiya su? Yehowa mmuushe bya binyibinyi bi na muulo mu Eyi dyaye. Anka bino bya binyibinyi mbilombeene kwitukwasha su twebiteemesha. Atukitshi byabya patubadika Bible efuku dyoso​—kushi bu mukanda wa myele kadi bu Eyi diyokyelwe n’Efile Mukulu. (2 Tim. 3:16) Akupu, anka bu Madiya, abitungu tulongye na kutentekyesha bya binyibinyi pabitale Yehowa na kunangushena ku byanka. Su atunangushena pa myanda yatulongo mu Bible, na kutumikila malango a Yehowa, atukapa lukumiino lwetu byabya byaludi nabyo lukalo bwa kutama.

18. (a) Mafuku mwanda kunyima kwa kutandjikwa kwa Yesu, Yoosefe na Madiya abakitshine kinyi? (b) Mulambu ubatushishe Yoosefe na Madiya auleesha kinyi pabitale kupeta kwabo?

¹⁸ Mwifuku dya 8 kunyima kwa kutandjikwa kwa mwana, Madiya na Yoosefe abaadi basadishe mwana muyiile Mwiya wa Moyiise, na kumuudika bu Yesu, bu bibaabadi bebalungule. (Luk. 1:31) Na dingi, mwifuku dya 40, abo nkukatuka naye ku Beteleeme nkwenda naye ku ntempelo ku Yeelusaleme, mu bilometre 10, na nkulambula milambu ibaadi bantu balanda abalambula muyiile Mwiya​—makutshi abidi sunga tu nkudimba tubidi. Sunga bibaadi Yoosefe na Madiya bakutwe mushindo wa kutusha mukooko ulume na konyi k’ekusthi bu bibaadi abitusha bangi baledi, abatshishe muyiile kupeta kwabo bwa kukokyela ku mwiya ya Moyiise. Abaadi bebanyingishe nsaa yabakafikile kwanka.​—Luk. 2:21-24.

19. (a) Mmyanda kinyi ibakwile Simeone ibaadi Madiya mulamiine kwishimba? (b) Nkinyi kibakitshine Ana pabamwene Yesu?

¹⁹ Ungi muntu mukulu abetamina bu Simeone bafikile kwabadi na nkulungula Madiya ingi myanda i na muulo yadya kulamiina dingi mwishimba. Abaadi bamulee’shi akamono Mesiya kumpala kwa’shi afwe, na kikudi kya Yehowa kibamulungwile’shi yawa mwana Yesu ndjo Mupaashi abaabadi balee. Simeone baadi dingi mulungule Madiya pabitale nkalakashi yakafumankana nayo. Bamulungwile’shi akapusha nka bu lupete alukatubushena anyima aaye. (Luk. 2:25-35) Sunga’shi aa mayi abaadi aamukwatshisha moo, abaadi amukwashe bwadya kunyingila apakafiki kipungo  kya nkalakashi bipwa 33 kunyima. Kunyima kwa mutemuki Simeone, mutemuki mukashi Ana bamwene Yesu ki mwana na nkubanga kulungula bantu booso abaadi abatengyela kukudiibwa kwa Yeelusaleme.​—Badika Luka 2:36-38.

20. Bwakinyi kitshibilo kibatshile Yoosefe na Madiya kya kutwala Yesu ku Yeelusaleme kibaadi buwa?

²⁰ Yoosefe na Madiya abaadi baate kitshibilo kibuwa pa kutwala mwana ku ntempelo a Yehowa mu Yeelusaleme! Abakwashishe Yesu bwadya kwikala na kyubishi kya kwendanga ku ntempelo a Yehowa. Kwakwa babalambwile Yehowa bintu bya muulo byabaadi nabyo na kupeta malongyesha na kunyingishibwa. Kushii mpaka, dyadya efuku Madiya bakatukile ku ntempelo na lukumiino lunyingye, n’eshimba diule na myanda y’Efile Mukulu, ibaadi mulombeene kunangushena na kulungula bangi.

21. Nkinyi akitungu’shi tukite bwa’shi lukumiino lwetu lutame na lwikale lunyingye bu lwa Madiya?

²¹ Nyi mwanda wibuwa pa kumona ba nambutwile abambula kyakya kileshesho. Munkatshi mwa Batemwe ba Yehowa, ba nambutwile basha lulamato bakwete kutwala bana baabo ku bisangilo bya beena Kidishitu. Bano ba nambutwile bakwete kutusha bintu byabo bya muulo na kunyingisha bakwabo beena kukumina. Na abatuuku mu bisangilo banyingishibwe, be na muloo, na bekale na myanda ibuwa ibungi ya kunyingisha bangi. Nsaa yatwibungu nabo, abitupa muloo ukata! Su twakita byabya, atukamono’shi, lukumiino lwetu alukatama na alukekala lunyingye nka bu lwa Madiya.