1. Nsaa kinyi ibaadi ikile bubi mu nshalelo a Mpyeele?

 MPYEELE tabaadi bya kuluba nsaa ibaadi meeso aaye afumankane na a Yesu. Bamwene’shi eyiso dibamutadile Yesu dibaadi dya kumuleesha bilema byaye sunga dya kumutopeka su? Tatwibishinkamisha nya; anka Bible akula’shi: “Mwanana beekyebwile, aye nkushimika Mpyeele meeso.” (Luk. 22:61) Penda bwa eyiso dibamutadile, Mpyeele bamwene bibaadi kilubilo kyaye. Bakitshine nka bibamulungwile Yesu, aku namu Mpyeele baadi mushinkamishe’shi ta mulombeene kwiukita​—aye nkupela Nfumwaye a kifulo. Ibaadi nsaa ya kinyongwa kikata kwi Mpyeele, pangi efuku dya kinyongwa kikata mu muwa waye ooso.

2. Mpyeele bapetele dilongyesha kinyi na mbukwashi kinyi bwatudi balombeene kupetela ku dyanka?

² Sunga mbyabya, Mpyeele baadi nka na lukulupilo. Bu bibaadi Mpyeele muntu sha lukumiino lukata, baadi nka na nsaa ya kulumbuula bilubilo na kupeta dilongyesha dikata kwi Yesu. Pabitale kufwidisheena lusa. Ooso a kwatudi abitungu apete dyadya dilongyesha, byabya, tubandeeyi kutaluula bibaadi Mpyeele mwidipete.

3, 4. (a) Mpyeele baadi mwipushe Yesu lukonko kinyi, na Mpyeele baadi na binangu kinyi? (b) Yesu baadi muleeshe naminyi’shi Mpyeele baadi na mweneno a bantu ba mu kipungo kyabo?

³ Myeshi pangi isamombo kumpala, mu kibundji kyaye kya butandwa mu Kapernaume, Mpyeele baadi mwifubwile peepi na Yesu amwipusha’shi: “Mwanana, apankitshiina mukwetu kito, mmisuusa bungi kinyi yandya kumufwila lusa? Mpaa na ku misuusa musamboobidi su?” Mpyeele bamwene’shi baadi muntu ebuwa bukile. Akupu, balambukishi ba bipwilo ba mu aa mafuku abaadi abalambukisha’shi abitungu kufwila muntu lusa penda misango isatu! Yesu baadi mwaluule’shi: “Ntankulungula’shi nyaa na ku misuusa musamboobidi, anka’shi nyaa na ku misuusa makumi musamboobibi misuusa musamboobidi.”​—Mat. 18:21, 22.

⁴ Yesu baadi alungula Mpyeele’shi bibaadi abitungu abadikye misuusa yabamukitshina bilubilo su? Nya; anka p’aye kwata  misuusa 7 ya Mpyeele nkwiyifudisha misusa 77, baadi aleesha’shi kifulo takitutakula bwa kwikala na bungi butshintshikile bwa kufwidisheena lusa nya. (1 Kod. 13:4, 5) Yesu baadi muleeshe Mpyeele’shi baadi mwambule mweneno a bantu ba mu kyakya kipungo bashibaadi na kalolo na kukutwa kufwila bangi lusa. Byabya, baaba booso abakyebe kwambula Efile mukulu abitungu bekale abafwila bangi lusa kushii kubadika.​—Badika  1 Yowano 1:7-9.

5. Nsaa kinyi yatudi balombeene kulonga bibungi pabitale kufwidishena lusa?

⁵ Mpyeele tabaadi mutupakane na Yesu nya. Kadi bibaadi Yesu mumulongyeshe bibaadi bimukume kwishimba su? Ingi nsaa atulongo myanda ibungi pabitale kufwidisheena lusa nsaa yatudi na lukalo lwa’shi betufwile namu lusa. Byabya tubandeyi kutaluula myanda ibakitshikile bufuku kumpala kwa lufu lwa Yesu. Mu yaya nsaa ibukopo, Mpyeele baadi mukite bilubilo bibungi bibaadi abitungu’shi Nfumwaye amufwile lusa.

6. Mpyeele bakitshine kinyi pabaadi Yesu ebalongyesha pabitale kwiyisha, kadi Yesu bakitshine naminyi?

⁶ Kibaadi kyolwa ki na muulo ukata​—kya bufuku bwa nfudiilo bwa muwa wa Yesu pa nsenga. Yesu baadi ki na myanda ibungi ya kulongyesha bantumiibwa baaye​—pabitale kwiyisha. Yesu baalekyele kileshesho kya kwiyisha p’aye kwibatumpa meema ku mikoolo, mufubo ubaadi aukitshi bantu be na muulo upeela bu bafubi. Ku mbangilo Mpyeele bamwipwishe kibaadi akyebe kukita. Akupu aye nkupela bwabadya kumutumpa. Akupu, balungwile Yesu bwa’shi su bamutumpu ku mikoolo, amutumpe dingi ku maboko na ku mutwe! Yesu tabaadi mushimishe lwishinko lwaye nya, baadi mumupatulwile mu kalolo muulo na akipatuula kyakya kibaadi akitshi.​—Yo. 13:1-17.

7, 8. (a) Mmu kipaso kinyi mubaadi Mpyeele mutuule lwishinko lwa Yesu mu kutompibwa? (b) Yesu baadi muyididiile na kuleesha kalolo na lusa naminyi?

⁷ Akupu, Mpyeele batuudile lwishinko lwa Yesu mu kutompibwa. Batumiibwa ababangile kwikakeena bwa kwiuka muntu mukata munkatshi mwabo, na Mpyeele namu batwelele mu kwakwa kwikakeena. Sunga mbyabya, Yesu bebalangile na kalolo kooso, na kwibakanyisha pabitale bibuwa byabakitshiine; bwa lulamato lwabo kwi Nfumwabo. Aye nkwibatemukila’shi abaadi na kya kumuleka. Mpyeele beleeshe mpaka’shi takamulekye sunga mbya lufu. Yesu nkutemuka’shi Mpyeele baadi na kya kutuna Nfumwaye misusa isatu bwabwa bufuku kumpala kw’etombole kusama misusa ibidi. Mpyeele bapelele n’eshimba dimune, nkwifuna’shi akaleesha lulamato kukila bangi batumiibwa!​—Mat. 26:31-35; Mak. 14:27-31; Luk. 22:24-28; Yo. 13:36-38.

⁸ Yesu baadi mushimishe lwishinko lwaye su? Mu kyakya kipungo kibukopo, Yesu baadi akimbi ngikashi ibuwa ya batumiibwa  baaye sunga mbyabadi bakutwe kupwidika. Bu bibaadi auku’shi Mpyeele akamutunu, bamulunguwile’shi: “Anka, ami nee mutekye bw’obe bwa’shi tala lukumiino loobe lwesheeta. Obe namu, pooyikala mwalukye, onyingishe bakwenu.” (Luk. 22:32) P’aye kwakula bino balesheshe’shi baadi mukulupile’shi Mpyeele baadi mulombeene kwilanga na kufubila Efile Mukulu na lulamato looso. Yesu e na kalolo na lusa lwikashaa!

9, 10. (a) Mwifuba dya Getesemane, elango kinyi dibabapeele Mpyeele? (b) Uno mwanda wa Mpyeele ngulombeene kwitutentekyesha kinyi?

⁹ Akupu, mwifuba dya Getesemane, bibaadi abitungu’shi Mpyeele alangibwe. Yesu baadi musendeele Mpyeele, Shake na Yowano bwabadya kushaala bapasukye bu bibaadi aye kwete kuteka. Yesu baadi mwinyongole bikata na baadi na lukalo lwa kunyingishibwa, anka Mpyeele na bakwabo abaadi besumbule mu tulo misusa isatu. Yesu nkwituula pa mbalo yaabo aye nkwibafwila lusa na kwakula’shi: “Kikudi nkyuule na katshintshi, anka mbidi ngibofule.”​—Mak. 14:32-41.

¹⁰ Kapindji naka, kibumbu kya bantu kibafikile, kitwale malampi, mpete, na tubongye. Ino nyi nsaa ilombeene kwikala na budimu na lwishinko. Anka, Mpyeele bebwele, na mpupa yooso nkutapa Malkuse, mufubi a tshite mwakwidi mukata, aye nkumutshiba etwi. Yesu balangile Mpyeele na lwishinko looso, nkulamika etwi dya yawa muntu, na nkuleesha’shi tabibaadi abitungu’shi balondji baaye bekale na buntomboshi. (Mat. 26:47-55; Luk. 22:47-51; Yo. 18:10, 11) Mpyeele baadi mukite bilubilo bibungi bibaadi abitungu’shi Nfumwaye amufwile lusa. Bilubilo bya Mpyeele abitutentekyesha’shi atwe booso atukitaa bilubilo misusa yooso. (Badika Shake 3:2.) Nnanyi a kwatudi shii na lukalo lwa’shi Efile Mukulu amufwile lusa? Bufuku bubaadi abwele bula ku meeso kwa Mpyeele. Mwanda baadi na kya kukita kilubilo kikile bukata.

11, 12. (a) Kunyima kwa kukwata Yesu, Mpyeele balesheeshe eshimba dinyingye naminyi? (b) Mpyeele bakutshilwe kulombasha bibaadi mwitshipe naminyi?

¹¹ Yesu balungwile kibumbu kya bantu’shi su abamukimbi, abaadi balombeene kuleka batumiibwa baaye bende. Mpyeele nkukutwa kya kukita na nkutadiila baaba bantu bwabadya kwanya Yesu myooshi. Naye namu basuukile nka bu bibasuukile bangi batumiibwa.

¹² Mpyeele na Yowano abayimikile kusuuka, beemana pangi peepi na nshibo ya Hane Tshite mwakwidi mukata kubaabadi bende na Yesu bwa kumwela nkonko. Bu byabayiile na Yesu kwakwa, Mpyeele na Yowano abalondele, anka abaadi “ku bula.” (Mat. 26:58; Yo. 18:12, 13) Mpyeele tabaadi na moo ukilekile nya. Mwanda banyingile eshimba bwa kulonda Yesu. Kibumbu kya bantu kibaadi na bina ngoshi, na takubaadi kwishe n’aye kutapa umune a munkatshi  mwabo. Sunga mbibaadi Mpyeele muleeshe eshimba dinyingye nsaa ibaadi alondo Yesu na pabaadi mutape umune a munkatshi mwa kibumbu kya bantu, baadi mukutwe kukumbasha bibaadi mwitshipe bwa kushaala na lulamato kwi Yesu.​—Mak. 14:31.

13. Nkipaso kinyi kimune kyatudi balombeene kulonda Kidishitu kalolo?

¹³ Nka bu Mpyeele, bebungi bakwete kulonda Kidishitu “ku bula”​—bwa’shi tala bantu bekala abebamono. Anka Mpyeele nabeene bafundjile kunyima’shi, kipaso penda kimune kyatudi balombeene kulonda Kidishitu nkya kwifubwila peepi Naaye muyiile ngobesha yetu, kwambula kileshesho kyaye mu myanda yooso, sunga mu myanda ibukopo.​—Badika 1 Mpyeele 2:21.

14. Mpyeele bakishishe bufuku bubaabadi abasambisha Yesu naminyi?

¹⁴ Na budimu booso Mpyeele balondele bantu abaadi na Yesu mpa na pababafikile ku kiibi kya mashibo akata a ku Yeelusaleme. Ibaadi nshibo ya Kayifase, tshite mwakwidi sha bukome na a kineemo. Aa mashibo abaadi ebakwe munda mwa bimano bya lupango bi na kiibi kikata kya kutwelela. Mpyeele bafikile na pa kibelo kadi bapela kumutwesha. Yowano baadi auku tshite mwakwidi mukata, baadi mupwe kutwela munda, aye nkufika mu kulungula bantu abaadi pa kibelo bwa kutwesha Mpyeele. Abimweneka’shi Mpyeele tabakimbile kwikala peepi na Yowano nya, tabakyebele sunga bwa kutwela munda mwa nshibo bwa nkwimana peepi na Nfumwaye nya. Bashadile paasha mu lupango pabaadi bafubi na bapika abalama bwabwa bufuku b’ootanga kaalo abatala akutwele na akutuuku tumonyi twa madimi atufiki mu kudimbiila Yesu.​—Mak. 14:54-57; Yo. 18:15, 16, 18.

15, 16. Patuula bibaadi butemuki bwa Yesu pabitale kumutuna misango isatu bulombane.

¹⁵ Mu etaata dya kaalo, nsongwakashi bamwene Mpyeele ku kibelo mwanda baadi na mushindo wa kumumona kalolo. Bamutundwile. Aakula bwa kumufunda’shi: “Obe namu boodi na Yesu mwina Ngalileeya!” Na kukema kooso, Mpyeele bapelele’shi tauku Yesu​—tauku sunga mwanda awisamba yawa nsongwakashi. Bakatukile enda mu kwimana ku kiibi kya lupango, bwa’shi tala bamutundula, kadi ungi nsongwakashi bamumwene amutundula akula’shi: “Uno baadi naa Yesu mwina-Nazarete.” Mpyeele nkutshipa’shi: “Ntanguuku uno muntu’mi!” (Mat. 26:69-72; Mak. 14:66-68) Pangi kunyima kwa kumutuna uno musango wa kabidi ngi pabapushishe Mpyeele etombole dibasama, kadi tabaadi mutuule binangu byaye bwa kutentekyesha butemuki bubamulungwile Yesu nya.

¹⁶ Kunyima kwa kapindji, Mpyeele baadi atompo kufwama. Kadi kisaka kya bantu kibaadi kiimane mu lupango kibaadi akifubwila kwadi. Umune a kwabadi baadi mukwabo na Malkuse mpika abaabadi batshibe etwi kwi Mpyeele. Balungwile Mpyeele’shi: “Ntshi mukumone mu lupango pamune naaye su?” Mpyeele bakimbile bya kwibashinkamisha’shi babadimbi. Aye nkwitshipa pa kwamba’shi su badimbi, mulwa umukwate. Ubaadi musango wa kasatu ubatunyine Mpyeele. Kunyima  kwa’ye kwakula, Mpyeele bapushishe etombole dibasama​—bwa musango wa kabidi bwabwa bufuku.​—Yo. 18:26, 27; Mak. 14:71, 72.

17, 18. (a) Mpyeele baakitshiine kinyi kunyima kwa kupusha bukata bwa mwanda ubakitshiine p’aye kutuna Nfumwaye? (b) Mpyeele beelele binangu kinyi?

¹⁷ Yesu batuukile pasha mu kisanga kya nshibo bwa kutala mu lupango. Mu yaaya nsaa, bu byabidi bileshibwe ku mbangilo kwa uno shapitre, meeso aaye abaadi afumankane na a Mpyeele. Mpyeele bapushile bukata bwa mwanda ubakitshiine p’aye kutuna Nfumwaye. Mpyeele bakatukile mu lupango, aye nkwinyongola bikata. Batuukile abanga kwenda mu museese mwitaata dya mweshi. Babangile kunosha mpolo. Baadi mubandame, aye nkudila ngofu.—Mak. 14:72; Luk. 22:61, 62.

¹⁸ Kunyima kwa muntu kuuka’shi bakitshi mulwisho ukata, mbibofule bwadya kupwandjikisha’shi bibukopo bwabadya kumufwila lusa. Mpyeele beelele binangu’shi Yesu ta mulombeene dingi kumufwila lusa nya. Bibaadi naamu byabya su?

19. Mpyeele bapushishe naminyi pabitale kubofula kwaye na atuuku naminyi’shi tabaadi mushimishe lukulupilo?

¹⁹ Mpyeele bapushishe bibubi ngofu namashika a butookye pabamwene bibaadi bifikile Yesu. Benyongwele bikata pabaadi pafwe Yesu kunyima kwa kunkyengyeshiibwa munda mwa nsaa ibungi! Mpyeele baadi akyengye ngofu nsaa yooso ibaadi anangusheena bibaadi mutentekyele Yesu makyenga dyadya efuku dya nfudiilo dya muwa waye pa nsenga. Sunga byekala’shi baadi na kinyongwa kikata, Mpyeele tabaadi mukutwe lukulupilo nya. Atuuku byabya, mwanda takubayishile bwadya kwikala pamune dingi na bakwabo ba mu kikudi nya. (Luk. 24:33) Kushii mpaka, batumiibwa booso abaadi benyongole bwa mwanda ubaabakitshiine bwabwa bufuku bwa malwa na kukimba byabadya kwikankamishena.

20. Twi kulonga kinyi ku kitshibilo kibuwa kibaatshile Mpyeele?

²⁰ Tubamono pano kitshibilo kibuwa kibatshile Mpyeele. Su mufubi a Efile Mukulu akitshi mwaye mooso bwa kulumbuula bilubilo byaye, Yehowa mulombeene kumufwila lusa sunga mulwisho wekala bukata bwi naminyi. (Badika Nkindji 24:16.) Mpyeele balesheeshe lukumiino lwaye lukata p’aye kwibunga na bakwabo sunga mbibaadi na kinyongwa kikata. Kebungi pe muntu mu kinyongwa, akimbaa kwitolola pabwaye, anka kukita kwa byabya kwi masaku akata. (Nki. 18:1) Mwanda wibuwa kukita mu yaaya nsaa nkwikala peepi na bakwetu ba mu kikudi bwabadya kwitunyingisha bwa kushala peepi na Yehowa.​—Eb. 10:24, 25.

21. Nsaa ibabadi bebungye na bakwabo, Mpyeele bapushishe mukandu kinyi?

 ²¹ Nsaa ibaadi pamune na bakwabo ba mu kikudi, Mpyeele bapushishe mukandu wibubi wa’shi mbidi ya Yesu tayibaadi mu mashaama nya. Mpyeele na Yowano babayiile lubilo ku mashaama kubabashiikile Yesu. Bu bibaadi nsongwalume, Yowano bafikile kwanka kumpala. Pabasangeene ku mashaama nkushitule, babangile kwialasheena. Mpyeele tamwialashene nya. Sunga tabaadi na muwa wa kusuuka lubilo, bafikile atwela mu bwina musango umune. Babasangeene mu mashaama mwi bisumanga!​—Yo. 20:3-9.

22. Nkinyi kibaadi kikatushe kinyongwa na mpaka yooso ibaadi mwi Mpyeele?

²² Mpyeele bakuminyine’shi Yesu basanguka su? Sunga mbibaabadi bebalungule kwi bana bakashi be na lukumiino mayi abebalungwile ba mikeeyilu’shi Yesu basanguka ku bafwe, tambakumine’nka musango umune nya. (Luk. 23:55–24:11) Kadi ku nfudiilo kwa dyadya efuku, kinyongwa na mpaka yooso ibaadi mwishimba dya Mpyeele ibakatukile. Binobino, Yesu bapu kusanguka bu muntu a mu kikudi e na bukome! Baadi mumwenekyele batumiibwa baaye. Kadi kumpala kwa’shi amwenekyele batumiibwa baaye booso, babandjile kumwenekyela Mpyeele pa bupenka. Dyadya efuku batumiibwa babambile’shi: “Binyibinyi Mwanaana mmusangukye, na mmwileeshe kwi Simone!” (Luk. 24:34) Mu mushindo umune, Mpoolo mutumiibwa bafundjile kunyima pabitale dino efuku dibaadi Yesu ‘mumwenekyele Kefase, akupu bamwekyeele ekumi na babidi.’ (1 Kod. 15:5) Mpyeele abamwitanyina dingi bu Kefase na bu Simone. Yesu bamumwenekyeele dyadya efuku​—nsaa ibaadi bupenka.

23. Bwakinyi abitungu’shi beena kidishitu abapono mu milwisho lelo uno batentekyeshe kileshesho kya Mpyeele?

²³ Myanda ibaabadi besambe pa babafumankeene ta mbeyifunde mu Bible nya. Nka penda Yesu na Mpyeele nyi abeyuku. Twi bya kupwandikisha muloo ubaadi upushe Mpyeele p’aye kumona Nfumwaye aadi mufule basanguka na kupeta mushindo wa kumuleesha kinyongwa kyaaye na kumuteka lusa. Mpyeele baadi na lukalo lwa kufwidibwa lusa kukila kingi kintu kyooso. Nnaanyi e bya kupela’shi Yesu tabaadi mumufwile lusa? Lelo uno beena Kidishitu abapono mu milwisho abitungu batentekyeshe kileshesho kya Mpyeele. Tatukumanga kupwandikisha’shi Efile Mukulu te bya kwitufwila lusa. Yesu baadi muleeshe kalolo bi Nshaaye, “sha-lusa.”​—Yesh. 55:7.

24, 25. (a) Leesha bibaadi bikitshikye bufuku pabaadi Mpyeele alobo mu Kalunga ka Ngalileeya. (b) Mpyeele bakitshiine naminyi nsaa ibabakitshiine kilengyeleshi kwi Yesu ku namashika?

²⁴ Yesu balungwile batumiibwa baaye bwa kwenda mu Ngalileeya, bwa’shi bakemonene dingi. Pababafikile mwanka, Mpyeele bayiile mu  kuloba mu Kalunga ka Ngalileeya. Bangi batumiibwa babayiile naaye. Mpyeele bakafikile dingi ku mwela ubaadi mukishe mafuku ebungi mu muwa waye. Bu bibaadi ndobeshi a mishipa kumpala, Mpyeele baadi mufube na bintu byadi mwiubidisheene nabyo. Mu bwabwa bufuku tambakwate su nka kifutu.​—Mat. 26:32; Yo. 21:1-3.

²⁵ Musuusa umune, babamono muntu mwimane ku kyeese na babanga kulungula ba ndobeshi bwa kwela makondja ku lungi lupese lwa bwato. Babamukookyeele abo nkukwata mishipa 153! Mpyeele baadi auku uno muntu. Betumbile akatuka mu bwato enda  ku mwengye. Pabafikile ku mwengye Yesu bapeele bakuuku baaye mishipa yekyele. Yesu baadi mutale Mpyeele n’eyiso dibukopo.​—Yo. 21:4-14.

26, 27. (a) Yesu bapeele Mpyeele mushindo wa kukita kinyi misango isatu? (b) Yesu baadi mutuushe bishinkamiisho kinyi abileesha’shi bafwila Mpyeele lusa?

²⁶ Yesu bayipwishe Mpyeele su mmufule Nfumwaye “kukila bino” bintu—abimweneka’shi baadi afunku ebundji dya mishipa. Mpyeele baadi mufule mudimo wa kuloba bu bibaadi mufule Yesu su? Bu bibaadi Mpyeele mupele Nfumwaye misango isatu, binobino Yesu bamupa mushindo wa kwakula’shi mmumufule misango isatu kumpala kwa batumiibwa naaye. Kunyima kwa’ye kwakula bino, Yesu bamulungwile byadya kuleesha kyakya kifulo: p’aye kutuula midimo ya kishila kumpala kwa bingi bintu byooso, pa kudiisha, kukankamika, na kulama lombe lwa Kidishitu sunga beena Kidishitu naaye.​—Luk. 22:32; Yo. 21:15-17.

²⁷ Yaaya nsaa Yesu baadi mushinkamishe’shi Mpyeele kyatungunuka na kumukookyela aye na Nshaaye. Mpyeele baadi na mudimo ukata wa kukita mu kakongye mu bukunkushi bwa Kidishitu. Kino nkishinkamiisho kikata kya lusa lwa Yesu! Kushii mpaka, luno lusa lwa Yesu lubaadi lukume Mpyeele ngofu, aye nkupetela dilongyesha ku bilubilo byaaye.

28. Mpyeele bafikile bu ebwe naminyi?

²⁸ Mpyeele baadi mulombashe mudimo waye munda mwa bipwa bibungi. Baadi akankamika bakwabo, nka bibamulungwile Yesu kunyima kwa lufu Lwaye. Mpyeele baadi mufube na kalolo na lwishinko looso mu kukunkusha na kudiisha balondji ba Yesu. Muntu abaabadi abetanyina bu Simone baadi mukumbashe eshina dibamupeele Yesu dya bu​—Mpyeele sunga’shi Ebwe​—p’aye kufika muntu munyingye, mushimatshiile na a kukulupila mu mifubo ibuwa ya mu kakongye. Myanda ibungi ayishinkamisha bino i mu mikanda ibidi ibafundjile Mpyeele i mu Bible. Ino mikanda ayileesha kalolo’shi Mpyeele ta mulube efuku su ndimune dilongyesha dibapetele kwi Yesu pabitale kufwila kwa bangi lusa.​—Badika 1 Mpyeele 3:8, 9; 4:8.

29. Twi kwambula lukumiino lwa Mpyeele na lusa lwa Nfumwaye naminyi?

²⁹ N’atwe namu dino dilongyesha nditutale. Atutekaa Efile Mukulu lusa bwa bilubilo byeetu efuku dyooso su? Atukumiina’shi babetufwila lusa na kukumiina’shi lusa lwaye lubetusuula su? Atufwilaa namu bangi bantu lusa? Su tubakitshi byabya, atwambula lukumiino lwa Mpyeele​—na lusa lwa Nfumwaye.