1, 2. Eliya baadi mufumankane na mudimo kinyi washii musangeele, na baadi mwilekeene na Akabe mu myanda kinyi?

 ELIYA baadi akumiina kwisamba pa bupenka na Nshaye a mwiyilu. Kadi kibumbu kya bantu kimwifunyishe kibaadi nka penda kimone uno mutemuki a binyibinyi ayisha kaalo mwiyilu na bantu be bungi abaadi abakumiina’shi ebeelele mwabi. Kumpala Eliya baadi mulombeene kukaamina ku Mwengye ula wa Karmele na kuteka Yehowa Efile Mukulu pa bupenka, e kumpala kwa mudimo washii musangeele. E na mwanda wa kulungula Nfumu Akabe.

² Bano bantu babidi mbelekeene ngofu. Akabe baadi mufwale bilamba bibuwa bya bu nfumu, baadi na malaka, muntu musumbule lukumiino aabakitshisha myanda kwi bangi. Eliya namu baadi mufwale kilamba kya mudimo kya batemuki sunga musapi wa bisumanga wi bunyefwa, pangi ubaadi ulombeene kwikala wa musokya sunga wabadi bapwe na bwaa bwa kabalo sunga bwa mbushi. Baadi muntu sh’eshimba dinyingye, sha lulamato, na lukumiino. Myanda ibaadi ikitshikye dyadya efuku ibaadi ileeshe patooka kwilekeena kubaadi pankatshi pa bano bantu babidi.

3, 4. (a) Bwakinyi dino efuku dibaadi dibubi bwa Akabe na bangi balangwidi ba Baale? (b) Nkonko kinyi y’atukyebe kutaluula?

³ Dino dibaadi efuku di bubi dya Akabe na bangi balangwidi ba Baale. Lulangwilo lwa ba mpangano lubaadi Akabe na mukash’aye, Ndala-mumba Yezabele bapalakashe mu bufumu bwa bisamba ekumi bya Isaleele lubaadi lupete masaku akata. Abaadi baleeshe patooka’shi Baale nyi efile a madimi. Yawa efile mufwe baadi mukutwe mpa na kutembesha kaalo ka bisumanga bwa kwaluula mu kwisendeela kukata, kusha masha, mpa na kwitapa kwa batemuki baaye. Baale nkukutwa kukalwila bantu baye 450 ku kabutu kabaadi akebatengyela. Yawa efile a madimi baadi mukutwe koobesha kingi kintu, na kufudiila kwaye takudi peepi. Munda mwa bipwa byooso bisatu, batemuki ba Baale abaadi basendeele efile aabo bwa kufudiisha munanga ubaadi aukyengyesha bantu mwiumbo, kadi Baale baadi mukambilwe. Kadi mu kapindji kapeela Yehowa balesheshe’shi aye nyi Efile Mukulu a binyibinyi pa kunokyesha mpeshi.​—1 Bf. 16:30–17:1; 18:1-40.

 ⁴ Yehowa baadi muleeshe byadi nsaa kinyi? Eliya baadi mulombeene kukita kinyi nsaa ibaadi atengyela’shi Yehowa aluule? Na twi balombeene kulongyela kinyi pabitale uno muntu sha lukumiino? Tubandeyi kutaluula wawa mwanda.​—Badika 1 Banfumu 18:41-46.

5. Eliya balungwile Akabe bwa’shi akite kinyi, na Akabe baadi mupete dilongyesha ku myanda ibaadi ikitshikye dino efuku su?

⁵ Eliya bayiile kwi Akabe aye nkumulungula’shi: “Alukiila, odye, otome! Mwanda napusha’shi mpeshi kwete kukungula.” Uno nfumu mubi baadi mupetele dilongyesha ku ino myanda ibaadi ikitshikye dyadya efuku su? Bible ta mwakule wawa mwanda patooka nya, kadi atumono’shi takwi kishima sunga nkimune kya kwilanga, sunga kuteka mutemuki bwa’shi amukwashe bwa kwifubwila kwi Yehowa na kukimba bya’shi bamufwile lusa nya. Akabe baadi mwipaane nka penda mu “kudya na kutoma.” (1 Bf. 18:41, 42) Kadi Eliya bakitshine kinyi?

6, 7. Eliya baadi mutekye kinyi, na bwakinyi?

⁶ Bible akula’shi: “Eliya namu baakaamiine ku nsongo a Mwengye wa Karmele aye nkukunama, nkwela mutwe munkatsh’a makunungu.” Nsaa ayende Akabe mu kuusha efu, Eliya bapete mushindo wa kusambila Nshaye a mwiyilu. Tala byadi mwiyishe ino mbalo​—Eliya baadi mukuname ayinama paashi, mpala yaaye i pepi na  makunungu. Eliya baadi akitshi kinyi? Tatwi bya kupwandjikisha lwaluulo nya. Mu mukanda wa Shake 5:18, Bible etulungula’shi Eliya baadi atekye bwa’shi eshipo difudiile. Abimweneka’shi baadi mwele lwalwa kuteko ku nsongo a Mwengye wa Karmele.

⁷ Yehowa baadi mupwe kumulungula’shi: “Naanokyesha mpeshi pa nsange.” (1 Bf. 18:1) Byabya Eliya baadi mutekye bwa kulombana kwa kikyebe ky’eshimba dya Yehowa, bu bibaadi namu Yesu mulungule balongi baaye bwabadya kuteka.​—Mat. 6:9, 10.

8. Kileshesho kya Eliya akitulongyesha kinyi pabitale luteko?

⁸ Kileshesho kya Eliya akitulongyesha myanda ibungi pabitale luteko. Eliya baadi mutuule kulombana kwa kikyebe ky’eshimba dy’Efile Mukulu pa mbalo ya kumpala. Nsaa y’atutekye, mbikile buwa tutentekyeshe’shi: “Su twa muteka kintu muyiile kukumiina kwaye, [Efile Mukulu] eetuteemesha.” (1 Yo. 5:14) Byabya abitungu tubande kuuka kikyebe ky’eshimba dy’Efile Mukulu bwa kuteka kalolo. Nyi bwakinyi abitungu twikale atubadika Bible efuku dyooso mu muwa wetu. Binyibinyi, Eliya baadi mukumiine dingi kumona nfudiilo a munanga pa mwanda wa dikyenga dyooso dibaadi wawa munanga ufwishe munkatshi mwa mwilo wabo. Baadi na lutumbu lukile kunyima kw’aye kumona kyakya kilengeleeshi kibaadi Yehowa mukite dyadya efuku. Abitungu n’atwe namu nteko yeetu ileeshe lutumbu alukatukila mwishimba na bibuwa by’atukumiina namu bwa bangi.​—Badika 2 Beena-Kodinda 1:11; Beena-Fidipe 4:6.

9. Eliya baadi mulungule mwina mudimo aaye bwa kukita kinyi na ngikashi kinyi ibidi y’atukyebe kutaluula?

⁹ Eliya baadi mushinkamishe’shi, Yehowa akyebe kufudiisha munanga, kadi tabaadi auku nsaa yaadi mulombeene kwibikita nya. Byabya, mutemuki bakitshine kinyi mu yaaya nsaa ibaadi atengyela? Bible atungunuka na kwakula’shi: “Balungwile mufubi aaye’shi: ‘Byabya enda mu kutala dya ku mbuu!’ Uno bayiile akatala anka bambile’shi: ‘Takwi kintu.’ Misusa musambobidi, Eliya bamulungwile’shi: ‘Aluka okatale!’” (1 Bf. 18:43) Kileshesho kya Eliya akitulongyesha myanda ibidi. Wa kumpala, ndukulupilo lwaye. Wa kabidi, atukataluula kupasuka kwaye.

10, 11. (a) Mmushindo kinyi ubaadi Eliya muleeshe lukulupilo lwaye mu milayilo ya Yehowa? (b) Bwakinyi twi balombeene kwikala na lukumiino lwa wawa mushindo?

¹⁰ Bu bibaadi Eliya na lukulupilo mu mulayilo wa Yehowa, babangile kukimba kishinkamiisho akileesha’shi Yehowa akyebe kunokyesha  mpeshi binobino. Aye nkutuma mufubi aaye bwadya nkataluula pa mbalo ibaadi kwiyilu ngofu bwa kumona su kwi ka kishinkamiisho sunga nkamune akaleesha’shi mpeshi anoko. Pabaadi mwalukiile, yawa mufubi bamulungwile’shi: “Takwi kintu.” Kwiyilu kubaadi nka soo, na eyilu tadibaadi n’ekumbi sunga ndimune. Binobino bomono ungi mwanda? Tentekyesha’shi, Eliya bakatuka mu kulungula Nfumu Akabe’shi: “Napusha’shi mpeshi kwete kukungula.” Mbikunyi bibaadi mutemuki mulombeene kwakula bino bishima aku namu takwi ekumbi sunga ndimune dya mpeshi adimweneka?

¹¹ Eliya baadi auku mulayilo wa Yehowa. Bu bibaadi mutemuki a Yehowa, baadi ashinkamisha’shi Efile Mukulu aaye akyebe kulombasha eyi dyaaye. Eliya baadi na lukulupilo​—ashinkamisha’shi bibaadi nka bu’ye mupwe kupusha mikungulo ya mpeshi. Mbilombeene kwitutentekyesha bishima bya Moyiise bi mu Bible abyamba’shi: “Bibekeele bu muntu amono kishy’akimweka.” Efile Mukulu nyi muntu a binyibinyi koodi su? Etukwasha bwa kwikala na lukumiino lwa uno mushindo mwadi na mu milayilo yaaye.​—Eb. 11:1, 27.

12. Mbikunyi bibaadi Eliya muleeshe’shi baadi na budimu, na mbikunyi bibaadi mukite pabaadi mupushe nkumo ya’shi takwi kakumbi sunga nkapeela?

¹² Banda kutala bibaadi Eliya mushaale mupasukye. Baadi mutume mufubi aaye dingi, kushii musango umune sunga ibidi, kadi misango musambo! Twi balombeene kunangusheena yawa mufubi bakooko na kusemba misango na misango, kadi Eliya baadi mushaale akyebe nka kumona kitundwilo, t’akumiina kukooka nya. Ku nfudiilo, kunyima kwa mususa wa musambo, mufubi bafikile amulungula’shi: “Namono kakumbi kapeela ke bukata bu ekofi akeboo dya ku mbuu.” We mulombeene kupwandjikisha mufubi kwete koolola mboko yaaye bwa kuleesha bukata bwa kakumbi kakwete kufika mwiyilu dya ku Mbuu mukata? Mufubi baadi mulombeene kunangusheena’shi kano kakumbi nka bisumanga. Bwa Eliya, kano kakumbi ke na muulo. Aye nkutuma mufubi aaye na mukyendji wa lubilolubilo’shi: “Nda olungule Akabe’shi: ‘Anya kishaleelo ku nyema, wende tala mpeshi akushikila!’”​—1 Bf. 18:44.

13, 14. (a) Mbikunyi byatudi balombeene kwambula kupasuka kwa Eliya? (b) Bwakinyi abitungu tukite myanda bukidi bukidi?

¹³ Na dingi, Eliya mmwitulekyele kileshesho kikata. Mpan’atwe namu twi mu kipungo akikyebe Efile Mukulu kukita bwa kulombasha mpàngo yaaye. Eliya baadi atengyela nfudiilo a eshipo; bafubi b’Efile Mukulu lelo uno abatengyela namu nfudiilo a uno ndumbulwilo a myanda ibubi. (1 Yo. 2:17) Bu by’atutengyela bwa’shi Yehowa Efile Mukulu alombashe mpàngo yaaye, abitungu tushaale bapasukye nka bu bibakitshiine Eliya. Yesu, Mwan’Efile Mukulu nabeene, baadi mudimushe balondji baaye’shi: “Biabia pasukayi, mwanda tanuwuku nsaa ayifiki Fumwenu.” (Mat. 24:42, Kilombeeno kipya 2014) Bino abikyebe kuleesha’shi Yesu baadi akula’shi balondji baaye ta babaadi balombene kuuka mwanda sunga ngumune bwa kufika kwa nfudiilo? Nya, mwanda baadi  mwakule mbula na mbwipi pabitale abikyebe nkekala nsenga mu mafuku aaketufisha ku nfudiilo. Ooso a kwatudi mmulombeene kwimwena kulombana kwa kantu kooso katale kitundwilo kya “nfudiilo a bya pano.”​—Badika Mateo 24:3-7.

¹⁴ Kantu kooso ka ku kyakya kitundwilo aketupa kishinkamiisho kikata. Kyakya kishinkamiisho ndjo akitutakula bwatudya kukita myanda bukidi bukidi mu mufubo wa Yehowa su? Kakumbi kapeela kabeboo kwiyilu kabaadi kashinkamiishe Eliya’shi Yehowa taadi pepi na kulombasha mpàngo yaaye. Lukumiino lwa mutemuki lubaadi lwa bisumanga su?

15, 16. Mmyanda kinyi ibaadi ikitshikye bukidi bukidi, na Eliya baadi pangi eyipusha naminyi pabitale Akabe?

¹⁵ Bible etulungula’shi: ‘Eilu dyoso dibanyîshîshe kufîta, pa mwanda wa makumbi âbafikanga n’ao kwi lupapi, anka paapa mpeshi mukata nkunoka. Akabe bakâmîne mu ngolofwanda ê, âluka ku Izreele.’ (1 Bf. 18:45, EEM) Myanda ibabanga kukitshika bukidi bukidi. Nsaa ibaadi mufubi a Eliya alungula Akabe mukyendji ubabamutumu nao, kaaka kakumbi kapeela kabendele na kutama, makumbi anyishanga kufiima na eyilu dibafiitshile nka bwî. Kipapi kikata kibabangile kupuka. Kunfudiilo, kunyima kwa bipwa bisatu na kipindji, mpeshi banokyele mu nsenga ya Isaleele. Nsenga ibaadi aikaka meema. Bu bibaadi’shi mpeshi baadi a mufumbi, mwela wa Kishone nkuula, kushii mpaka ao nkusuula mase a batemuki ba Baale babaabadi bayipee. Beena Isaleele abaadi batombokye abapetele kipungo kya kukaasha lulangwilo lwa Baale mwiumbo.

¹⁶ Binyibinyi, Eliya baadi mukulupile’shi abikitshika nka byabya! Pangi baadi eyipusha abikyebe kukita Akabe ku yaaya myanda yooso ikata. Akabe akyebe kwilanga kwishimba na kukatuka ku bubi bwa lulangwilo lwa Baale su? Myanda ibaadi ikitshikye dyadya efuku ibaadi ikumbane bwa’shi amona bya kwaluluka. Pamutwe pa kukita byabya, t’atuuku kibaadi mu binangu bya Akabe yaaya nsaa nya. Bible etulungula nka penda’shi nfumu “bakamiine p’etempu dyaye, aye nkwenda ku [Izreele].” Bapetele dilongyesha kampanda su? Baatshile kitshibilo kya kukita kintu kampanda bwa kushintuluka su? Myanda ibaadi mukite kunyima ayileesha’shi tabaadi mwalulukye nya. Kadi efuku ta dyabandjile kupwa bwa Akabe sunga bwa Eliya nya.

17, 18. (a) Nkinyi kibaadi kikitshikile Eliya mwishinda dya ku Izreele? (b) Nkinyi kibaadi bu mwanda wa kukaanya pabitale bibaadi Eliya musuukye lubilo kukatuka ku Karmele mpa na ku Izreele? (Tala mayi e kuushi kw’esaki.)

 ¹⁷ Mutemuki a Yehowa babangile lwendo mu dyadya eshinda dimune na dyadya dibaadi Akabe muyiile kumpala kwaye. Kadi kubaadi kukitshikye kingi kintu kipya.

¹⁸ Bible aleesha’shi: “Eyasa dya Yehowa dibapeele Eliya bukome, uno beanyine mukaba mu kifuka, nkusuuka lubilo kumpala kwa Akabe mpa na ku Izreele.” (1 Bf. 18:46) Binyibinyi, “Eyasa dya Yehowa” dya bukome dibaadi dikwashe Eliya mu kipaso kya kukaanya. Bibaadi abitungu kukita bilometre 30 bwa nkafika ku Izreele, aku namu Eliya tabaadi nsongwalume nya. a Banda kunangusheena bu be kwete kumona mutemuki bakamisha musapi waye ula ewanya mu kifuka bwa’shi amone bya kutambula kalolo, na musango umune kwete kusuuka lubilo mwishinda mwi matepenende na mema a mpeshi​—nkusuuka lubilo na byadi mukabangye etempu dya nfumu, aye nkwidikila!

19. (a) Buno bukome bubapetele Eliya abwitutentekyesha matemuki kinyi? (b) Nsaa ibaadi Eliya kwete kusuuka lubilo baadi ashinkamisha kinyi?

¹⁹ Eliya baadi mupete mwabi wi kashaa! Kupeta bukome bwi bino pangi bukile mpa na pabaadi kii nsongwalume, ubaadi mwanda ukata ubaadi umusangashe ngofu. Twi balombeene kutentekyesha matemuki aaleesha kupaashibwa kwa looso na bukome abitengyela baaba basha lukumiino mu Mpaladiiso akekala pa nsenga. (Badika Yeeshaya 35:6; Luk. 23:43) Nsaa ikwete Eliya kusuuka lubilo, baadi ashinkamisha’shi Nshaye umune a binyibinyi Yehowa Efile Mukulu nyi baadi mumukwatshisheene!

20. Mbikunyi byatudi balombeene kukimba myabi ya Yehowa?

²⁰ Yehowa e na lukalo lukata lwa kwitwelela myabi. Tukimbeyi yaaya myabi; abitungu twitatshishe ngofu. Anka bu Eliya, twi na lukalo lwa kwikala bapasukye, twatalulanga kalolo bishinkamiisho bya bukome abileesha’shi Yehowa taadi peepi na kulombasha mpàngo yaaye mu kino kipungo kya masaku na kya nfudiilo. Anka bu Eliya, twi na tubingilo twi bungi twa kukulupila mu milayilo ya Yehowa, “Efile Mukulu a binyibinyi.”​—Mis. 31:5.