1, 2. (a) Lwimuno kinyi lubaadi yawa muntu mwimune Madiya? (b) Madiya baatshile kitshibilo kinyi na kibaadi kishintuule nshalelo aye naminyi?

 MADIYA baadi mukaanye pa kumona muntu bafikile mu nshibo mwabo. Yawa muntu tabafikile mu kwimonena na nshaye sunga nyinaye na Madiya nya. Bafikile penda mu kutala Madiya. Baadi auku’shi yawa muntu tabaadi a mu Nazarete nya. Bu bibaadi Nazarete nkibundji kipeela, tabibaadi bukopo bwa kutundula muntu mwenyi nya. Uno muntu baadi mwilekene na bangi bantu. Baadi mwimune Madiya mu mushindo washapushishe kasha, amulungula’shi: “Nakwimuna, obe âbalêsha bumuntu kwi Yehowa! Ê nabêne e n’obe.”​—Badika Luka 1:26-28, EEM.

² Bino nyi byabaleesheshe Madiya mwana a Heli a mu kibundji kya Nazarete ki mu Ngalileya mu Bible. Atukamono bibaadi nshalelo aye. Abaadi abakyebe kumwibakila kwi Yoosefe baadi na lukumiino mwi Efile Mukulu. Abimweneka’shi nshalelo a Madiya baadi mupwe kulumbuluka kumpala​—akekala na nshalelo mupelepele, akakwasha mulume aye Yoosefe na bakakushe bana pamune. Mususa umune, bekeele kumpala kwa muntu mwenyi baadi mumutwadile mudimo ubaadi Efile Mukulu mumupe, uno mudimo ubaadi na kya kushintuula nshalelo aaye.

3, 4. Bwa’shi twiukye Madiya kalolo, mmyanda kinyi ayitungu’shi tukashe mu binangu? Na abitungu tutuule binangu byetu ku kinyi?

³ Bantu bebungi abakanyaa pakuuka’shi Bible ta mwakule myanda ibungi pabitale Madiya nya. Ta mwitulungule myanda pabitale kukula kwaye, bumuntu, na bibaadi mbidi yaaye nya. Kadi, myanda yabadi baleeshe Mwiyi dy’Efile Mukulu pa bimutale, ngilombeene kwitukwasha.

⁴ Bwatudya kuuka myanda itale Madiya kalolo, abitungu tulekye kupusha myanda ya madimi yabakwete kulambukisha kwi bipwilo pabimutale. Tulekye kulonda byabakwete kumwakwiila kwi bantu abasolaa sunga kwi bantu abaseyaa bintu. Tukashe mu binangu malongyesha a bipwilo bya madimi akwete kulesha uno mukashi sha kwiyisha bu “nginaye n’Efile Mukulu” “ndalamumba a mwiyilu.” Kadi tutuule binangu byeetu ku abyakula Bible pa bimutale. Mwanda, Bible kwete kwitulesha mushindo ubaadi na lukumiino na byatudi balombeene kumwambula.

5. (a) Bibakitshine Madiya ku lwimuno lwa mwikeyilu Gabryele abitulongyesha kinyi? (b) Ndilongyesha kinyi dikata dyatulongyela kwi Madiya?

⁵ Mwenyi a Madiya tabaadi muntu a ku mbidi nya. Baadi mwikeyilu Gabryele. Pabalungwile Madiya’shi: “Obe âbalêsha bumuntu,” Madiya “bakalakêshwe bikata” na kukaanya kukata pabitale bino bishima. (Luk. 1:29, EEM) Abamuleesha kalolo kwi nanyi? Madiya tabaadi akulupila’shi bangi bantu bamupe kineemo kikilekile nya. Kadi mwikeyilu baadi akula bwa kalolo ka Yehowa Efile Mukulu. Byabya bibaadi na muulo kwadi. Sunga mbyabya, tabaadi apwandjikisha’shi, mmulombeene kupeta kaaka kalolo k’Efile Mukulu nya. Kileshesho kya Madiya akitulongyesha’shi, twi balombene kwitatshisha bwa kupeta kalolo k’Efile Mukulu, kadi tatukumanga kwitatula pa kwamba’shi tubapu kwikapeta. Efile Mukulu mmushikwe basha kwitatula, kadi mmufule na akwatshishenaa bantu beyishe.​—Shak. 4:6.

6. Mmudimo kinyi wi pabwao ubaadi mwikeyilu mutwadile Madiya?

⁶ Bibadi abitungu’shi Madiya ekadikye na kwakwa kwiyisha mwanda mwikeyilu baadi mumutwadile mudimo wi pa bwao. Bamulungwile’shi akyebe kutanda mwana akekala na muulo ukata kwi bantu booso. Gabryele bambile’shi: ‘Yehowa Efile Mukulu akamupa nkwasa a bufumu a nshaye Daavide, na akekala na bufumu pa kifuko kya Yakobo ku bipwa byooso, na takukekala nfudiilo ku bufumu bwaye nya.’ (Luk. 1:32, 33, Kilombeeno kipya 2014) Madiya baadi auku kalolo mulayilo ubaadi Efile Mukulu mulee Daavide takudi bipwa nkama​—shi, umune a ku bekulu baaye akamunana bwa looso. (2 Sam. 7:12, 13) Mwana aaye baadi na kya kwikala Mesiya abaabadi batengyele kwi mwilo w’Efile Mukulu munda mwa bipwa nkama.

7. (a) Lukonko lwa Madiya lubaadi aluleesha’shi baadi naminyi? (b) Ba nsongwa lelo uno mbalombeene kulongyela kinyi ku kileshesho kya Madiya?

⁷ Na dingi, mwikeyilu balugwile Madiya’shi mwana aaye abakamwitamina bu “Mwana a yawa Mukile-kile kwiyilu.” Mbikunyi bibaadi bilombeene mwana a muntu kutanda Mwana a Efile Mukulu? Madiya badya kutanda naminyi? Abaadi abamuyila kwi Yoosefe bwa kumwibakila, kadi ta babaadi babande kwiyibakishena. Nyi bwakinyi Madiya bepwishe mwikeyilu’shi: “Byabya abikakitshika naminyi, ku mwanda tangukile mulume?” (Luk. 1:34) Lamina’shi Madiya bakwile bwa bukamame bwaye kushii bufu. Baadi aata bu kamame bwaye na muulo. Lelo uno, ba nsongwa bebungi bakwete kulwisha bu kamame bwabo bukidibukidi na kusabuula baaba bakii tumame. Binyibibyi nsenga ibashintuluka. Kadi Yehowa ta mushintulukye nya. (Mal. 3:6) Nka bu mu mafuku a Madiya, lelo uno Yehowa kwete kusanka bwa  baaba bakwete kunemeka miiya itale mwikelo wiselele.​—Badika Beena-Ebelu 13:4.

8. Madiya muntu mukutwe kupwidika, baadi mulombeene kutanda mwana mupwidikye naminyi?

⁸ Sunga mbibaadi Madiya mufubi a Yehowa sha lulamato, baadi muntu mukutwe kupwidika. Baadi mulombeene kutanda mwana mupwidikye, mwan’Efile Mukulu naminyi? Gabryele bakwile’shi: ‘Kikudi kiselele akikafiki poodi, bukome bwa sha-kwiyilu abukubwikila mu mutaala; ngi mwanda kinyi yawa akatandjikwa, abamwitanyina bu eselele, Mwana a Efile Mukulu.’ (Luk. 1:35) Eselele aleesha “mutoshibwe,” “shii kato,” “musantu.” Bana abapyanaa milwisho ya baledi. Kadi bwa uno mwana, Yehowa baadi mukite kilengyeleshi. Baadi mwele muwa wa uno Mwana baadi mwiyilu, mwifu dya Madiya na kufubisha bukome bwaye sunga kikudi kiselele bwa ‘kubwikila’ Madiya na kushikiila mwana bwa’shi tapyananga milwisho. Madiya baadi mumone wawa mulayilo bu wa binyibinyi su? Bakwile naminyi?

9. (a) Mmwanda kinyi wa binyibinyi wabashabauku kwi baaba abeelesha mwanda wa Madiya mpaka? (b) Mmushindo kinyi ubaadi Gabriyele munyingishe lukumiino lwa Madiya?

⁹ Basha mpaka, na bantu balongye myanda ya bipwilo bya bwina Kidishitu, tabakumiinaa’shi muntu kii kamame mulombeene kutanda nya. Sunga mbyabadi balongye, tabakwete kupusha mwanda upelepele wa binyibinyi nya. Anka bu bibaadi Gabryele muleshe “takwi kintu kya kukambila Efile Mukulu.” (Luk. 1:37) Madiya baadi mukumiine mayi a Gabryele, mwanda baadi na lukumiino lwi bukopo. Kadi lukumiino lwaye talubaadi lwa kukumiina bukumiinekumiine nya. Nka bu abikalaa muntu ooso anangushena, Madiya baadi na lukalo lwa bishinkamisho bwa kunyingisha lukumiino lwaye. Madiya ta baadi mpofu bwa kukumina mwanda ooso wabamulungula. Baadi mukumine mayi a Gabryele mwanda baadi mumupe bishinkamiisho. Baadi mumulungule pabitale mukwabo Elizabete tabaadi mununu, abaabadi abauku kubanga kala’shi nkunga. Efile Mukulu baadi mumukitshine kilengyeleshi aye nkwimita!

10. Bwakinyi tatwi balombeene kwamba’shi mudimo wa Madiya ubaadi ubofule?

¹⁰ Binobino Madiya akitshi kinyi? Baadi na mudimo wa kukita mpa na bishinkamiisho bya’shi, Efile Mukulu akitshi byooso bibaabamulungula kwi Gabryele. Tatwi balombeene kwamba’shi uno mwanda ubaadi ubofule bwa Madiya nya. Mwanda babaadi bapwe kubanga kumuyiila kwi Yoosefe. Yoosefe akumiina dingi kumwibakila su bapusha’shi e n’eyimi? Bwa ungi mwanda, penda uno mudimo ubaadi aumweneka bu ukile bukopo. Bibaadi abitungu’shi atwale muwa wa kipangwa ki na muulo ukata ku meso kw’Efile Mukulu​—Mwan’aye aadi mufule! Bibaadi abitungu’shi amupasukile pabaadi  ki mukinga mpa na kumukalwila munkatshi mwa bantu bebubi. Mmudimo umune ukile bukata!

11, 12. (a) Bangi balume baasha lulamato ingi nsaa babaadi bakite kinyi na mufubo wibukopo ubebapeele Yehowa? (b) Madiya baadi muleshe’shi e naminyi mu mayi abalulwile Gabryele?

¹¹ Bible aleesha’shi, mpa na bana balume bebukome baasha lukumiino babaadi abapusha bukopo bwa kukumiina mudimo wibukopo w’Efile Mukulu. Moyiise baadi muleshe’shi tauku bya kwakula kalolo bwadya kwikala bu mukyendji w’Efile Mukulu. (Efi. 4:10) Yeelemiya bambile’shi, baadi “kii mukinga,” ngofu bwa kukita mudimo ubaabamupeele kwi Efile Mukulu. (Yel. 1:6) Na Yoona basuukile mudimo ubaabamupeele! (Yoona 1:3) Madiya namu badya kukita kinyi?

¹² Mpa na lelo uno bantu baky’abatentekyesha lwalulo lwaaye lwa kukookyela. Balungwile Gabryele’shi: “Ne [mpika mukashi, NWT] a Yehowa. Byooso bikitshikye kwandji bu bibwamba.” (Luk. 1:38) Mpika mukashi baadi mushadile ngofu ku bapika booso; muwa waaye ooso ubaadi nka mu maasa a nfumwaye. Byabya ndjo bibapushe Madiya ku meso kwa Yehowa Nfumwaye. Baadi auku’shi ayikala mu bulungantu mu maasa a Yehowa, mwanda e na lulamato kwi booso baasha lulamato kwadi, na akamwelela myabi su bakitshi mwaye mooso bwa kulombasha wawa mudimo ukile bukopo.​—Mis. 18:25.

13. Su mudimo witupe Efile Mukulu aumweneka bu wibukopo, kileshesho kya Madiya akitulongyesha kinyi?

¹³ Ingi nsaa Efile Mukulu mmukumbeene kwituteka bwa’shi tukite kyakya akimweneka bu kikile bukopo ku meso eetu. Anka, Mwiyi dyaaye etulesha kalolo bwakinyi twi na kya kutuula lukulupilo mwadi, kukulupila mwadi na mashimba eetu ooso bu bibakitshine Madiya. (Nki. 3:5, 6) Atukulupila mwi Yehowa su? Su tubakitshi byabya, aketupa bwedi, etukwashe bwa kunyingisha lukumiino lweetu ngofu mwaadi.

14, 15. (a) Yehowa baadi mukwashe Madiya naminyi nsaa ibayiile kwi Elizabete na Zakarii? (b) Mmayi kinyi abaadi Madiya mwakule pabimutale e mu Luka 1:46-55?

¹⁴ Myanda ibaadi Gabryele mwakule pabitale Elizabete ibaadi inyingishe Madiya ngofu. Ku bantu booso babaadi bamwifunyishe, nnanyi badya kupusha mwanda waaye kalolo? Madiya bayiile lubilo ku kibundji ki ku myengye ya mu Yuuda, lwendo lwa pangi mafuku asatu sunga ananka. Nsaa ibatwelele mu nshibo ya Elizabete na Zakarii tshite-mwakwidi, Yehowa baadi mukwashe Madiya na  kingi kishinkamiisho bwa kunyingisha lukumiino lwaye. Pabapushishe Elizabete lwimuno lwa Madiya, mususa umune mwana e munda nkusaana na muloo ooso. Aye nkuwula na kikudi kiselele nkwitamina Madiya’shi, “nyina Nfumwami.” Efile Mukulu baadi mufumbwile Elizabete’shi mwana a Madiya ayikala Mwanana sunga Mesiya. Dingi, ku bukwashi bwa kikudi kiselele batumbwile Madiya bwa kukookyela kwaye’shi: “We sha mulô mwanda we mukumiine.” (Luk. 1:39-45, EEM) Eyendo, byooso bibaadi Yehowa mulee Madiya bibadi na kya kulombana!

¹⁵ Madiya namu, bakwile. Mayi aye ngalamibwe kalolo mwiyi dy’Efile Mukulu. (Badika Luka 1:46-55.) Uno nyi mwisambo wibula wa Madiya wi mu Bible. Mayi aaye aaleesha bibaadi na lutumbu  kwi Yehowa bwa bibaadi mumwelele myabi bwadya kwikala bu nyin’aye na Mesiya. Aa mayi abaadi aaleesha dingi bibaadi na lukumiiino lwibukopo pa kwakula’shi, Yehowa ayishaa basha kwitatula milongo na ba sha bukome, mpa na kukwasha beyishe na balanda abakumina kumufubila. Abaadi aaleesha dingi’shi baadi auku bifundwe bya kina Ebelu kalolo. Twikwakula’shi baadi muteemune Bifundwe bya kina Ebelu misusa ikile pa 20! a

16, 17. (a) Madiya na mwana aye abaadi baleeshe ngikashi kinyi yatudi balombeene kwambula? (b) Kwenda kwa Madiya kwi Elizabete akwitutentekyesha myabi kinyi yatudi balombeene kupeta?

¹⁶ Binyibinyi, Madiya baadi anangushena ngofu pabitale Eyi dy’Efile Mukulu. Byabya, baadi muleeshe bibaadi mwiyishe pa kuteemuna Eyi dy’Efile Mukulu pa mutwe pa kwakula myanda i mu binangu byaye. Mwana abatandjile baadi na kwiyisha kwi byabya nsaa ibakwile’shi ‘Lulambukisho lwandambukisha ta ndwande ooo, alufiki kwi Efile Mukulu bantumine.’ (Yowano 7:16, Kilombeno kipya) Twi balombeene kwiyipusha’shi: “Nkwete kuleesha kanemo ke byabya bw’Eyi dy’Efile Mukulu su? Sunga’shi nakumiinaa kulongyesha myanda ayituukila mu binangu byande su?” Madiya baadi na mwikeelo wibuwa.

¹⁷ Madiya baadi mushale kwa Elizabete myeshi ifikye ku isatu, kushii mpaka bapetele kunyingishibwa kukata. (Luk. 1:56) Bible aleesha’shi kipwano kya Madiya na Elizabete akituleesha bilombeene bukuuku bwibuwa kwitutwadila myabi. Su twekwateena bukuuku na bantu bafule Yehowa, atunyingisha kipwano kyetu naye. (Nki. 13:20) Nsaa ya Madiya kwalukiila kwabo ibalombeene. Yoosefe baadya kwakula naminyi pa kupushishe’shi Madiya taadi n’eyimi?

18. Nkinyi kibaadi Madiya mulungule Yoosefe? Na Yoosefe baadi mukite naminyi?

¹⁸ Madiya tabaadi mutengyele’shi eyimi ditame nyi alungule Yoosefe nya. Baadi na kya kumulungula, kadi, kumpala kwakumulungula baadi eyipusha bibaadi bilombeene kukita uno muntu atshinaa Efile Mukulu nsaa yebipusha. Sunga mbyabya, besambile naye, amulungula myanda yooso ibaadi imufikile. Nka bu byodi mulombeene kupusha, bibakalakeshe Yoosefe ngofu. Baadi na lukalo lwa kukumiina bibaadi akula, kadi bamwene Madiya bu batushishe mukoolo pasha. Bible tamwakule bibaadi Yoosefe anangushena yaaya nsaa nya. Anka, akula’shi baadi mwate kitshibilo kya kumupela, mwanda mu aa mafuku abaadi abamono bantu abeyileena bu abapu kwiyibakishena. Kadi, tabaadi akumiina kumuyishisha mukandu  wibubi nya, nyi bwakinyi bakuminyine bwa’shi bepelene mu bufyefye. (Mat. 1:18, 19) Madiya baadi mukalakashwe pa kumona bibaadi Yoosefe elakana binangu. Sunga mbyabya, tabaadi mukwatshile Yoosefe nsungu nya.

19. Mmushindo kinyi ubadi Yehowa mukwashe Yoosefe bwa kwata kitshibilo kibuwa?

¹⁹ Yehowa baadi mukwashe Yoosefe bwa’shi aate kitshibilo kibuwa. Mwikeyilu baadi mmumwenekyele mu kilotwa, amulungu’shi Madiya mmwimite mu kilengyeleshi. Aa mayi abaadi asambe Yoosefe! Nyi bwakinyi babangile kukita bibakitshine Madiya​—kukita byabya bibaadi Yehowa mukumiine. Baatshile Madiya bu mukashi aye na elumbula bwa’shi Madiya amone bya kukalwila Mwana a Yehowa.​—Mat. 1:20-24.

20, 21. Bantu beyibakishene mpa na baaba abakyebe kwiyibakishena mbalombeene kulongyela kinyi kwi Madiya na Yoosefe?

²⁰ Abitungu bantu beyibakishene na abakyebe kwiyibakisheena​—bambule kileshesho kya Yoosefe na Madiya sunga takudi bipwa bikile pa 2 000. Nsaa ibaadi Yoosefe amono bibaadi mukashi alombasha mashito aye a bu nyina-mwana, baadi na muloo pa kumona bibaadi mwikeyilu a Yehowa mumukunkushe. Yoosefe bamwene muulo wa kukimba bukwashi bwa Yehowa kumpala kwa kwata bitshibilo bikata. (Mis. 37:5; Nki. 18:13) Nsaa ibaadi aata bitshiblo bya bu nfumu a kifuko, baadi anangushena kalolo.

²¹ Na dingi, nkinyi kyatudi balombeene kulongyela kwi Madiya pabaadi mukumiine kutwelela Yoosefe sunga baadi ealashena bwa kumwata? Sunga kumpala Yoosefe baadi mumone’shi bi bukopo kupusha mwanda waaye, Madiya batengyeele kitshibilo kyaaye, mwanda aye ndjo mulume akekala nfumu a kifuko. Dyadya dibaadi bu dilongyesha dibuwa kwadi, bi nka byabya dingi bwa bakashi beena Kidishitu lelo uno. Kunyima, uno mwanda ubaadi ulongyeshe Yoosefe na Madiya muulo wa kwikala na kululama na kwisamba myanda yooso patooka.​—Badika Nkindji 15:22.

22. Nkinyi kibaadi kikwashe Madiya na Yoosefe bwabadya kubanga eyibakishi dyabo kalolo, na mmashito kinyi abaadi aebatengyela?

²² Bano ba mulume na mukashi bakibaadi ba nsongwa ababangile eyibakishi dyabo mu mushindo wibuwa. Booso bwabo abaadi bafule Yehowa Efile Mukulu na abaadi na lukalo lukata lwa kumusangasha, bu baledi abauku bya kutwala mashito aabo kalolo. Eyendo, myabi ikata mpa na nkalakashi ibungi bibaadi kumpala kwabo. Babaadi na kya kukusha Yesu, baadi mulombeene nkekala muntu mukile bukata.