1, 2. Beena Isaleele abaadi abakumiina kinyi nsaa ibaadi Samwele esamba nabo, na bwakinyi baadi akumiina kwibakwasha bwa’shi belangye?

 SAMWELE kwete kutala kumapala a mwilo. Mwilo ngwibungye ku Gilgale, kwabadi bebakongoshe kwi uno muntu sha lukumiino baadi mufube bu mutemuki na bu nsushi munda mwa bipwa makumi. Twi mu mweshi wa Katano sunga wa Kasamombo mu kalandriye ka ano mafuku eetu; eshipo dibanyiisha kupuka. Nsaa ibalombana bwa kuumbula bintu bi mu mafuba ooso e mu mayamba e mu kyakya kipindji. Kibumbu kya bantu kibaumiina. Samwele akitshi kinyi bwa kukuma mashimba aabo?

² Bantu t’abaadi abauku’shi mbasoole nya. Abaadi abatungunuka’nka na kuteka bwa’shi batuule muntu bu nfumu a kwibamuna. Tababaadi abashinguula’shi abaakutwa kaneemo kakata kwi Efile Mukulu aabo, na kwi mutemuki aaye nya. Bwa kwakula kalolo, abaadi bapele Yehowa bu Nfumu aabo! Samwele baadi mulombeene kwibakwasha bwa’shi belangye naminyi?

3, 4. (a) Bwakinyi Samwele akwila bwa bukinga bwaye? (b) Bwakinyi kileshesho kya lukumiino lwa Samwele kii na muulo bwetu’twe lelo uno?

³ Samwele balungwile kibumbu kya bantu bino: “Ami ntandi mununu na nfwidi ku mutwe.” Nfwidi yaaye ibaadi ineemeshe bishima byaye. Aye nkukumbasha’shi: “Nami mwinukunkushe bibangile ku bukinga bwande na ku dino efuku.” (1 Sam. 11:14, 15; 12:2) Taadi mununu kadi ta mwilwankane bukinga bwaye nya. Atentekyesha kalolo myanda yooso ya kala. Pa mwanda wa bitshibilo bibaadi mwate kubanga ku bukinga, baadi na nshaleelo aleesha lukumiino na kulamata kwaye kwi Efile Mukulu Yehowa.

⁴ Samwele baadi mwibakye na kubamba lukumiino lwaye misusa na misusa, sunga mbibabadi bamwifunyishe kwi bantu bashii na lukumiino. Lelo uno bi bukopo bwa kwikala na lukumiino mwanda twi mu ndumbulwilo mukutwe lukumiino na e bubi. (Badika Luka 18:8.) Tubandeyi  kutaluula kyatudi balombeene kulongyela ku kileshesho kya Samwele, kubanga ku bukinga bwaye.

5, 6. Mmushindo kinyi ubaadi Samwele mwilekeene na bangi bana, kadi bwakinyi baledi baaye abaadi abashinkamisha’shi bakwete kumubamba kalolo?

⁵ Samwele baadi mwilekeene na bangi bana. Mafuku apeela kunyima kwabo kumukusula kwibeele, taadi pangi na bipwa bisatu sunga kukila paapa, babangile kufubila Yehowa ku tabernakele ku Silo, mu bilometre 30 na kwabo kwatandwa, ku Rama. Baledi baaye, Elkana na Aana babamulambwile Yehowa mu mudimo wa nsaa yooso wi pa bwao, nkumwikasha bu Naziri bwa muwa waye ooso. a Bino abileesha’shi Samwele abaadi bamusumbusheene, sunga kukutwa kumufula kwi baledi baaye su?

⁶ Nya! Abashinguula’shi mwana aabo abamutabaleela ku Silo. Tshiite-mwakwidi mukata e panundu Eliya kwete kukunkusha myanda yooso kalolo, mwanda Samwele baadi peepi naye. Kubaadi namu bangi bakashi abaadi abakwasha mu ma mbalo e bungi a mu tabernakele, belumbuule kalolo.​—Efi. 38:8; Bans. 11:34-40.

7, 8. (a) Ku kipwa kyooso, mbikunyi bibaadi baledi ba Samwele abamunyingisha na kifulo kyooso? (b) Mbikunyi bilombeene ba nambutwile lelo uno kulongyela ku kileshesho kya baledi ba Samwele?

⁷ Aana na Elkana ta mbalombeene kwilwankana mwan’abo mbedi a kifulo baadi mutandjikwe ku lwaluulo lwa luteko lwabo nya. Aana baadi mutekye Efile Mukulu mwana, amulaa bwa kumulambula ku mufubo wiselele bwa muwa waye ooso. Pabaadi ende mu nkamumona kipwa kyooso, Aana baadi atwadila Samwele musapi upya ubaadi afubisha ku mudimo wa ku tabernakele. Mwana baadi asangeela ngofu kuno kufika kwa nyin’aaye. Kushii mpaka, malango a kifulo na kuludikwa kwa baledi baaye, aamutentekyesha na kineemo kyooso’shi e na kya kufubila Yehowa mu ino mbalo i pa bwayo.

⁸ Lelo uno, baledi mbalombeene kupeta elango dikata ku kileshesho kya Aana na Elkana. Bangi abepaana ngofu bwa kukimba bya kupudisha nkalo ya ku mbidi ya bana baabo kadi abayilwankana nkalo yabo ya mu kikudi. Anka baledi ba Samwele abaadi batuule myanda ya mu kikudi pa mbalo ya kumpala na abaadi na bukitshishi bwi bukopo pabitale mushindo ubaadi ulombeene kwikala mwana aabo nsaa y’akulu.​—Badika Nkindji 22:6.

9, 10. (a) Leesha bibaadi tabernakele na bibaadi abipusha nsongwalume Samwele pabitale yaaya mbalo iselele. (Tala dingi mayi e kuushi kw’esaki.) (b) Mmashito kinyi abaadi nawo Samwele, na mbikunyi bilombeene kunangusheena bansongwa lelo uno bwa kwambula kileshesho kyaye?

⁹ Banda kumumona nsaa yakwete kwenda na kukula afw’atembanga  mu tu myengye twifunyishe Silo. Atala eumbo na ebanda dyalale, eshimba dyaye dii na muloo wikashaa na kwela fyeedi nsaa y’amono tabernakele a Yehowa. Uno tabernakele mbalo ya kishila. b Mbamwibakye takudi bipwa bifikye ku 400 kumpala, ku bukunkushi bwa Moyiise aye nabeene, ibaadi mbalo imune ya lulangwilo lwa binyibinyi lwa Yehowa mu nsenga ishima.

¹⁰ Nsongwalume Samwele banyiisha kufula tabernakele. Mu mwisambo ubaadi mufunde kunyima atubadika bino: “Samwele bafubanga mufubo wa Yehowa, anka tabaadi mupwe kufwala kilamba kya mufubo kya bipekopeko.” (1 Sam. 2:18) Wawa musapi wa bisumanga ushii na maboko ubaadi auleesha’shi Samwele baadi akwasha ba tshiite-mwakwidi mu tabernakele. Sunga mbyashii tshiite-mwakwidi, Samwele baadi mulombashe ingi midimo, bu kufungula kwa biibi bya lupango lwa tabernakele namashika ooso, kukwashanga Eliya taadi mununu. Baadi asangeela ngofu bwabwa bushito bwaye, ungi musango uno nsongwalume shii na mwanda, babangile kukalakashwa. Kubakitshikile kintu kikile bubi mu nshibo ya Yehowa.

11, 12. (a) Hofeni na Pinase abaadi bakutwe kunemeka eyi kinyi dya kulonda? (b) Mbubi bwa mushindo kinyi bubaadi Hofeni na Pinase bakite ku tabernakele? (Tala mayi e kuushi kw’esaki.)

¹¹ Kubanga ku bukinga, Samwele baadi emwena bi etombo na bubi. Eliya baadi na bana balume babidi Hofeni na Pinase. Atubadika mu mwisambo wa Samwele bino: “Bana balume ba Eliya abaadi bantu batwelakane bashibawukanga Yehowa.” (1 Sam. 2:12) Bishima bibidi bi mu uno verse mbipusheene. Hofeni na Pinase abaadi “bantu batwelakane”​—bwa kwakula kalolo “bana ba bisumanga”​—mwanda mbakutwe kaneemo bwa Yehowa. T’abanemeka mayi aaye akata a kulonda na miiya yaaye ikata. Ndjo kibaadi kibafwishe mu kukita yaaya ingi milwisho ikata.

¹² Miiya y’Efile Mukulu ibaadi ayilesha patoka pabitale midimo ya ba tshite-mwakwidi na mushindo ubabadi balombeene kulambula milambu ku tabernakele. Yaaya Miiya ibaadi bwa kabingilo kampanda! Yaaya milambu ibaadi ayileesha mpàngo y’Efile Mukulu bwa kubwikila milwisho ya bantu bwa’shi bekale beselele ku meeso kwaye, balombeene mwabi na bukunkushi bwaye. Kadi Hofeni na  Pinase babaadi abatakula bangi ba tshiite-mwakwidi bwa’shi bakutwe kunemeka yaaya milambu. c

13, 14. (a) Mmushindo kunyi ubaadi bantu be buwa bakalakashwe pa mwanda wa bubi bubaadi abukitshika ku tabernakele? (b) Mbikunyi bibaadi Eliya mukutwe kulombasha midimo yaaye ya bu nshe-bana na bu tshiite-mwakwidi mukata e panundu?

¹³ Banda kunangusheena nsongwalume Samwele kwete kutoona meeso pabitale wawa mwanda wa kukutwa kululama wabadi batadiile nka byabya. Mbantu bungi kinyi​—balanda, basha-kwiyisha, bantu bashii na kineemo​—bakwete kufika ku tabernakele na lukulupilo lwa’shi bebakankamikye na kwibanyingisha mu kikudi, kadi abalukiila na kwidila, batapikye ku mashimba na basabuulwe? Na apusha naminyi nsaa y’auku’shi Hofeni na Pinase dingi abakutwa kuneemeka miiya ya Yehowa pabitale kutambuka kwa lusandji, bu bibabadi batambukye na bangi bakashi abaadi abafubu kwakwa ku tabernakele? (1 Sam. 2:22) Pangi baadi atala na lukulupilo looso’shi Eliya akitshi namu kintu kampanda pabitale wawa mwanda.

¹⁴ Eliya baadi na matalwa a kufudiisha kino kipupa kikwete kukaamina. Bu bibaadi tshiite-mwakwidi mukata e panundu, myanda ibaadi ayikitshika ku tabernakele ibaadi p’epampa dyaye. Bu bibaadi nshe-bana, bibaadi abitungu’shi aludikye bana baaye. Kunyima kwa byooso, abaadi balombeene kwilwishisha na kulwisha bangi bantu be mu kyakya kipindji kya nsenga. Byabya, Eliya nkukutwa kulombasha midimo yaaye yooso ibidi ya bu she-bana na bu tshiite-mwakwidi mukata e panundu. Atosha bana baaye na kwibengyelesha. (Badika 1 Samwele 2:23-25.) Bibaadi abitungu’shi asaashile bana baye bi bukopo. Milwisho ibabadi bakite ibaadi ilombeene lufu!

15. Mmayi kinyi ebukopo abaadi Yehowa mutumine mutemuki Eliya, na mushindo kinyi ubaadi Eliya na kifuko kyaye bakite pabitale kuno kudimusha?

¹⁵ Myanda ibaadi ilwile mpa na mu kipaso kya’shi Yehowa atume “muntu a Efile,” mutemuki atush’atuuku eshina dyaye, kwi Eliya na mayi e bukopo a kiimu. Yehowa nkulungula Eliya’shi: “We mupe bana boobe balume kineemo kunkila’mi.” Efile Mukulu nkuleesha’shi bana balume babi ba Eliya bibaadi abitungu’shi bafwe efuku dimune na kifuko kya Eliya akikyengye ngofu na akishimisha mwabi wakyo wa kwikala bu kifuko kya ba tshiite-mwakwidi. Kuno kudimusha kwi na muulo kubaadi kukume eshimba dya Eliya na kifuko kyaye bwa’shi kyalulukye su? Mu Bible ta mbaleeshe kwakwa kwaluluka kwa mashimba nya.​—1 Sam. 2:27–3:1.

16. (a) Bible akula kinyi pabitale kukula kwa Samwele? (b) Ino myanda ayikusangasha ngofu su? Patuula.

 ¹⁶ Ino myanda yooso ibi i na bukitshishi kinyi kwi Samwele? Misusa ibungi mu uno mwanda atwimusangana bintu bibuwa bibaadi bikitshikye, mukandu wibuwa pabitale kukula kwa Samwele na mushindo ubaadi ende kumpala. Tentekyesha’shi mu 1 Samwele 2:18, atubadika bino: Pabaadi Samwele kii mwana, “bafubanga mufubo wa Yehowa” na lukumiino looso. Sunga mpabaadi kii nsongwalume, Samwele baadi mutuule muuwa waye ku mufubo w’Efile Mukulu. Mu verse a 21 a yawa shapitre umune, atubadika kingi kintu akisangasha ngofu. Abaleesha’shi: “Nguba banyinganga Samwele mwana ku mufubo wa Yehowa.” Bu byakwete kukula, kipwano kyaye na Nshaye a mwiyilu kibaadi akinyiisha kutama. Kyakya kipwano kikata na Yehowa kibaadi kimukalwile ngofu ku myanda yooso ibubi.

17, 18. (a) Mushindo kinyi ulombeene bansongwa beena Kidishitu kwambula kileshesho kya Samwele nsaa yabaadi kumpala kwa bantu abakitshi bubi? (b) Nkinyi akileesha’shi Samwele baadi mwate kitshibilo kibuwa?

¹⁷ Samwele baadi mulombeene kunangusheena’shi, su tshiite-mwakwidi mukata e panundu akitshi milwisho aye na bana baaye, naye namu mmulombeene kukita kyooso ky’akumiina. Kadi bubi bwa bangi, mpa na bwa baaba babadi bape mashito mu kakongye, ta mbulombeene kwitutakula bwa kukita milwisho nya. Lelo uno, bansongwa bebungi bakwete kulonda kileshesho kya Samwele pa kutungunuka na ‘kunyinga . . . ku mufubo wa Yehowa’​—sunga byekala’shi, bantu bebefunyishe bakwete kukita myanda ibubi.

¹⁸ Kukookyela kwa Samwele kubaadi kufwishe bipeta kinyi? Atubadika bino: “Anka mukinga Samwele baadi afwakulanga. Abaadi abamukumiina kwi Yehowa mpâ na kwi bantu.” (1 Sam. 2:26, EEM) Abaadi abakumiina Samwele, kwi bantu abaadi na binangu bi buwa. Yehowa nabeene baadi mufule uno nsongwalume pa mwanda wa lukumiino lwaye. Na Samwele baadi ashinguula binyibinyi’shi Efile Mukulu aaye  akyebe kulumbuula bubi booso bukwete kukaamina ku Silo, kadi pangi baadi eyipusha mafuku akyebe kwibilumbuula. Dingi efuku bufuku, yaaya nkonko ibaadi ipete lwaluulo.

19, 20. (a) Leesha kibaadi kifwile Samwele bungi bufuku ku tabernakele? (b) Samwele bapushanga’shi nnanyi amwitamina, na baadi aata Eliya naminyi?

¹⁹ Pa matombole kadi kukii mufito; elampi dikata dya mu kashibo k’epema dibaadi diky’aditembe. Yaaya nsaa itaale talalaa, Samwele bapusha eyi adimwitanyina. Bapusha’shi Eliya, taadi mununu na’shi ky’amono dingi kalolo nya. Samwele babuuku na ‘ende lubilo’ kwi yawa muntu mununu. Okwete kumona ka nsongwalume akende bukidi ke ngwa mwasa bwa kuuka akimwitamiina Eliya? Bino abileesha bibaadi Samwele aneemeka Eliya na kumukitshiina myanda na kalolo kooso. Sunga mbibaadi mukite milwisho ibungi, Eliya baadi nka tshiite-mwakwidi mukata e panundu a Yehowa.​—1 Sam. 3:2-5.

²⁰ Samwele nkubuusha Eliya, nkumulungula’shi: “Nnami uno, mwanda bonyitamina.” Kadi Eliya amwaluula’shi ntshi mukwitamine nya, aluka okalaale. Byabya wawa mwanda umune nkukitshika dimo na dimo’nyi! Ku nfudiilo Eliya nkushinguula kibaadi akikitshika. Mu aa mafuku Yehowa takibaadi akamba kwisamba na mwilo waye ku bukwashi bwa bimonwa sunga butemuki nya, na twi balombeene kuuka bwakinyi tabaadi esamba dingi nabo. Kadi Eliya nkuuka’shi Yehowa babanga kwisamba dingi​—bwa uno mususa na kano ka nsongwalume! Eliya nkulungula Samwele’shi aluka okalaale na nkumuleesha byadya kukita bwa kwaluula. Samwele nkukookyela. Musango umune bapusha eyi adimwitamina: “Samwele, Samwele!” Aye kwaluula’shi: “Akula, mufubi oobe ateemesha.”​—1 Sam. 3:1, 5-10.

21. Mbikunyi byatudi balombeene kuteemesha Yehowa Efile Mukulu lelo uno, na bwakinyi bibuwa kukita byabya?

²¹ Yahowa bapete namu mufibi aaye amuteemesha mu Silo. Na mu muuwa waye ooso, Samwele baadi ateemesha Yehowa. N’oobe namu? Ta twi balombeene kutengyela eyi adifiki bufuku mu lupapi bwa’shi diisambe netu nya. Lelo uno, Yehowa kwete kwisamba noobe mu ungi mushindo. Tukwete kumuteemesha ku bukwashi bw’Eyi dyaye Bible. Su atunyisha kumuteemesha na kumukookyela, atunyisha kunyinga mu lukumiino. Kileshesho kya Samwele akibileesha patooka.

22, 23. (a) Mayi abaadi Samwele mutshiine kwakula ku mbangilo abakumbeene mushindo kinyi? (b) Mbikunyi bibaadi nkumo ya Samwele inyishe kupalakana?

²² Samwele ta mulombeene kwilwankana bwabwa bufuku bwa ku Silo efuku sunga ndjimune nya; mwanda, bwabwa bufuku ndjo bubabangile kuuka Yehowa mu mushindo wi pa bwao, aye nkwikala mutemuki a Efile Mukulu na mukyendji waye. Kya kumpala, uno nsongwalume baadi atshinyi kulungula Eliya mayi a Yehowa, mwanda baadi na kya kuukisha akileesha butemuki butale kyakya kifuko bubaadi peepi na kulombana. Kadi Samwele nkunyinga eshimba​—na Eliya akumiina na kwiyisha kooso bwa’shi Efile Mukulu amutshibile kiimu. Binobino, byooso bibaadi Yehowa mumulungule abilombana: Isaleele nkwenda mu kulwa na beena  Filistina, Hofeni na Pinase abaadi bebayipee booso efuku dimune, na Eliya nabeene pabapushiishe’shi Musheete wiselele wa Yehowa abeunyengye, aye nkufwa.​—1 Sam. 3:10-18; 4:1-18.

²³ Byabya, nkumo ya Samwele ya bu mutemuki sha lukumiino ibaadi inyinshe kupalakana. Atubadika mu Bible’shi: “Yehowa baadi naye,” na balombashanga myanda yooso ibaadi Samwele atemuka.​—Badika 1 Samwele 3:19.

24. Beena Isaleele abaadi abakumiina kinyi, na bwakinyi kukita byabya kubaadi bu mulwisho ukata?

²⁴ Beena Isaleele abalondele kileshesho kya Samwele, na abo nkwikala mwilo wa mu kikudi na wi na lukumiino? Nya. Kunyima kwa mafuku, abaatshile kitshibilo kya’shi, mutemuki bisumanga tekalanga ebasambisha dingi. Abakuminyiine kwikala bi ingi miilo, n’abo namu bapete muntu mwikale nfumu akwibakunkusha. Ku bukunkushi bwa Yehowa, Samwele nkukumiina kwibalombeesha lukalo lwabo. Kadi bibaadi abitungu’shi ebaleeshe bi dikyenga adibafwishila milwisho yaabo. Abaadi batombokyele ta muntu nya nyi Yehowa aye nabeene! Ndjo Samwele nkukongosha bantu ku Gilgale.

25, 26. Samwele bakitshiine kinyi ku Gilgale bwa kupushisha beena Isaleele bi bukata bwa milwisho yaabo ibabadi bakitshiine Yehowa?

²⁵ Tubandeyi kwipwandjikisha bu’twe be ku Gilgale nsaa i Samwele kwete kulungula beena Isaleele. Uno mutemuki taadi mununu atentekyesha beena Isaleele’shi, mmushaale na lukumiino lwi na lulamato. Kunyima atubadika bino: “Samwele batekyele kwi Yehowa.” Ateka Yehowa bwa kunokyesha mpeshi a tubadibadi.​—1 Sam. 12:17, 18.

²⁶ Mpeshi a tubadibadi mwishipo? Ta byakitshikile kasha! Su bangi abeelesha mpaka sunga kusabuula, abaumiina mu kapindji kapeela. Musango umune mpeshi bafindji nka bwî. Lupapi lubabangile kupuka. Tupandapanda tubabanga kukupila ngofu atushiki mmatwi. Mpeshi babanga kunoka. Abakitshiine naminyi? “Mwilo ushima ubekeele na moo ukata wa Yehowa na Samwele.” Ku nfudiilo, abaadi bashinkamishe binyibinyi’shi abakitshi mulwisho ukata.​—1 Sam. 12:18, 19.

27. Yehowa apushaa naminyi pabitale baaba abambula lukumiino lwa Samwele?

²⁷ Ta Samwele nya, kadi Efile Mukulu aaye Yehowa, baadi mukume mashimba aabo atombokye. Kubanga ku bukinga mpa na ku bununu bwaye, Samwele baadi mushaale na lukumiino mwi Efile Mukulu aaye. Na Yehowa baadi mumufute. Mpa na lelo, Yehowa ta mwalulukye nya. Kwete nka kutungunuka na kukwasha baaba booso abambula lukumiino lwa Samwele.