Yehowa bakitshine efuba dibaadi n’eshina bu lupango lwa Edene. Mu lupango mubaadi muule bilongo, bikunwanga, na nyema. Akupu Efile Mukulu nkupanga Adame muntu a kumpala ku lufuufi, aye nkumupwila muuwa mu minongye ya mpembe. Weuku kibaadi kikitshikye su? Muntu nkufika kipangwa kii na muwa! Yehowa nkupa Adame bulami bwa lwalwa lupango, amupa nyi matalwa a kuudika nyema yooso mashina.

Yehowa nkupa Adame mwiya wi na muulo ukata. Amulungula shi: ‘We mulombeene kudya kikuba kya mutshi ooso, anka tokumanga kudya kikuba kya uno mutshi unakutosha. Su bokeudi okafu.’

Akupu, Yehowa nkwamba shi: ‘Abikyebe mpe Adame bukwashi bumupwandjikile.’ Yehowa nkuladisha Adame mu tulo tukata, aye nkwata lumune lwa ku mbafu ya Adame, kumupangila mukashi. Yawa mukashi baadi n’eshina bu Eeva. Adame na Eeva nyi abafikile kifuko  kya kumpala. Adame bapushiishe naminyi bwa mukashi aaye mupya? Adame baadi na muloo ukata aye nkwamba shi: ‘Tala kibakitshi Yehowa kukiila ku lubafu lwande! Akupu shi! Uno muntu munyifwane.’

Yehowa balungwile Adame na Eeva bwabadya kutanda bana na kuusha nsenga. Baadi akumiina shi bekale na muloo wa kufuba pamune bwa kwikasha nsenga bu mpaladiiso, sunga bu lupango lwibuwa, nka bu bibaadi lupango lwa Edene. Kadi tabibaadi bilombane byabya nya. Bwakinyi? Atukalongo ingi myanda mu shapitre alondo.