Kubaadi kupwe kukila bipwa bifikye ku 70 kasha bebungi ba ku beena Isaleele baaluka mu Yeelusaleme, anka bangi abaadi bakya bashaala mu ma mbalo elekeene a mwiumbo dya Perse. Umune a kwabadi nyi Eesela tshiite mwakwadi baadi alongyesha Mwiya wa Yehowa. Eesela baadi mumone shi beena Isaleele tababaadi abalondo dingi Mwiya nya, aye nkukimba bya kwibakwasha. Kesersese Nfumu a mu Perse bamulungwile shi: ‘Efile Mukulu bakupangile na binangu byodi mulombeene kulongyesha Mwiya waye. Enda, wate muntu ooso akumiina kwenda noobe.’ Eesela nkwimonena na booso babaadi abakumiina kwalukiila mu Yeelusaleme. Abo nkuteka Yehowa bwadya kwibakalwila mwishinda, akupu abo nkubanga lwendo.

Abafikile mu Yeelusaleme kunyima kwa myeshi inanka. Ba nfumu ba miilo nkulungula Eesela shi: ‘Beena Isaleele mbakutwe kukookyela Yehowa abo nkwibakila bakashi abalangwila b’efile ba madimi.’ Eesela bakitshiine kinyi? Baadi mukuname kumpala kwa bantu booso aye nkuteka shi: ‘Yehowa boopu kwitukitshiina biibungi, anka twikeele bakukitshiine mulwisho.’ Bantu nkwitoonda, anka babaadi’nka abakitshi myanda ishii buwa. Eesela nkusangula bakulu na ba nsunshi bwabadya kutaluula yaaya myanda. Kunyima kwa myeshi isatu, abaadi baalushe booso bashibaadi abalangwila Yehowa.

Bipwa ekumi na bibidi bibakidile. Mu byabya bipwa, abaadi beebakuule midimba ya Yeelusaleme. Eesela nkubunga bantu bwadya kwibabadikila Mwiya w’Efile Mukulu patooka. Pabaadi Eesela mufungule mukanda wa miiya, bantu booso nkwimana. Aye nkutumbisha Yehowa, abo nkwela maboko mwiyilu bwa kukumiina. Akupu, Eesela nkwibabadikila na kwibapatulwila Mwiya, mwilo nkumuteemesha kalolo. Abo nkwidila p’abo kukumiina dingi shi abaadi balubile Yehowa. Efuku dibalondele, Eesela nkwibabadikila dingi Mwiya. Abo nkushinguula musango umune shi abaadi  na kya kukita kitentekyesho kya Musangeelo wa tushibo twa mapema. Kubanga’nka paapa, ababangile kwilumbuula bwa musangeelo.

Munda mwa mafuku musambo a musangeelo, mwilo ubaadi mu muloo na kutumbula Yehowa bwa kipungo kya kuumbula. Takubaadi ungi musangeelo bu uno nya kubanga mu mafuku a Yooshwa. Kunyima kwa musangeelo, mwilo ubaadi wibungye, ao nkuteka shi : ‘Yehowa, bwetupaashishe mu bupika, wetudiisha mu kabaaka na kwitupa nsenga i buwa. Anka, twi bakutwe nkukookyela misango ibungi. Bootumine batemuki bwa kwitudimusha, anka tatubaaadi bebapushiishe nya. Boodi’nka neetu lwishinko. Obe nkulama mulayilo oobe kwi Abrahame. Kadi bwa binobino atukulaa shi atukukookyela.’ Abo nkufunda mulayilo wabo, akupu ba nfumu ba miilo, beena Leevi na ba tshiite mwakwidi kwiwela byala.