Dingi efuku bufuku, Nfumu Nabukodonosore baadi muloote kilotwa kyashapusha kalolo. Bibadi bimukalakashe bikile bibakutshilwe mpa na tulo. Bayitanyiine ba sha malenganyi baaye aye nkwibalungula shi: ‘Mpatulwileyi kilotwa kyande.’ Abambile shi: ‘Etulungule kilootwa kyobe nfumu.’ Anka Nabukodonosore bambile shi: ‘Nya! Anwe akulayi nka binalooto, bisumanga ne nwipaa.’ Abo nkumulungula dimo shi: ‘Etulungule bibolooto, atukupatulwila byanka.’ Bambile shi: ‘Booso bwenu anukyebe kuntee kateo. Ndunguleyi’nka binalooto! Abaadi balungule nfumu shi: ‘Takwi muntu pa nsenga a kukita byabya nya. Byotekye bibukopo.’

Nabukodonosore baadi mufiite munda bikata, aye nkutuma eyi bwabadya kwipaa booso basha binangu ba mu kibundji. Mpaa na Ndanyele, Shadrake, Meshake na Abede-Nego. Ndanyele baadi mutekye nfumu bwa kumutengyela kapindji. Akupu, Ndanyele na ba kuuku baaye abatekyele kwi Yehowa bwadya kwibakwasha. Yehowa bakitshiine naminyi?

Yehowa baadi muleeshe Ndanyele mu kimonwa bibaadi kilotwa kya Nabukodonosore na kyakipatuula. Butokye, Ndanyele bayile kwi mufubi a nfumu amulungula shi: ‘Toyipaanga su ngumune a ku ba-sha binangu. Ne kupatuula kilotwa kya nfumu.’ Mufubi batwadile Ndanyele kwi Nabukodonosore. Ndanyele nkulungula nfumu shi: ‘Efile Mukulu nyi asokola akikitshika mu mafuku aafiki boo’be. Kilootwa kyobe nkino: We mumone nkishi mukata e na mutwe wa oòlo, kyadi na maboko mbya kyamo kyebakaanyi, efu na mikoolo bya munyinga usangwe, mikoolo ya kyamo, ngwa kipindji kya kyamo, kipindji kya ema. Ebwe dibafikile ku mwengye dyakupila nkishi ku ngwa. Akupu nkishi beefingile aye nkufika bu lufuufi lubaabadi bapapule kwi lupapi. Ebwe dibafikile mwengye ukata, dibaushiishe nsenga ishima.’

 Ndanyele baakwile dingi shi: ‘Kilootwa kyobe akipatuula bino: Bufumu boobe nyi bwikale mutwe wa oòlo. Kyamo ky’ebàkanyi, mbufumu abukulondela. Akupu, akwikala bufumu bwi bu munyinga usangwe abumunu nsenga ishima. Bufumu abulondo abwikala bukome bu kyamo. Ku nfudiilo akukeekala bufumu bwiabuule, bwi na bingi bipindji bibukopo bu kyamo, bingi bipidji namu mbibofule bu ema. Ebwe dibafikile mwengye nyi Mbufumu bw’Efile Mukulu. Abukafingi na kutuuta ano mafumu ooso, na abushaala bwa looso.’

Nabukodonosore beyelele mpala paashi kumpala kwa Ndanyele. Baambile shi: ‘Efile Mukulu oobe nyi bakuleesha kino kilootwa. Takwi ungi Efile Mukulu bu’ye nya.’ Pamutwe wa kwipaa Ndanyele, Nabukodonosore bamutudile ku mutwe kwa bantu booso ba-sha binangu na bu mukata a eumbo dyoso dya Babilone. Boomono bibaadi Yehowa mwaluule luteko lwa Ndanyele su?