DILONGYESHA 57
Yehowa batumu Yeelemiya bwadya kulungula mukandu
Yehowa baadi musangule Yeelemiya bwa kwikala mutemuki a mwilo wa Yuuda. Baadi mumutume na mukandu wa kudimusha bantu bwa kuleka kukita myanda ibubi. Anka Yeelemiya bakwile shi: ‘Yehowa, ne’nka mwana mukinga. Ta nguuku bya kwakula kwi bantu nya.’ Yehowa nkumulungula shi: ‘Totshiinanga nya. Nakakulungula byodya kwakula. Nakakukwasha.’
Yehowa nkulungula Yeelemiya bwa kubunga bakulu ba mwilo, na bwadya kutanya ebuka kumpala kwabo na kwakula shi: ‘Nyi byabakasooso Yelusaleeme nka bu dino ebuka.’ Pabakitshiine Yeelemiya bibaadi Yehowa mumulungule, bakulu ba mwilo abafiitshile munda bikata. Ungi tshiite mwakwidi abeetamina bu Pashure baadi mukupile Yeelemiya aye nkumwela mu moomba. Yeelemiya tabaadi sunga bya kusaana bufuku bushima nya. Pashure bafikile mu kumutuusha butookye namashika. Yeelemiya bambile shi: ‘Ta ngobesha dingi bino nya. Nalekye kulungula mukandu wa Yehowa.’ Baadi mukookye kwiulungula su? Nya. Pabaadi munangusheene dingi kalolo bwa wawa mwanda, Yeelemiya baambile shi: ‘Eyi dya Yehowa dii nka bu kaalo akatembe munda mwande. Ntshi mulombeene kwimika kulungula nya.’ Yeelemiya baadi mutungunukye na kudimusha bantu.
Kunyima kwa bipwa, kubekeele ungi nfumu mu Yuuda. Ba tshiite mwakwidi na batemuki ba madimi babaadi bashikwe mukandu wa Yeelemiya. Abo nkulungula ba nfumu shi: ‘Abitungu kwipaa uno muntu.’ Yeelemiya kwibalungula shi: ‘Su nubangipaa, anusemuna mase a muntu shii musoole. Mwanda mukandu wa ngakula nta ngwande, ngwa Yehowa.’ Pabapushishe ba nfumu byabya, abambile shi: ‘Uno muntu nta nga kwipaa nya.’
Yeelemiya nkutungunuka na kulungula mukandu wa kiimu, ba nfumu ba mwilo abafiitshile munda bikata. Abo nkuteka nfumu bwa kwipaa Yeelemiya. Nfumu kwibalungula shi be kukita kyoso kyabakumiina na Yeelemiya. Abo nkukwata Yeelemiya, nkumwela mu bwina bwa matekye na lukulupilo shi afwila mwamwa. Yeelemiya nkubanga kukulukila mu matekye.
Ungi mukata a mwibalasa dya nfumu abetamina bu Ebede-Meleke nkulungula nfumu shi: ‘Ba nfumu ba mwilo abeele Yeelemiya mu bwina! Su twamuleka mwamwa afu.’ Nfumu nkulungula Ebede-Meleke bwa kwata bantu 30 bwa shi bakatuushe Yeelemiya mu bwina. Tatwi balombeene kwikala namu bu Yeelemiya, shibaadi mutadiile kintu su nkimune bwakidya kumukutshishwa kulungula mukandu su?
“Abenushikwa mwanda w’Eshina dyande, anka yawa akanyingi nyaa na kunfudiilo akapanda.”—Mateo 10:22
Tala dingi
LONGYESHA BANA BOOBE
Yeelemiya tabaadi mulekye kwakula myanda itale Yehowa nya
Sunga mbibaadi bantu abamusabuula sunga kumufiitshila munda, bwakinyi Yeelemiya baadi mutungunukye na kwisamba pabitale Efile Mukulu?
VIDEO YA MAYI A MBANGILO A MIKANDA YA MU BIBLE
Mbangilo a mukanda wa Yeelemiya
Yeelemiya balombeesha mudimo waye wa bu mutemuki kalolo sunga mu nkalakashi ibukopo. Tala kipaso kilombeene kileshesho kyaye kukwasha beena Kidishitu kano kabidi.
MYANDA YA KULONGA NAYO BIBLE
Nyinga bwa lukumiino loobe!
Longa kibadi kikwashe Yeelemiya bwa kulungula mukandu wa kudimusha nao mwilo wa Yunda.
