Daryuse mwina Mediya baadi ungi nfumu a mu Babilone. Daryuse baadi akaanyisha Ndanyele kukila bangi bantu. Aye nkumutuula ku mulongo wa bantu basha kineemo ba mwiumbo. Baaba bantu booso abaadi bakwasthile Ndanyele kyutu na abaadi abakimbi shi akatukye munkatshi mwabo. Abaadi abauku shi Ndanyele atekaa Yehowa misuusa isatu efuku dyooso, abo nkulungula Daryuse shi: ‘Abitungu kwikale mwiya wa nkulangwila nka pend’obe bupenka. Muntu ooso akutwa kukookyela mwiya, abitungu kumwela mu bwina bwa ntambwe.’ Daryuse baadi mukumiine kyakya kinangu, aye nkwela kyala ku mwiya.

Pabaadi Ndanyele mupushe pabitale mwiya upya, bayiile mu nshibo yaaye. Aye nkukunama kumpala kw’edidishi, bwa kuteka Yehowa. Baaba basha kyutu abatwelele musango umune mu nshibo, abo nkumushikisha kwete kuteka. Abo nkwenda lubilo kwi Daryuse mu kumulungula shi: ‘Ndanyele bakutwa nkukookyela. Kwete kuteka Efile Mukulu aaye efuku dyooso misango isatu.’ Daryuse baadi mufule Ndanyele, tabaadi akumiina bwadya kufwa nya. Munda mwefuku dishima, baadi akimbi bya kupaasha Ndanyele. Kadi, sunga nfumu nabeene tabaadi bya kushintuula mwiya wadi mupwe kwela kyala nya. Aye nkutuma bantu baaye bwabadya kwela Ndanyele mu bwina bwa ntambwe.

 Daryuse bakutshilwe tulo bwabwa bufuku, mwanda baadi ekalakasha pabitale Ndanyele. Butookye namashika, bayile lubilo ku bwina, aye nkwitamina Ndanyele, amwipusha shi: ‘Efile Mukulu oobe bakupaasha su?’

Daryuse nkupusha eyi. Dibaadi dya Ndanyele! Aye nkwaluula Daryuse shi: ‘Efile Mukulu ande batumu mwikeyilu aaye bakanga mbangambanga ya ntambwe. Ta nginkite kintu nya.’ Daryuse baapushishe muloo ukata! Aye nkulungula Ndanyele bwadya kutuuka mu bwina. Ndanyele tabaadi mutapikye su nkapela. Nfumu nkutuma eyi bwa ‘kwela bantu babaadi bafunde Ndanyele mu bwina.’ Pabaabadi bebeele mu bwina, ntambwe ibaadi iibadye.

Daryuse nkutumina bantu baaye eyi shi: ‘Muntu ooso atshiine Efile Mukulu a Ndanyele. Aye bapaasha Ndanyele mu bwina bwa ntambwe.’

Obe namu, otekaa Yehowa efuku dyooso bu Ndanyele su?