Pabaadi Nabukodonosore mutwale ba nfumu ba miilo ba mu Yuuda mu Babilone, batudile bushito bwabo mu maasa a mukata a ebalasa abetamina bu Ashepenaze. Nabukodonosore balungwile Ashepenaze bwadya kumupetela ba nsonwalume be na bukome bwa mbidi na be na kapatupatu. Abaadi na kya kulambukisha bano ba nsongwalume munda mwa bipwa bisatu. Bwabwa bulambukishi bubaadya kwibalumbuula bwa kwikala bantu bakata mu Babilone. Baaba ba nsongalume abaadi na kya kulonga kubadika, kufunda na kwakula ludimi lwa beena Kaldeya lwa mu Babilone. Abebalungwile dingi bwa kudya bidiibwa abidi nfumu na ba mu nshibo yaaye. Bano ba nsongwalume babaadi Ndanyele, Hananiya, Mishaele na Azariya.  Ashepenaze bebapeele mashina a mu Babilone bu Belshasare, Shadrake, Meshake na Abede-Nego. Bwabwa bulambukishi bubaadya kwibemika bwa kulangwila Yehowa su?

Bano bansongwalume bananka abaadi baate booso kitshibilo kya kukookyela Yehowa. Abaadi abauku shi ta mbalombeene kudya bidiibwa bya nfumu nya, mwanda Mwiya wa Yehowa ubaadi auleesha shi bingi bibaadi butete. Abo nkulungula Ashepenaze shi: ‘Twetudiishanga naamu bya kudya bya nfumu.’ Ashepenaze nkwibalungula shi: ‘Su nubapele kudya nfumu amono shi nubakumbu maladi, angipaa!’

Ndanyele bapetele kinangu kibuwa. Aye nkulungula mulami aabo shi: ‘Etupe penda bisakisaki na mema a kutoma munda mwa mafuku ekumi. Akupu otale abiikala mbidi yeetu na ya bansongwalume abadi byakudya bya nfumu.’ Mulami aabo baadi mukumiine.

Kunyima kwa mafuku ekumi, Ndanyele na ba kuuku baaye basatu abaadi na mbidi ibuwa kukila bangi booso. Yehowa baadi na muloo bibaabadi bamukookyele. Aye nkupa dingi mpa na Ndanyele tudiingi twa kupusha bimonwa na bilootwa.

Pababapwile kwibalongyesha, Ashepenaze beebatwadile kwi Nabukodonosore. Nfumu besambile nabo amona shi Ndanyele, Hananiya, Mishaele na Azariya, abaadi na binangu na kuteemesha kalolo kukila bangi bansongwalume booso. Baadi musangule bano basongwalume bananka bwabadya kufuba mwibalasa dyaye. Nfumu baadi na kya kwibateka malango pabitale myanda i na muulo ukata. Yehowa baadi mwibekashe na binangu kukila bangi ba-sha binangu booso ba nfumu na beena malenganyi baye.

Sunga byekala shi abaadi beenyi mu kino kibundji, Ndanyele, Hananiya, Mishaele na Azariya tababaadi balube shi abaadi bafubi ba Yehowa nya. Obe namu wekala otentekyesha Yehowa nsaa yooso, sunga wekala kula na ba kutande su?