Kunyima kwa mafuku n’aye kuloota pabitale nkishi, Nfumu Nabukodonosore bakitshiine nkishi mukata a oòlo. Baadi mumwimikye mu kipya kya Dura, akupu aye nkwitamina bantu bakata ba mwiumbo mpa na Shadrake, Meshake na Abede-Nego bwabadya kwibunga kumpala kwa nkishi. Nfumu batushiishe mwiya shi: ‘Su nubapusha eyi dya kapudi, dya mpungi, dya milengye na bindaala, nukuname kumpala kwa nkishi! Muntu ooso shakunama, abamwele mu bwina abutembe kaalo.’ Bano ba nsongwalume basatu ba beena Ebelu, abaadya kukunamina nkishi su abaadya kulangwila nkapenda Yehowa?

Akupu nfumu nkutuma eyi bwabadya kwela mpungi. Bantu booso nkukunama bwa kulangwila nkishi, kukatusha’nka penda Shadrake, Meshake na Abede-Nego. Bangi bantu abebamwene abo nkulungula nfumu shi: ‘Baaba beena Ebelu basatu abapele kulangwila nkishi oobe.’ Nabukodonosore nkwibatumina eyi shi: ‘Nenulekyela ungi musango bwanudya kulangwila nkishi. Su nubapele, nenwele mu bwina bwa kaalo. Takwi efile mulombeene kwinupaasha ku maasa ande.’ Abo namu nkumwaluula shi: ‘Tatukyebe ungi musango nya. Efile Mukulu eetu e kwitupaasha. Kadi sunga akutwa kwibikita, Obe nfumu uuka shi tatulangwila nkishi nya.’

Nabukodonosore bafiitshile munda bikata. Aye nkulungula bantu baaye shi: ‘Elaaye kaalo mwilungu misango musambo kukila ka mafuku ooso!’ Akupu, aye nkulungula basalayi shi: ‘Ebaanyeyi myoshi, nwibeele mwanka!’ Elungu dibaadi na kaalo kakile bibakitshiine  shi, pabaadi pefubwile basalayi pa bwipi, abo nkufwa musango umune. Beena Ebelu basatu nkupona mu kaalo. Kadi pabaadi Nabukodonosore mutale mwanka, bamwene bantu bananka abatambuka mu bwina bwa kaalo pamutwe pa basatu. Aye nkupusha moo, nkwenda mu kwipusha ba-sha binangu baaye shi: ‘Tatwi beele bantu basatu mu kaalo? Kadi nkwete kumona bantu bananka, ungi amweka nka bu mwikeeyilu!’

Nabukodonosore nkwifubwila peepi na bwina nkwakula shi: ‘Tuukayi anwe bafubi b’Efile Mukulu Sha-Kwiyilu kula!’ Bantu booso abaadi abakaanya pa kumona Shadrake, Meshake na Abede-Nego abatuuku mu kaalo kushii kutaata su nkapeela. Kikoba kyabo, nyene yabo na bilamba byabo tabibaadi bitaate, tababaadi sunga n’eshiko dya kaalo nya.

Nabukodonosore nkwakula shi: ‘Efile Mukulu a Shadrake, Meshake na Abede-Nego eende ntumbo. Mwanda batumu mwikeyilu aaye bwa kwibapaasha. Ta kwi ungi efile bu aabo nya.’

Mu kileshesho kya beena Ebelu basatu, we na kitshibilo kya kwikala na lulamato kwi Yehowa sunga mu mwanda wi naminyi su?