Bipwa bikile pa 400 kunyima kwa kwibakuula midimba ya Yeelusaleme, tshiite mwakwidi mukata aabetamina bu Zakarii na mukashi aaye Elizabete abaadi bashaale mu bwipi na kibundji. Abapwile kwiyibakisheena munda mwa bipwa bibungi, anka tababaadi batande nya. Dingi efuku pabaadi Zakarii ashiiki kabanda mu ntempelo a kishila, mwikeyilu Gabryele baadi mumumwenekyele. Zakarii bapushile moo, kadi mwikeyilu Gabryele bamulungwile shi: ‘Totshiinanga. Nakutwadila mukandu wibuwa aufiki kwi Yehowa. Mukashi oobe Elizabete akatanda mwana, omuudikye bu Yowano. Yehowa mmumusangule bwa mufubo wapabwao.’ Zakarii nkwimwipusha shi: ‘Ne kukumiina byokula naminyi? Amina na mukashi ande tatupwile kununupa bwa kutanda.’ Mwikeyilu Gabryele nkumulungula shi: ‘Ne mutumiibwe n’Efile Mukulu bwa nkupa uno mukandu. Bu byoshonkumiina, oshaala kamaama mpaa’na apakatandikwa uno mwana.’

Zakarii nkushaala mu kadiimbo ka kishila kipindji kikile bula. Pabatukile paasha, bantu babadi abamutengyela abakimbile kuuka kibaadi kikitshikye. Zakarii tabaadi aakula nya. Baadi aleesha penda na maasa. Bantu nkushinguula shi Zakarii bapetele mukandu aufiki kwi Efile Mukulu.

Mwenda mafuku, Elizabete bapetele eyimi, aye nkutanda mwana mulume nka bibaambile mwikeyilu. Ba loole baaye na beena kifuko naaye abafikile mu kutala mwana. Abaadi na muloo ukata. Elizabete nkwibalungula shi: ‘Eshina dya mwana nyi Yowano.’ Abo nkumulungula shi: ‘Ta kwi muntu a mu kifuko kyenu e n’eshina bu Yowano. Muudikye bu Zakarii bwa kulama eshina dya nshaye.’ Kadi Zakarii nkufunda shi: ‘Eshina dyaye nyi Yowano.’ Nka paapa, Zakarii nkubanga kwakula dingi! Mukandu nkupalakana pabitale mwana mu Yudea mushima, akupu bantu nkubanga kukaanya pa kwiyipusha shi: ‘Uno mwana eekala muntu kinyi pakakulu?’

 Akupu Zakarii nkuwushiibwa na kikudi kiselele. Aye nkutemuka shi: ‘Yehowa atumbishiibwe. Baadi mulee Abrahame shi akatumu mupaashi Mesiya bwa kwitupaasha. Yowano akeekala mutemuki bwadya kulumbuula eshinda bwa Mesiya.’

Ungi mwanda wa kukaanya nkukitshikila Maadiya mukwabo na Elizabete. Atwiutala mu shapitre alondo.