Mukunkushi a bufumu bwa beena Looma, Keezare Oguste baadi mutume eyi bwa shi beena Yuuda booso baalukiile kwabo mu kubadikiibwa. Yoosefe na Maadiya abayiile ku Beteleeme kwi beena kifuko na Yoosefe. Maadiya baadi peepi na kutanda.

Pababafikile ku Beteleeme, abapetele mbalo ya kushaala mu kikutu kya nyema. Nyi mubaadi Maadiya mutande mwan’aye Yesu. Baadi mumupoombeleshe mu bilamba amulaadisha kalolo mu kikutu.

Kubaadi Balami ba mikooko abaadi abalama mikooko yabo bufuku paasha peepi na Beteleeme. Musango umune, mwikeyilu baadi mwimane kumpala kwabo, balami nkwifuunyishwa n’etaata dya ntumbo ya Yehowa. Abaadi bakwatshikye na moo, anka mwikeyilu bakwile shi: ‘Lekayi kutshiina. Nenutwadila mukandu wibuwa. Mesiya batandjikwa leelo uno ku Beteleeme.’ Nka mu yaaya nsaa, ba miikeyilu bebungi abamwekyele mwiyilu, bakula  shi: ‘Ntumbo ikale kwi Efile Mukulu mwiyilu, na butaale pa nsenga.’ Akupu ba miikeyilu abaadi bashimine. Balami ba mikooko abakitshine naminyi?

Balami ba mikooko nkwilungusheena shi: ‘Twendeyi ku Beteleeme nka binobino.’ Abo nkwenda bukidibukidi paasha, p’abafikile, abapetele Yoosefe na Maadiya mu kikutu na mwana aabo tooka.

Muntu eese baadi mupushe bibaadi mwikeyilu mulungule balami baadi akaanya. Maadiya baadi munangusheene bikata pabitale mayi a mwikeyilu na kwialamiina. Balami babalukiile mu kutala mikooko yabo, na kwalusha lutumbu kwi Yehowa bwa byooso bibaabadi bamone na kupusha.