Mu nsenga ya kutunduka nguba kwa Isaleele kubaadi bantu abaadi abashinkamisha shi lwenyeenye lwi kwibakunkusha. Dingi efuku bufuku, bangi bantu abakatukile dya Kutunduka abamwene kintu akitambuka na kupenyapenya mwiyilu bu lwenyeenye abo nkwikilonda. ‘Lwenyeenye’ nkwibakunkusha ku Yeelusaleme. Baaba bantu nkubanga kwipusha shi: ‘A mwana akeekala nfumu a beena Yuuda e kunyi?’ Tubafiki bwa kumwinamina.’

Eroode nfumu a mu Yeelusaleme pabaadi mupushe abakula pabitale nfumu mupya, baadi mwinyongole bikata. Baadi mwipushe ba tshiite mwakwidi be kunundu shi: ‘Yawa nfumu ababalayile, baadi na kya kutandikwa kunyi?’ Abo nkumulungula shi: ‘Batemuki babaambile shi mu Beteleeme.’ Eroode nkulungula baaba bantu shi: ‘Endayi mu Beteleeme nyi mwanukapete yawa mwana. Nwalukiile dino bwanudya kundungula kwadi. Nakyebe namu kumwinamina.’ Baadi mwibadimbe madimi.

‘Lwenyeenye’ nkubanga kutambuka dingi. Baaba bantu nkwilulonda mpa na ku Beteleeme. ‘Lwenyeenye’ nkwimana mwiyilu mwa nshibo ibaadi na bantu munda. Abo nkupeta Yesu na nyinaaye Maadiya. Abo nkwinamina mwana na kumupa bya buntu bya oolo, musengo wa kabanda na malaashi a miile. Yehowa nyi batumine bano bantu bwabadya nkamona Yesu su? Nya.

Yehowa nkulungula Yoosefe mu kilootwa bwabwa bufuku shi: ‘Eroode akimbi kwipaa Yesu.’ Ata mukashi oobe na mwana oobe nusuukile ku Ejiipitu. Nukekushaale mpa’nka na pa nkenulungula shi alukiilayi.’ Nka yaaya nsaa, Yoosefe na kifuko kyaaye abayile ku Ejiipitu.

Yehowa nyi balungwile baaba bantu baa kutunduka bwa kupela kwaluka dingi kwi Eroode. Nsaa ibaadi Eroode mumone shi tambaalukiile, bafiitshile munda. Bu bibakutshilwe bya kumona Yesu, baatshile kitshibilo kya kwipaa bana booso ba mulongo wa Yesu mu Beteleeme. Anka Yesu bapandjile, mwanda baadi kula kukile, mu Ejiipitu.

 Mwenda mafuku, Eroode bafwile. Yehowa nkulungula Yoosefe shi: ‘Alukiila takwi mwanda dingi.’ Yoosefe, Maadiya na Yesu abaadi baalukiile mu Isaleele, abo nkwibaka yaabo nshibo mu lupata lwa Nazareete.