Yoosefe na Maadiya abashaleele mu Nazareete na Yesu na bangi bana baabo balume na bakashi. Yoosefe baadi alombasha nkalo ya kifuko kyaye pa kukita mufubo wa kusèe mabaaya, aye nkwibalongyesha pabitale Yehowa na Miiya yaaye. Baadi ende na kifuko kyaye ku kitumbwilo nsaa yooso mu kulangwila na ku Yeelusaleme ku Kidiibwa kya lukilo ku kipwa kyoso.

Yesu pabaloombeshe bipwa 12, kifuko kyaaye kibayile lwendo lula ku Yeelusaleme nka bu pa kyubishi. Lupata lubaadi luule na bantu abaafikile ku musangeelo wa Kidibwa kya lukilo. Kunyima, Yoosefe na Maadiya ababangile kwalukiila ku nshibo na kwela binangu shi Yesu baadi mu kisaka. P’ababatadile mwi bakwabo, tababaadi bamumone nya.

Abo nkwalukiila ku Yeelusaleme na nkukimba munda mwa mafuku asatu. Ku nfudilo a byoso, abayiile mu ntempelo. Abapetele Yesu mmushaale munkatshi mwa balambukishi, ebatemeesha kalolo na kwela nkonko i na muulo. Balongyeshi  abakaanyine pa kupusha Yesu, abo nkubanga kumwela nkonko. Abaadi bakeme bibaadi Yesu eebaluula. Abo nkushingula shi Yesu baadi apusha Miiya ya Yehowa.

Yoosefe na Maadiya abaadi benyongole. Maadiya nkwakula shi: ‘A bwana, tubakukimbi mbalo yooso! Wekeele kunyi?’ Yesu nkwakula shi: ‘Tanuuku shi ne na kya kwikala mu nshibo ya Nshaami?’

Yesu nkwenda na bamutande ku Nazarete. Yoosefe nkulongyesha Yesu mudimo wa mabaaya. Omono shi Yesu baadi nsongwalume a kipaso kinyi? Pabaadi ende na kukula, Yesu baadi akulu mu kinangu na kukuminyiibwa kwi Efile Mukulu na kwi bantu.