Kunyima kwa Kidiibwa kya lukilo, Yesu na bolondji baaye abaadi balukiile ku Ngalileeya, abo nkukidila dya ku Samariya. Yesu baafikile peepi na musoko wa Sikare ayimana pa mbalo yabetanyina bu mushima wa Yakobo. Pabaadi Yesu ayikisha, balondji baaye abayile mu kuula bya-kudya mu musoko.

Mwana mukashi bafikile ku mushima mu kutapula meema. Yesu bamulungwile shi: “Mpe namu meema a kutoma.” Yawa nkwamba shi: ‘Bwakinyi w’esamba nami? Ami ne mukashi mwina-Samariya. Beena-Yuuda t’abeesambaa na beena-Samariya nya.’ Yesu nkumulungula shi: ‘Su bodya kuuka shi ne nnanyi, boodya kunteka meema, kadi naakupa meema a-muwa.’ Mukashi bayipwishe Yesu aakula shi: ‘Byabya abipatula kinyi? Twe na sunga kya kutapwila.’ Yesu bambile shi: ‘Ooso atomo meema a mmupa taayikala dingi na nyoota nya.’ Mukashi nkumulungula shi: “Mwanana, mpe namu aa meema.”

Yesu nkumwaluula shi: ‘Nda okafikye na mulume oobe kuno ku mushima.’ Mukashi nkwamba shi: ‘Ntshi na mulume’mi.’ Yesu namu shi: ‘Bwakula kya binyibinyi.’ We mwibakilwe misuusa itaano, kadi binobino, we na mulume shii oobe.’ Mukashi nkumulungula shi: ‘Namono shi we mutemuki. Mwilo wande wi kulangwila Efile pa uno mwengye, kadi beena Yuuda abaamba shi twi nkalangwila nka penda ku Yeelusaleme. Nakumiina shi apakafiki Mesiya, aketulongyesha bya kulangwila.’ Akupu Yesu nkumulungula kintu kyashalungwile ungi muntu amba shi: ‘Nnami winyi Mesiya uno.’

 Mukashi nkwenda lubilo paasha mu nkalungula beena Samariya shi: ‘Namono shi na nkapeta Mesiya. Auku myanda yande yooso. Fikayi numone!’ Abo nkwenda naye mpaa na ku mushima, abo nkuteemesha Yesu kwalogyesha.

Beena Samariya nkwitanyina Yesu bwadya kushaala nabo mu lupata lwaabo. Munda mwa mafuku abidi, aye nkwibalongyesha, na bantu bebungi nkuleesha lukumiino mwadi. Akupu abo nkulungula mukashi a mu Samariya shi: ‘Atwe abaapu kuteemesha uno muntu, tubatundula shi mmupaashi mbinyibinyi a ba pa nsenga.’