Kunyima kw’aye kusangula batumiibwa 12, Yesu bayikile ku mwengye, enda mbalo ibaadi kibumbu kya bantu kiibungye. Abaadi bafikye ku Ngalileya, ku Yudeya, ku Tiire, ku Sidone ku Siiri na ku ingi mpese ya Yoordano. Abafikile na bantu abaadi abakyengye na mikumbo, na bangi abaadi na bikudi bibi. Yesu baadi mwibapaashe booso. Akupu, bashaleele mu bwipi bwa mwengye, aye nkubanga kwakula. Baadi mupatuule kyatudi balombene kukita su atukimbi kwikala ba kuuku b’Efile Mukulu. Abitungu twikale bashinkamishe shi twi na lukalo na Yehowa na kulonga byatudya kumufula. Kadi tatwi balombene kufula Efile Mukulu su tatwi bafule bangi bantu nya. Abitungu twikale mu kalolo na bantu booso, mpa nka na b’eshikwanyi n’eetu.

Yesu bakwile shi: ‘Twe mulombene penda kufula ba kuuku boobe nya. Abitungu dingi kufula b’eshikwanyi noobe na kufwila bantu lusa alukatukila mwishimba. Su muntu bakufitshisha munda, enda kwadi musango umune okamutekye lusa. Kitshina bantu byabya byokumina shi bakukitshine.’

 Yesu bapeele dingi bantu elango dibuwa pabitale bintu bya ku mbidi. Bakwile shi: ‘Bi na muulo ukata kwikala kuuku a Yehowa pe kwikala na makuta ebungi. Ngifi e kwiba makuta obe, kadi takwi muntu mulombeene kwiba bukuuku bobe na Yehowa nya. Tanwikalakashanga bwa kya kudya, kya kutoma sunga kya kufwala. Talayi toonyi. Efile Mukulu ashinkamishaa kalolo shi twi na bya kudya bilombane. Kwikalakasha takwi bya kutentekyela muntu efuku sunga ndjimune nya. Shingulayi shi Yehowa euku kyoso kyatudi nakyo lukalo.’

Kibumbu kya bantu ta kibaadi kibande kupusha dingi ungi muntu aakula bu Yesu nya. Bakata babo ba bipwilo tababaadi abebalongyesha bino byoso bintu. Bwakinyi Yesu baadi mulongyeshi mukata? Mwanda, byooso bibaadi alongyesha bibaadi abifiki kwi Yehowa.