Yesu bafikile pa nsenga bwa kulungula mukandu wibuwa wa Bufumu bw’Efile Mukulu. Bwa kuleesha byakakitshi pakekala bu Nfumu, Yehowa baadi mumupe kikudi kiselele bwa kukita bilengyeleshi. Baadi na kya kupaasha baasha mikumbo yooso. Mbalo yooso ibadi eende, baadi apaasha baasha malaadi abaadi abafiki kwadi. Ba mpofu abaadi na kya kumona, ba nshikwe abaadi na kya kupusha, bantu bafwe bipindji bya mbidi abaadi na kya kutambuka, na baaba abaadi baakwatshibwe na bikudi bibi abaadi na kya kupaashibwa. Sunga muntu baadi na kya kukuma penda lwembe lwa kilamba kyaye, baadi na kya kupanda. Bantu abaadi abamuloondo kooso kubaadi eende. Mpa nka na nsaa ibaadi na kya kwikala bupenka, Yesu tabaadi mubingye muntu su ngumune nya.

Dingi efuku, abaadi batwadile Yesu muntu baadi mufwe bipindji bya mbidi ku nshibo ibaadi ashaala. Anka mu nshibo mubaadi muule bantu, takubaadi kipaso kya kwimutwela. Abo nkutubula mwasa mu musaka wa nshibo, bayisha yawa muntu mubaadi Yesu. Akupu Yesu balungwile yawa muntu shi: ‘Ebwe otambukye.’ Pabaadi mukite byabya, bantu abaadi bakaanye bikile.

Dingi efuku, pabaadi Yesu atwele mu kibundji, kubafikile bantu ekumi basha mukumbo wa nsudi abaadi bemane kubula ba mweela misaase shi: ‘Yesu, etukwaashe naamu!’ Mu aa mafuku, bantu baasha mukumbo wa nsudi t’ababadi na matalwa a kwifubwila peepi na baangi bantu nya. Yesu nkulungula bantu bwa kwenda ku ntempelo, bu bibaadi abyakula Mwiya wa Yehowa bwa kukita su muntu sha nsudi bapashiibwa. P’abaabadi abaaluka kwabo abaadi bapashiibwe. Nsaa ibaamwene umune aa kwabadi shi baapashibwa, baadi mwalukiile mu kutumbula Yesu na  kutumbisha Efile Mukulu. Nka penda umune a ku bantu ekumi, nyi baadi mutumbule Yesu.

Ungi mwana mukashi baadi mukumbe munda mwa bipwa 12, tabaadi’nyi na lukupilo lwa kupanda nya. Baafikile kumongo kwa Yesu mu kibumbu kya bantu aye nkukuma ku lwembe lwa kilamba kyaaye kya kunundu. Apanda musango umune. Pabakitshiine byabya, Yesu bayipwishe shi: “Nnaanyi yaawa bankumu?” Yaawa mwana mukashi baadi mukwatshikye na moo ukile, anka baafikile kumpala kwaye amulungula bya binyibiinyi. Yesu nkumunyingisha p’aye kumulungula shi: ‘Mwan’ande mukashi, enda mu butaale.’

Ungi mukata a basalayi abetanyina bu Yayiluse baadi musendeele Yesu aamba shi: ‘Fika naamu kwande! Mwan’ande mukashi mmukambilwe na malaadi.’ Anka, kumpala kwa shi Yesu afikye kwa Yayiluse, mwana baadi mufwe. Pabafikile Yesu bamwene bantu bebungi abafiki mu kusamba kifuko na maalo. Yesu nkwibalungula shi: ‘Tanudilanga, ta mmufwe mmulaale.’ Akupu bakwatshile yawa nsongwakashi kwiyaasa aaye nkwakula shi: “Mwan’ande, buuka!” Beebwele musango umune, Yesu nkutuma ba mutande bwabadya kumupa kya-kudya. Banda kwela kinagu bibaadi ba mutande balombeene kupusha!