Bafadisee abaadi abakitshi myanda yooso nka penda bwa kukanyisha bantu. Su abakitshi mwanda na kalolo, bibaadi nka bwa shi baangi bebamone. Abaadi abeele nteko mu ma mbalo e bantu bebungi bwa shi booso bebamone. Bafadisee abaadi balamiine nteko ibula na kwiyalushenanga mu bitumbwilo na mu mansanka a miseese mubaadi bya shi baangi bebapusha. Kadi bantu abaadi bakaanye pabaadi Yesu mwibalungule shi: ‘Tanwikalanga anutekye bu Bafadisee. Abamono shi bishima byabo bibungi abikanyisha Efile Mukulu, aku namu ta nnabyo. Luteko lwi pankatshi poobe na Yehowa. Twalusheenanga myanda imune misuusa na misuusa.’ Yehowa akumina shi omulungule bi mwishimba dyobe.

 ‘Byabya tekayi bino: “Yaay’etu e mwiyilu, eshina dyoobe dyende ntumbo. Bufumu bwobe bufikye. Kyookyebe kikitshikye pa nsenga, mumune na mwiyilu.”’ Yesu bebalungwile dingi bwa kuteka kya-kudya kya kwifuku, bwa kufwidiibwa lusa ku milwisho yabo na bwa ingi myanda yabo.

Yesu bakwile shi: ‘Tekayi kushii kukooka. Tungunukayi na kuteka Nshenu Yehowa bwa bintu bibuwa. Nambutuwile eese, akuminaa kupa mwan’aye nka bintu bibuwa. Su mwana oobe akuteka mukate, we kumupa ebwe? Sunga akuteka mushipa, we byakumupa nyoka?’

Akupu Yesu baadi mupatuule shi: ‘Su anwe anuuku kupa bana beenu bintu bibuwa, mbikunyi bilombeene Nshenu Yehowa kukutwa kwinupa kikudi kiselele? Tekaayi kyoso kyanudi nakyo lukalo.’ Okwete kulonda elango dya Yesu su? Obe namu otekaa bwa bintu kinyi?