Kukatusha bukome bwa kupasha ba sha mikumbo na kusangusha bafwe, Yesu baadi dingi na matalwa ku bipapi na mpeshi. Kunyima kwa kuteka ku mwengye, Yesu bamwene kipapi kikata ku Kalunga ka Ngalileeya. Batumiibwa baaye abadi abakimbi bya kukambila kipapi mu bwato. Yesu baafikile na kutambuka kunundu kwa meema pa bwipi nabo. Nsaa ibaadi batumiibwa bamone muntu atambuka kunundu kwa meema, abapushishe moo. Anka Yesu bebalungwile shi: ‘Nnami. Lekaayi kutshina.’

Mpyeele bambile shi: ‘Mwanana, su nnobe eyendo, ntumine eyi dya kufika koodi.’ Yesu balulwile Mpyeele shi: ‘Fika kwandji.’ Munkatshi mwa kipapi, Mpyeele batukile mu bwato, aye nkutambuka kunundu kwa meema bwa kwenda kwi Yesu. Kadi pabafikile peepi naye, Mpyeele batadile kipapi aye nkupusha moo. Akupu babangile kwiyina. Mpyeele nkwela musaase shi: ‘Mwanana, mpaashe!’ Yesu nkumukwata ku mboko, na kwakula shi: ‘Bwele mpaka bwakinyi? Lukumiino lobe lwi pekunyi?’

Yesu na Mpyeele abatwelele mu bwato, kipapi kibalekyele musango umune. We kunangushena bibapushishe batumiibwa su? Abaadi baakule shi: “Mbinyibinyi we Mwan’Efile Mukulu.”

Yesu tabaadi mubatamishe kipapi penda uno musango nya. Dingi efuku pabaadi Yesu na batumiibwa abende ku lungi lupese lwa kalunga, Yesu baadi mulaale ku nsongo ya bwato. Pabaadi mulaale, kubafikile kipapi kikata. Mbundambunda ya meema nkubanga kwikupila ku bwato abo nkuula na meema. Batumiibwa nkubuusha Yesu mu tulo na kusama shi: ‘Mulambukishi, byatufu’bi! Etupaashe!’ Yesu babukile aye nkulungula kalunga shi: ‘Umina!’ Musango umune, kalunga na kipapi nkuleka. Yesu nkwipusha batumiibwa shi: ‘Lukumiimino lwenu lwi pekunyi?’ Abo nkubanga kwilungushena shi: ‘Mpa na lupapi na kalunga abimukookyela.’ Batumiibwa abaukile shi su abakulupilanga mwi Yesu n’eshimba dyoso, tababaadya kwikala na moo wa kintu su nkimune nya.