Yesu na batumiibwa abaadi batambukye kubanga kwibanda dya Kedrone mpa na Ku mwengye wa Olive. Bibaadi kunyima kwa midi ya bufuku na mweshi ubaadi ukumbane kishengu. Nsaa ibabafikile mu lupango lwa Getesemane, Yesu bebalungwile shi: “Shalaayi pano nutooshe bufuku naami.” Akupu Yesu baadi mwisesele kapindji mwifuba, aye nkukunama mu nsenga. Na kinyongwa kikata, batekyele kwi Yehowa shi: “Bikitshikye bu byokyebe.” Akupu Yehowa batumine mwikeyilu bwa kukankamika Yesu. Pabaadi Yesu mwalukye kwi batumibwa, aye nkupeta basatu ba kwabadi mu tulo. Aye nkwakula shi: ‘Bukaayi! Ino ta nsaa ya kulala nya! Nsaa ibalombana yandya kutudiibwa mu maasa a beshikwanyi bande.’

Mu kapindji kapela Yuudase bafikile na kibumbu kikata kya bantu be na mpete na tubongye. Yuudase baadi auku kubaabadi balombeene nkapeta Yesu mwanda abaadi abafiki misuusa ibungi mu lwalwa lupango. Yuudase balungwile basalayi mushindo wabadya kutundula Yesu. Bakatukile eenda kwi Yesu amulungula shi: ‘Nakwimuna, Mulambukishi,’ kunyima bafifile Yesu milomo. Yesu bamulungwile shi: ‘Yundase, Ompana na kunfifya milomo?’

Yesu baadi mwifubwile kwi kibumbu ebepusha shi: “Anukimbi nnanyi?” Abo nkumwaluula shi: “Yesu a mu Nazarete.” Akupu Yesu nkwibaluula shi: “Nnaami uno,” bantu nkwaluka kunyima na nkupona paashi. Yesu bebayipwishe dingi shi: “Anukimbi nnanyi?” Abamwalulwile shi: “Yesu a mu Nazarete.” Yesu nkwibaluula shi: ‘Nenulungula shi nnami uno. Lekayi bano bantu bende.’

Pabamwene Mpyeele bibaadi bikitshikye, basomwene lupete, aye nkutshiba etwi dya Malkuse mufubi a tshite mwakwidi mukata e panundu. Kadi Yesu bakumine etwi dya yawa muntu, aye nkumulunga dyanka. Akupu Yesu balungwile Mpyeele shi: ‘Alusha lupete lobe mu mbalo yaalo. Mwanda baaba booso abakwata lupete, abakafwila ku  lupete. Basalayi abakwatshile Yesu bamwanya myoshi ku maboko, batumiibwa nkusuuka. Akupu kibumbu kya bantu kibayile naaye kwi Hana, mukata a ba tshiite mwakwidi. Hana nkwela Yesu nkonko, akupu aye nkumutuma ku nshibo ya Kayifase baadi Tshite mwakwidi Mukata e panundu. Kadi nkinyi kibaadi kifikile batumiibwa?