Yesu pabaadi na batumiibwa baye mu kadimbo ka kwiyilu, baadi mwibalungule shi: ‘Mu buno bufuku, anwe boso anukandekye.’ Mpyeele bamulungwile shi: ‘Ami nya! ‘Sunga boso bakuleka, Ami nta nkulekye sunga musango umune.’ Anka Yesu balungwile Mpyeele shi: ‘Kumpala kwa shi etombole disame, okyebe kwakula misango isatu shi tonguuku.’

Nsaa ibaadi basalayi batwale Yesu kwa Kayifase, batumiibwa baaye bebungi abasukile. Kadi babidi ba kwabadi abalondele mwamwa mu kisaka. Mpyeele baadi umune a kwabadi. Bayile mwibalasa dya nshibo ya Kayifase aye nkubanga koota kaalo. Mu dyadya etaata, mufubi mukashi bamwene mpala ya Mpyeele, aye nkwakula shi: ‘Nankuuku! Boodi na Yesu!’

Mpyeele nkwakula shi: ‘Nya, Ntshinaadi naye’mi! Ntanguuku kyookyebe kwakula!’ Akupu aye nkwifubwila dya ku kiibi. Kadi ungi mufubi mukashi bamumwene aye nkulungula kisaka shi: ‘Uno muntu baadi na Yesu!’ Mpyeele nkwamba shi: ‘Ntanguku Yesu nya!’ Ungi muntu nkwakula shi: ‘Obe we umune a munkatshi mwabo! Ne nkushinkamisha shi ngakwilo oobe aleesha patooka shi we mwina Ngalileeya nka bu Yesu.’ Kadi Mpyeele nkutshipa shi: ‘Ntamuuku nya!’

Anka yaaya nsaa, etombole dibasamine. Mpyeele bamwene Yesu bealuula bwa kumutala. Batentekyeshe mayi a Yesu, aye nkutuka pasha na nkudila bikata.

Mu yaaya nsaa, beena Sanedrine abaadi bepushene bwa kusambisha Yesu munda mwa nshibo ya Kayifase. Abapwile kwata kitshibilo kya kwipaa Yesu, anka abaadi abakimbi kabingilo. Kadi tababaadi abapete kabingilo nya. Nfudiilo a byoso, Kayifase bayipwishe Yesu shi: ‘We Mwan’Efile Mukulu?’ Yesu nkwaluula shi: ‘Oolo.’ Kayifase nkwamba shi: ‘Ta twi lukalo na tungi tubingilo nya. E na kapeesha kakile!’ Lupango looso nkukumina shi:  ‘Mupwandjikile lufu.’ Abo nkukupila Yesu mapi, nkumufidila mata, nkumwanya kilamba ku meeso, nkumukupila bikata na kwakula shi: ‘Su we mutemuki, etulungule bakukupila!’

Pabubatokyele, abayile na Yesu ku nshibo ya Tumiladi twa Sanedrine abo nkumwipusha dingi shi: ‘We Mwan’Efile Mukulu su?’ Yesu nkwibaluula shi: ‘Nukwete kwakula shi Ne mwana aye.’ Akupu, abo nkumutshibila kiimu kya kapeesha na nkwenda naye kwa Ponte Pilato, mukata a beena-Looma. Nkinyi kibaadi kikitshikye kunyima? Tulondesheyi.