Kunyima kwa Yesu kufwa, ungi muntu sha nfwalanga abetanyina bu Yoosefe batekyele Pilato bwa kuyisha mbidi ya Yesu ku mutshi. Yoosefe baadi mupombeleshe mbidi yaaye na kilamba kibuwa kipya kishingye malaashi, aye nkwiyitula mu mashama apya. Abaadi na ebwe dikata dishikye ku kibelo. Bakata ba ba tshiite mwakwidi nkulungula Pilato shi: ‘Atutshinyi shi tala bangi ba ku balondji ba Yesu bakaata kitanda kyaye na kwakula shi basanguka.’ Pilato nkwibalungula shi: ‘Shitayi mashama nwikutuule ba nsaamo.’

Kunyima kwa mafuku asatu, bangi bana bakashi abayile ku mashama ku nkyelo abo nkusangana ebwe ndikatukye kwanka. Abapetele mwikeyilu mu mashama bebalungwile shi: ‘Lekayi kupusha moo. Yesu mmupwe kusanguka. Endaayi nukalungule balondji baye shi bakamupete ku Ngalileeya.’

Maadiya a ku Mangadala bayile lubilo akamona Mpyeele na Yowano. Aye nkwibalungula shi: ‘Kwi muntu bakatusha kitanda kya Yesu!’ Mpyeele na Yowano nkwenda lubilo ku mashama. Pababasangene shi mwi bisumanga, abaadi balukiile ku mashibo kwabo.

Pabaadi Maadiya mwalukile ku mashama, bamwene ba mwiikeyilu babidi munda ebalungula shi: ‘Ntanguku kubabatulu Nfumwami.’ Akupu bamwene muntu, aye nkunangushena shi baadi mulami a ku mashama, Maadiya nkwamba shi: ‘Mwanana, ndungule namu su nnobe mumukatushe.’ Kadi pabakwile yawa muntu shi: “Maadiya!” baukile musango umune shi baadi Yesu. Aye nkwela musaase shi: “Mulongyeshi!” na nkumukwata kiipa. Yesu nkumulungula shi: ‘Enda okalungule bakwetu balume shi bommono.’ Maadiya, bayile lubilo kwi balondji baye ebalungula shi bakamona Yesu.

Kunyima mu dyadya efuku, kubaadi balondji babidi abaadi abakatuka ku Yeelusaleme abende ku Emause. Ungi muntu baadi mwibabangye mwishinda aye nkwibepusha kibabaadi abesamba. Abo nkumwaluula shi: ‘Twe mupushe?’ Takudi mafuku asatu n’abo kwipaa Yesu kwi bakata ba batshite mwakwidi. Binobino bangi bana  bakashi abakula shi basanguka!’ Yawa muntu nkwipusha shi: ‘Tanukuminaa mayi a batemuki? Abo nkwamba shi, Kidishitu baadi na kya kufwa na kusanguka.’ Baadi atungunuka na kwibapatulwila Bifundwe. Pababafikile ku Emause, balondji abatekyele bwa shi yawa muntu ende nabo. P’abelele luteko bwa mikate nsaa ya kidibwa kya kyolwa, abaadi bashinguule shi nyi Yesu. Akupu aye nkwibashimina.

Bano balondji babidi nkwenda lubilo mu nshibo ya mu Yeelusaleme kubaadi kwibungye batumiibwa bwa nkebalungula bibaadi bikitshikye. Pabaabadi kwakwa munda mwa nshibo, Yesu baadi mwibamwenekyele booso. Ku mbangilo, batumiibwa tabaadi bakumine shi baadi Yesu nya. Akupu bebalungwile shi: ‘Talayi mu maasa mwande; nkumeyi. Bibaadi bifundjibwe shi Kidishitu a kasanguka ku lufu.’