Pabaadi Yowano mutumiibwa mu lukano mu kisangi kya Patmose, Yesu bamulesheshe bimonwa 16 sunga binfwanyi bya myanda ayikafiki. Byabya bimonwa bibaadi abileesha abikekala eshina dy’Efile Mukulu na kya kutumbishibwa, Bufumu bwaye na kya kufika na abikakitshika kikyebe ky’eshimba dyaye pa nsenga bu byakikitshikaa mwiyilu.

Mu kimonwa kimune, Yowano bamwene Yehowa mwiyilu ku lupuna-nsulu lwaye lwa ntumbo, mbamwifunyishe kwi bakulu 24 bafwale bilamba bitooka na mbango ya oòlo ku mitwe yabo. Etaata dya mipenyo ya mpeshi na mikungulo ya tupandapanda ibafikanga ku lupuna-nsulu. Bakulu 24 abaadi babandame kumpala kwa Yehowa na kumulangwila. Mu kingi kimonwa, Yowano banwene kibumbu kikata kya bantu ba bisamba, miilo na ndjimi yooso abalangwila Yehowa. Yesu, aye Mwana a mukooko, ebakunkusha na kwibatwala ku meema a muuwa. Kunyima, mu kingi kimonwa, Yesu babangile kumunana bu Nfumu mwiyilu, pamune na bakulu 24. Mu kimonwa kibalondele, Yowano bamwene Yesu alu ngoshi na nyoka mukata mwikale Satana, na ba demo byaye. Yesu nkwibasumbula mwiyilu abo nkupona pa nsenga.

 Akupu Yowano bamwene kinfwanyi kya Mwana a mukooko na bantu 144 000 mbemane ku Mwengye wa Siyona. Bamwene dingi mwikeyilu apapama dya kipeepi na nsenga, alungula bantu bwabadya kutshina Efile Mukulu na Kumupa ntumbo.

Mu kingi kimonwa kibalondele, bamwene ngoshi ya Armagedone. Mu yaya ngoshi, Yesu na kilwilo kyaye abaipaa ndumbulwilo ebubi a Satana. Mu kimonwa kya nfudilo, Yowano bamwene kwipushena kupwidikye mwiyilu na pa nsenga. Satana na lutandwa lwaye abayipayibwa bwa looso. Booso be mwiyilu na be pa nsenga abaata eshina dya Yehowa bu dya kishila na kumulangwila nka bupenka bwaye.