Mu Fidipe, mubaadi ungi nsongwakashi mpika baadi na demo. Yawa demo baadi amupa kikudi kya lubuko na baadi apetesha ba nfumwaye makuta ebungi. Pabaadi Mpoolo na Silase bafikye mu Fidipe, yawa nsongwakashi baadi ebalondo munda mwa mafuku ebungi. Demo baadi eele musaase mwadi shi: “Bano bantu mbapika b’Efile Mukulu Mukile Bukata a Kwiyilu.” Nfudiilo a byoso, Mpoolo balungwile demo shi: ‘Mwishina dya Yesu tuuka mwadi!’ Demo batukile mwi yawa nsongwakashi.

Pabaadi ba nfumwa’ye bamone shi tabaadi dingi bya kwibapetesha makuta, abafitshile munda bikata. Abatwadile Mpoolo na Silase kwi bakata ba kibundji na kwakula shi: ‘Bano bantu tabanemeka mwiya, bakwete kutwesha kafutakanyi mu kibundji kyoso!’ Bakata ba kibundji abatushishe eyi bwa shi bakupile Mpoolo na Silase na kwibeela mu lukano. Mulami a lukano bebatweshele munkatshi mwa lukano na kwibeela mu myomba.

Mpoolo na Silase abaadi abayimbi bwa kutumbisha Yehowa, bangi beena lukano abaadi abebapusha. Musango umune munkatshi mwa bufuku, nsenga ibaadi itshinkye nshibo ya lukano nkwinyunya bikata. Biibi bya ku lukano nkufunguka na nkano na myomba byoso nkufunguka. Mulami a lukano bafikile lubilo munda aye nkumona shi biibi bibaadi binfungukye. Bamwene shi beena lukano booso abatuku, aye nkukimba lupete bwa kwiyipaa.

Nka paapa, Mpoolo nkumwitamina shi: ‘Twekitanga bibubi! Twi mwanka booso!’ Mulami a lukano bayiile lubilo aye nkukunama kumpala kwa Mpoolo na Silase. Bebatekyele shi: “Abitungu nkite kinyi bwa kupashiibwa?” Abamulungwile shi: ‘Abitungu obe na ba mu nshibo yoobe nukumiine mwi Yesu.’ Akupu Mpoolo na Silase nkwibalongyesha eyi dya Yehowa, mulami a lukano na ba mu nshibo yaye abaadi babatshishibwe.