DILONGYESHA 8
Abrahame na sara abakokyela Efile Mukulu
Kubaadi lupata lwi peepi na Babele lwi na eshina bu Ure, mwamwa bantu abaadi abalangwila b’efile bebungi kushii Yehowa. Anka mu Ure mubaadi muntu umune baadi alangwila nkapenda Yehowa. Eshina dyaaye mbu Abrahame.
Yehowa balungwile Abrahame shi: ‘Katuka mwiumbo dyenu, munkatshi mwa bakwenu, wende kwiumbo dyankakulêsha.’ Yehowa nkumulaa shi: ‘Okafiki mwilo ukata, nakakitshi bintu bibuwa kwi bantu booso pa nsenga pa mwanda oobe.’
Abrahame tabaadi auku kubaabadi abamutumu kwi Yehowa nya kadi baadi’nka na lukulupilo. Byabya Abrahame, mukashi aaye Sara, na Tera nshaaye na Abrahame na Loota mwipu aaye abaadi bakookyele, abo nkwanya mabofu na nkubanga lwendo lula.
Abrahame baadi na bipwa 75 nsaa ibakafikile na kifuko kyaye mwiumbo dibaadi adikumiina Yehowa bwa shi akashaale. Dibaadi aditaminyibwa bu Kaanana. Kwakwa Efile Mukulu nkwisamba na Abrahame na kumulaa shi: ‘Dino dyooso eumbo dikwifunyishe, nankedipa bana boobe.’ Kadi Abrahame na Sara abaadi bapwe kununupa kushii mwana su ngumune. Byabya Yehowa baadya kukumbasha wawa mulayilo waye naminyi?
“Ku lukumiino, Abrahame bakookyeele kwaluula ku lwitanyino, aye nkwenda mwiumbo dibaadi na kya kupeta bu bupyanyi; baayiile kushi kuuka kubaadi ende.”—Beena-Ebelu 11:8
