Kubaadi kupwe kukila bipwa bibungi kasha Abrahame na Sara beyibakishena. Abapwile kuleka nshibo yabo ibuwa mu Ure bwa nkashaala mu tushibo twa mapema. Kadi Sara tabaadi edidi nsaa yooso mwanda baadi mukulupile mwi Yehowa.

Bu bibaadi Sara akimbi kupeta mwana, balungwile Abrahame shi: ‘Su mufubi ande Hagaare apeta mwana, ekala’nka bu ande.’ Mwenda mafuku, Hagaare bapetele mwana mulume. Eshina dyaye dibaadi bu Ismaele.

Kunyima kwa bipwa bibungi, pabaadi Abrahame na bipwa 99 Sara na bipwa 89, abapetele beenyi basatu. Abrahame nkwibetanyina bwa kwikisha muushi mwa mutshi na kudya kidiibwa. Weuku su baaba beenyi basatu abaadi mbannanyi? Abaadi bamikeyiilu! Abalungwile Abrahame shi: ‘Kipwa akifiki, mu ano mafuku amune, obe na mukashi oobe, anukatanda mwana mulume.’ Sara baadi apusha ku lupese. Aye nkubanga kwisepela na kunangusheena shi: ‘Nee mulombeene dingi kutanda na buno bununu bwande?’

Kipwa kibalondele, Sara nkutanda mwana mulume, anka bibaadi mwikeyilu a Yehowa mulee. Abrahame nkumuudika bu Isaake, eshina adipatuula shi: “Kusepesha.”

 Pabaadi Isaake mu bipwa bitaano, Sara bamwene bibaadi Ismaele oolomona Isaake. Baadi akimbi kukalwiila mwana aaye, aye nkulungula Abrahame bwa kutuma Hagaare na Ismaele ingi mbalo. Anka, Abrahame tabaadi mukumiine musango umune nya. Kadi Yehowa nkulungula Abrahame shi: ‘Teemesha Sara. Nakyebe kukalwila Ismaele. Anka, ku bukwashi bwa Isaake ngi akukalombana milayilo yaande.’