Kunyima kwa Mpeshi, bana ba Nowa na bakashi baabo abatandjile bana bebungi. Bifuko byabo nkutama, abo nkubanga kupalakana mu ma mbalo elekeene a nsenga, nka bu bibaadi Yehowa mwibalungule bwa kukita.

Anka bingi bifuko tabibaadi bikokyele Yehowa nya. Abo nkwamba shi: ‘Twibakye lupata na kaleya [musungo] wi na nsongo aikumu eyilu. Byabya atupete nkumo, tala beetupalakasha pa nsenga.’

 Yehowa tabaadi musangeele na binangu bya baaba bantu nya, nyi bwakinyi baadi mwibemikye. Weuku bibaadi mwibakite? Baadi mufutakashe ndjimi yaabo musango umune. Kubanga nka paapa, tabaadi dingi na mushindo wa kwipusheena nya, abo nkwimika lwibako lwabo. Lupata lwabo lubaabangile kwibaka abaadi abelwitamina bu Babele, abipatuula shi: “Kabulakanyi.” Bantu nkubanga kupalakana na kwenda mu kushaala mu nsenga yooso. Kadi ababangile kukita myanda ibubi mu aa ma mbalo apya ababadi bashaale. Kubaadi muntu a kwabadi bashadile mufule Yehowa su? Atukebimono mu shapitre alondo.