Isaake baadi na bipwa 40 pabaadi mwibakile Rebeka. Baadi mumufule bikata. Babatandjile bana balume babidi ba mpasa.

Mukulu baadi Esau na mumulondele baadi Yakobo. Esau baadi mufule mu mapya mwanda baadi mpiibwe. Anka Yakobo namu baadi akumiina kushala paasha.

Mu aa mafuku, mwana mbedi abaadi abamupa kipindji kikata kya nsenga na makuta ebungi a nshabo su baafu. Abaadi abetanyina byabya bu bupyanyi. Mu kifuko kya Isaake, kwikala mpyanyi kubaadi mpa na kwikala mu mulongo wa milayilo ya Yehowa ibapeele Abrahame. Esau tabaadi anangushena bwa yaaya milayilo nya, anka Yakobo baadi auku shi i na muulo ukata.

Dingi efuku, Esau nkwalukiila mu mapya mukookye bikile. Aye nkupusha mapembwe kubaadi akuteekye Yakobo, aye shi: ‘Ngiu’mi afu na nsala! Mpe ndambo a bino bintu bimongolokye!’ Yakobo nkumulungula shi: ‘Banda kundaa shi okyebe kumpa bupyanyi boobe.’ Esau nkwakula shi: ‘Bupyanyi bwande bwibuwa ku kinyi? We kwibwata kadi ompe kya kudya.’ We kwibwata su okumiina. Nakimbi penda kidiibwa. Omono shi Esau bakitshiine kalolo su? Nya. Mwanda Esau baadi mutuushe kintu ki na muulo ukata penda bw’elonga dya bintu bimongolokye.

Pabafikile Isaake ku bununu, nsaa ibakumbeene ya kwelela mwan’aye mukulu  myabi. Kadi Rebeka baadi mukwashe Yakobo mwana mukinga bwa kupeta myabi. Pabaukile Esau, baafiitshile munda bikile, aye nkwata mpàngo ya kwipaa lupasa naaye. Isaake na Rebeka nkukimba bya kukalwila Yakobo p’abo kumulungula shi: ‘Suukila kwi tuutu a nyin’oobe Labane nyaa na apapu nsungu ya mukwenu Esau.’ Yakobo nkuteemesha elango dya bamutande, aye nkusuuka bwa kupaasha muwa waye.