Moyiise balayile Fharaone shi t’afiki dingi mukumumona nya. Kadi kumpala kwa shi ende, balungwile Faraone shi: ‘Munkatshi a bufuku, bana ba kumpala booso ba mu Ejiipitu, bana boobe, na bana ba bampika, abafu.’

Yehowa nkulungula beena Isaleele bwa badya kudya kidibwa kipabwakyo. Bambile shi ‘Tshindjayi mwana a mukooko ulume wa kipwa kimune sunga mbushi, nushingye mase ku ntempa ya biibi. Nwekyele mwiita, nwiudye na mukate ushiina kitatusho. Nwikale bafwaale, sandale ku mikoolo yeenu nwilumbule bwa lwendo. Buno bufuku anwikala mbulungantu.’ Banda kunangaungusheena bibaadi muloo wa beena Isaleele!

Munkatshi’abufuku, mwikeyilu a Yehowa bakidile ku nshibo yooso mu Ejiipitu. Ku nshibo yooso ishibaadi ishingye mase ku ntempa ya kiibi, bana booso ba kumpala abafwile. Anka mwikeyilu bakidile’nyi ku mashibo abaadi na bitundwiilo bya mase. Bifuko byooso bya beena Ejiipitu, ba mpeta na balanda abaadi bashimishe bana baabo. Kadi ta nkufwe mwana a beena Isaleele su ngumune.

Mpa na mwana a Faraone bafwile. Faraone tabaadi na kya kukita su nkimune nya. Musango umune balungwile Moyiise na Aarone shi:  ‘Ebweyi. Katukaayi pano. Endaayi nukafubile Efile Mukulu eenu. Ataayi nyema yeenu nwende!’

Munkatshi a bufuku mu mweshi, beena Isaleele nkutuuka mu Ejiipitu, belongye mbifuko na bisamba. Booso bwabo abaadi 600000 balume kushii kubadika bakashi na bana. Na dingi bangi bantu bebungi abayile nabo bwa shi bamone n’abo namu bya kulangwila Yehowa. Beena Isaleele abaadi mbulungantu bwa looso!

Bwa kutentekyesha bibaadi Yehowa mwibapaashe, abaadi na kya kwikala abadi kyakya kidiibwa ku kipwa kyooso. Abaadi abekiitamina bu kidiibwa kya Lukilo.