Moyiise na Aarone abaayile bakalungula Faraone mukandu wa Yehowa shi: ‘Su tokumiina kuleka mwilo wande wenda, nantumu bìbùwa mu nsenga yooso.’ Bìbùwa bibungi nkuula mu mashibo a beena Ejiipitu, ba mpeta na balanda. Eumbo dyoso nkuula na bìbùwa. Kadi mwiumbo dya Goshene mubaadi beena Isaleele tamubaadi bìbùwa nya. Kubangila’nka pa kipupa kya kananka, bipupa byoso bibaadi abikyengesha nkapenda beena Ejiipitu. Faraone nkwibasendeela shi: ‘Tekaayi namu Yehowa bwa shi akatushe kula bino bìbùwa. Mwilo wenu ngulombeene kwenda.’ Anka Yehowa pabakatwishe bìbùwa kula, Faraone baadi mwaluule binangu byaye. Kwi dilongyesha dibapetele su?

Yehowa bakwile shi: ‘Su Faraone apele’nka kuleka mwilo wande wenda, nyema yooso i mu lupata lwa Ejiipitu ayikumbu kipupa na kufwa.’ Efuku dibalondele, nyema nkubanga kufwa. Kadi nyema ya beena Isaleele tayibaadi ifwe nya. Faraone baadi’nka kyayididiila na kupapisha eshimba dyaye kushii kwibalekyela.

Akupu Yehowa balungwiile Moyiise bwa kwaluka dingi kwi Faraone na kwata buto bwa shi ebwele mwiyilu. Bwabwa buto nkwaluluka bu tumwe, ato nkuula mwiumbo dyoso dya beena Ejiipitu. Tumwe nkubanga kukyengesha beena Ejiipitu bikata na nyema yaabo. Sunga mbyabya, Faraone baadi’nka mupapishe eshimba bwa kutadiila beena Isaleele.

Yehowa nkwalusha dimo Moyiise kwa Faraone na uno mukandu shi: ‘Okyotungunuka’nka na kupela kufungula mwilo wenda? Malooba, mpeshi a  mabwe anoko mwiumbo dyoso.’ Butokye, Yehowa nkutuma tupanda-panda na mpeshi a mabwe, na kaalo. Kubaadi tupanda-panda twisangye na mpeshi a mabwe byabashamwene kasha mu Ejiipitu mooso. Mitshi yooso na mafuba ooso bibaadi bilwishibwe, kadi mu Goshene ta mubaadi mukitshikye kintu nya. Faraone nkwakula shi: ‘Etendeeyi kwi Yehowa bwa shi su ayimika namu mpeshi! Kunyima nwi kwenda booso.’ Kapindji kapeela kunyima mpeshi a mabwe baadi mutshibikye, Faraone balulwile binangu byaaye.

Akupu Moyiise nkwamba shi: ‘Binobino mpasu ayidi mitshi yooso ayimene na bintu byooso bisheele ku mpeshi a mabwe.’ Midiyo ya mpasu nkudya bintu byooso bibashadile mu mafuba na mitshi yooso. Faraone nkwidila shi: ‘Esendeeleyi kwi Yehowa bwa shi akatushe ino mpasu pano.’ Kadi sunga mbibaadi Yehowa mwimikye mpasu, Faraone baadi nk’abindula.

Yehowa balungwile Moyiise shi: ‘Wol’eyaasa dyobe mwiyilu.’ Musango umune, eyilu nkufiita dyooso nka bwii na mufito. Munda mwa mafuku asatu beena Ejiipitu t’abaadi na byakumona kintu sunga muntu nya. Nkapenda beena Isaleele nyi abaadi na etaata mu mashibo aabo.’

Faraone nkulungula Moyiise shi: ‘Endayi. Anka nulekye nyema yeenu pano.’ Moyiise namu shi: ‘Abitungu twaate nyema yatudi balombeene kulambula Efile Mukulu eetu milambu.’ Faraone baadi mufite munda bikata. Nkulungula Moyiise na kapesha kooso shi: ‘Katuka! Su nakumono dingi kumpala kwande, nakwipaa.’