Abaadi abauku kifuko kya Yakobo mu Ejiipitu bu beena Isaleele. Kunyima kwa lufu lwa Yakobo na Yoosefe, ungi Faraone mupya baabangile kumunana. Baadi atshiinyi shi tala beena Isaleele bakila beena Ejiipitu bukome. Aye nkwikasha beena Isaleele bu bapika. Na kubanga kwibabudisha matafwadi na kwibafubisha midimo ibukopo ya mafuba. Pabaadi apende beena Isaleele na kufwima, beena Ejiipitu abaadi abanyinsha kwibafubisha midimo ibukopo. Mwanda Faraone tabaadi akumiina bwa shi beekale bebungi nya, aye nkutuusha mwiya bwabadya kwipaa bana booso balume baabatanda kwi beena Isaleele. Banda kupwandjikisha moo ubaadi nao beena Isaleele bwa uno mwanda!

Ungi mwana mukashi mwina Isaleele abetamina bu Yokebete baadi na mwana tooka mulume e buwa. Bwa kumukalwila, aye nkumwela mu kisaku kya malengye akamutuula ku bukunkula bwa Mwela wa Nile. Taata aye na yawa mwana tooka Miryame nkushaala bwa kumulama.

 Pabafikile nsongwakashi a Faraone mu kwitumpa ku mwela, bamwene kisaku. Apeta mwana tooka adidi mwanka, aye kumupusha lusa. Miryame nkumwipusha shi: ‘Ne kukukimbila mwana mukashi mulombeene nkukushiisha uno mwana?’ Pabaadi pakumiine nsongwakashi a Faraone, Miryame bakaatshile nyin’aye Yokebete. Nsongwakashi a Faraone nkumulungula shi: ‘Ata uno mwana, omunkushiishe, na kakupa bwedi.’

Pabakudile mwana kapindji, Yokebete baadi mumutwadile nsongwakashi a Faraone, amukusha bu mwana aaye na kumuudika bu Moyiise. Moyiise bakudile bu mwana a nfumu, baadya kukita kyooso kyakumiina. Anka Moyiise tabaadi mulube Yehowa nya. Baukanga shi baadi mwina Isaleele kushi bu mwina Ejiipitu. Aye nkusangula bwa kufubila Yehowa.

Pabaadi mulombashe bipwa 40, Moyiise baatshile kitshibilo kya kukwasha bakwabo. Pabamwene mwina Ejiipitu akupila mpika mwina Isaleele, Moyiise baadi mukupile mwina Egiipitu ngofu aye nkufwa. Aye nkushiika kitanda kyaye mu lufwinkinyi. Pabaukile Faraone, bakimbile bya kwipaa Moyiise. Anka Moyiise basuukile mu nsenga ya Madyane. Kwakwa, Yehowa baadi mumukalwile.